އައްޑޫ ފްލައިންގ ސްކޫލުގައި ތަމްރީނު ހޯދަމުންދާ ދަރިވަރުންގެ ކަންބޮޑުވުންތަކަށް އެކި ގޮތްގޮތުން ހައްލު ހޯދައިދެވޭތޯ ކުރަމުންދާ މަސައްކަތުގެ ދަށުން ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން އެ ދަރިވަރުންނާއި މަޝްވަރާކޮށްފިއެވެ.
އާދިއްތަ ދުވަހު ހަޔަރ އެޑިއުކޭޝަން މިނިސްޓަރ ހިމެނިވަޑައިގަންނަވާ ގޮތަށް ފްލައިން ސްކޫލުގެ ދަރިވަރުންނާއި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އާއި އަދި ހިތަދޫ ދެކުނު ދާއިރާގެ ކުރީގެ މެމްބަރު އަލީ ނިޒާރާއި އެކު ވަނީ ޒޫމް މެދުވެރިކޮށް ބައްދަލުކޮށް މަޝްވަރާކޮށްފައެވެ.
އޭޝިއަން އެކަޑަމީ އެއިރޮނޯޓިކްސް (އައްޑޫ ފްލައިންގ ސްކޫލް) ދަރިވަރުންގެ ކަންބޮޑުވުންތަކާއިއެކު ހަޅުތާލުކުރުމަށް ނިންމާފައިވާތީ، ކުރިއަށްދިޔަ ބައްދަލުވުމުގައި މިނިސްޓަރ ވިދާޅުވީ މައްސަލަ ހައްލުކުރުމުގެ ގޮތުން ސިވިލް އޭވިއޭޝަން އޮތޯރިޓީގައި އެކަން ބަލައިދިނުމަށް އެދިފައިވާނެ ކަމަށާއި، ރާއްޖޭގައި ކިޔެވުމަށް ދޫކުރާ ލޯނުގައި އެ ސްކޫލްގައި ކިޔަވަމުންދިޔަ ދަރިވަރުން ރާއްޖޭއިން ބޭރުގައި ކިޔެވުމަށް ހުއްދަ ދީފައި ވާނެ ކަމަށެވެ. އަދި ދަރިވަރުންގެ ކަންބޮޑުވުންތައް ސްކޫލާއި އެކި ފަހަރުމަތީން ހިއްސާކޮށް، ހައްލު ހޯދައިދިނުމަށް އެދިފައިވާނެ ކަމަށް ވެސް މިނިސްޓަރ ވިދާޅުވިއެވެ.
މި ބައްދަލުވުމުގައި ދަރިވަރުން ފާޅުކުރި ކަންބޮޑުވުންތަކުގެ ތެރޭގައި ކޯސް ނިންމުމަށް ތާވަލުކޮށްފައިވާ މުއްދަތުގައި ފަހުގެ ތާރީހެއްގައި ނިންމި ދަރިވަރެއް ނެތް ކަމަށާއި، ގިނަ ދަރިވަރުންނަކީ މިހާރު އިމްތިހާނު ނިންމާފައިވާ ދަރިވަރުން ކަމަށެވެ. ނަމަވެސް ނަތީޖާ ނުލިބި ގިނަ ދުވަސްތަކެއް ވަމުން އަންނަ ކަމަށް ދަރިވަރުން ވަނީ ފާހަގަކޮށްފައެވެ.
އޭގެ ތެރެއިން ބައެއް ދަރިވަރުންނަކީ ކޯސް ދިގުލައިގެން ގޮސް 4 އަހަރު ނުވަތަ 3 އަހަރު ވެފައިވާ ކުދިން ކަމަށާއި "ޗެކް ރައިޑް" އަޅަން ފްލައިޓެއް ނެތި ގިނަ ދުވަސް އެކަމަށްވެސް ހޭދަ ކުރަން ޖެހިފައިވާ ކަމަށް ދަރިވަރުން ފާހަގަކުރިއެވެ. އެ ސްކޫލްގައި ކިޔަވާ ދަރިވަރުންގެ ތެރެއިން 80 އަށްވުރެ ގިނަ ދަރިވަރުން ޕެޓިޝަނުގައި ސޮއިކޮށްފައިވާއިރު، 115 އަށްވުރެ ގިނަ ދަރިވަރުން މިކަމުގައި ހަރަކާތްތެރިވަމުން އަންނަ ކަމަށް އެ ދަރިވަރުން ވަނީ މައުލޫމާތު ދީފައެވެ.
އެންމެ ފަހުން މިނިސްޓްރީން އައްޑޫ ފްލައިންގ ސްކޫލްގެ މެނޭޖްމަންޓާ ބައްދަލުކުރީ 27 އޮގަސްޓްގައެވެ. އެ ދުވަހުގެ ބައްދަލުވުމުގައި އެފަރާތުން ބުނެފައިވަނީ، މި މައްސަލަ ދިމާވީ ކުރީ ސަރުކާރުގެ އެދުމުގެ މަތިން ޖާގައިގެ އިތުރަށް ދަރިވަރުން ނެގުމުން ކަމަށެވެ. އެހެންނަމަވެސް، އެއްވެސް ދަރިވަރަކަށް ކޯސް ފުރިހަމަކުރުމަށް ދައްޗެއް ދިމާނުވާނެކަމަށް އެ ދުވަހު ބުނެފައިވެއެވެ.
ހަޔަރ އެޑިއުކޭޝަން މިނިސްޓްރީން ވަނީ، މިއީ ތެދު މައުލޫމާތުކަމާއިމެދު ޝައްކު އުފެދޭތީ، މިކަމާއި ގުޅުންހުރި ލިޔެކިޔުން ހުށަހެޅުމަށް އެފަރާތުގައި އެދިފައެވެ. މިކަމަށް އެއްވެސް ޖަވާބެއް ނުލިބިގެން ނިމިދިޔަ ހަފްތާގައިވެސް އެފަރާތާއި މުއާމަލާތުކޮށް މައުލޫމާތު ހުށަހެޅުމަށް ފުރުސަތު ދެވުނު ނަމަވެސް، މިހާތަނަށް އައްޑޫ ފްލައިންގ ސްކޫލްގެ ފަރާތުން އެ މައުލޫމާތުތަކެއް ހިއްސާކޮށްފައެއް ނުވެއެވެ.
މިކަމާއި ގުޅިގެން ކުރަންޖެހޭ މަސައްކަތްތައް ކުރުމަށް ކަމާގުޅުންހުރި އިދާރާތަކާއިއެކު މަސައްކަތްކުރަމުން އަންނަ ކަމުގެ ޔަގީންކަން ދެއްވަމުން ހަޔަރ އެޑިއުކޭޝަން މިނިސްޓަރ ވަނީ ދަރިވަރުންނަށް ދިމާވެގެން އުޅޭ މައްސަލައަށް ހައްލެއް ހޯދައިދޭނެ ކަމަށް ވިދާޅުވެފައެވެ.
