ފ. ފީއަލީގައި އައިސް ޕްލާންޓް ގާއިމް ކުރުމުގެ އަމަލީ މަސައްކަތް ކުރިއަތް އޮތް އެއް މަސް ދުވަހުގެ ތެރޭގައި ފެށޭނެ ކަމަށް އުއްމީދު ކުރާ ކަމަށް އެރަށު ކައުންސިލްގެ ނައިބު ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ފ. ފީއަލީ ކައުންސިލްގެ ނައިބު ރައީސް މޫސާ އަހްމަދު ވިދާޅުވީ އެރަށަކީ ބޮޑު ކަންނެލީގެ މަސްވެރިކަން ކުރާ ރަށެއް ކަމަށެވެ. އަދި އެރަށަށް އައިސް ނުލިބުމުގެ މައްސަލަ އަކީ ދިމާވެފައިވާ ބޮޑު މައްސަލައެއް ކަމަށް ފާހަގަ ކުރައްވާ އޭނާ ވިދާޅުވީ މި މަޝްރޫއު އާއެކު މި މައްސަލައަށް ހައްލެއް ލިބިގެން ދާނެކަމަށް އުއްމީދު ކުރެވޭ ކަމަށެވެ.
އަދި މިއީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ގެ ރިޔާސީ ވައުދުފުޅެއް ކަމަށް ވެސް މޫސާ ވަނީ ވިދާޅުވެފައެވެ. މަޝްރޫއުގެ މަސައްކަތް ކުރިއަށް ދާގޮތުގެ ވާހަކަ ހިއްސާ ކުރައްވާ އޭނާ ވިދާޅުވީ މިހާރު ކުރިއަށް ދަނީ ކޮންޓްރެކްޓަރަކާ މަސައްކަތް ހަވާލު ކުރުމުގެ ފަހު މަރުހަލާ ކަމުގައެވެ.
އެގޮތުން އުއްމީދަކީ ކުރިއަށް މިއޮތް އެއް މަސް ދުވަހުގެ ތެރޭގައި މި މަޝްރޫއުގެ އަމަލީ މަސައްކަތް ފެށި އައިސްޕްލާންޓް ވީހާވެސް އަވަަހަށް ގާއިމް ވެގެން ދިޔުން ކަމަށް ވެސް އޭނާ ފާހަގަ ކުރެއްވިއެވެ.
މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ކުރިއަށް ގެންދިއުމަށް ނިންމާފައިވާ މި މަޝްރޫއުގެ ތަފްސީލުތަކަށް ބަލާއިރު، ޕީ.އެސް.އައި.ޕީ ގެ ބަޖެޓުން ފީއަލީގައި އައިސްޕްލާންޓް ގާއިމް ކުރުމަށް ފީއަލީ ކައުންސިލް އާއެކު މިނިސްޓްރީ އިން އިން ވަނީ ސޮއި ކޮށްފައެވެ.
އަދި 25 ޓަނުގެ އައިސްޕްލާންޓް ގާއިމް ކުރުމަށް ބީލަން ހުށަހެޅުމުގެ ފުރުސަތު ފީއަލީ ކައުންސިލުން މިހާރު ވަނީ ހުޅުވާލާފައެވެ.
