މިހާރުގެ ސަރުކާރުން ފަނޑިޔާރުގެއަށް ނުފޫޒުފޯރުވަން މަސައްކަތްކުރާ ކަމަށް ބުނެ ދައްކާ ވާހަކައަކީ ހަމަޖެހޭ ވާހަކައެއް ނޫންކަަމަށާއި މީގެކުރިން ފެނިގެން ދިޔައީ ހިތްހަމަނުޖެހޭ ހުކުމެއް ސުޕްރީމް ކޯޓުން ކުރުމުން އެކޯޓުގެ ފުރާޅުން ޓިނުނެގިތަން ކަަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރ މޫސާ ސިރާޖު ވިދާޅުވެއްޖެއެވެ.
ސިރާޖު ވިދާޅުވީ މިއަދުގެ ސަރުކާރުން ހިތްހަމަނުޖެހޭ ހުކުމެއް ކޯޓުން ކުރިޔަސް އެގޮތަށް އެކަން ނުކުރާނެ ކަމަށެވެ. ކޯޓުތަކުން ކަންކުރާނީ ޤާނޫނުގައި ލިޔެފައިވާގޮތަށް ކަމަށް ސިރާޖު ވިދާޅުވިއެވެ. ކުރީގެ ރައީސް ޔާމީންގެ އެކައުންޓްތައް ފްރީޒްކުރުމަކީ އެމްޑީޕީން ވަރަށް ބޮޑަށް ބޭނުންވާ ކަމެއް ކަމަށާއި ނަމަވެސް ސްޕްރީމް ކޯޓުން ހުކުމްކޮށްގެން އެދިޔައީ އެހެން ގޮތަކަށް ކަމަށް ސިރާޖު ވިދާޅުވިއެވެ.
ސްޕްރީމް ކޯޓުން އެހެން ނިންމީމާ އަޅުގަނޑުމެންނަށް ޔަގީންވާ ކަމަކީ އެއީ ދެން ތިބި ފަރާތްތަކުން ޤާނޫނާއި ޚިލާފަށް އަމަލުކުރެއްވީމާ ނިންމެވި ނިންމެވުމެކޭ. އަޅުގަނޑުމެން ހިތްހަމަނުޖެހޭ ހުކުމެއް އައީމާ ސްޕްރީމްކޯޓުން ފުރާޅު ޓިނު ނަގާ ސްޕްރީމް ކޯޓު ފަނޑިޔާރުން ހައްޔަރެއް ނުކުރާނެ. އެއީ ރައީސް ޔާމީން ނުވަތަ އިދިކޮޅު ފަރާތްތަކުގެ ވިސްނުން. މިހާރު އޮތް އެންމެ ބޮޑު ހިތްހަމަޖެހުމަކީވެސް އެއީ. އަޅުގަނޑުމެންނަށް ކަށަވަރު ޤާނޫނާއި ގަވާއިދު ނޫން ގޮތަކަށް އެއްވެސް މީހަކަށް ފިޔަވަޅެއް ނާޅާނެކަން. އެއީ ރައީސް ޔާމީންގެ މައްޗަށް ކަމަށްވީނަމަވެސް. ރައީސް ޔާމީންގެ މައްޗަށް ރަނގަޅަށް ޝަރީޢަތް ހިންގީމާ ރަނގަޅަށް ހުކުމް ކުރެވޭނެ ބޮޑެތި ވައްކަންތައް ، ބޮޑެތި ޚިޔާނާތުގެ މައްސަލަތައް އެހުރީ ފެންނަންފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ ރައީސް ޔާމީންގެ އެކައުންޓްގައި 100 މިލިއަން ހުރުމަކީ ކަންބޮޑުވާންޖެހޭ ކަމެއް ނޫންކަމަށާއި، މީހަކު ސުވާލުކުރަން ނުޖެހޭ ކަމެއްކަމަށް އެމަނިކުފާނަށް ހީފުޅުވިއަސް ތަހުޒީބީ ގައުމުތަކުގައި ކަންހިނގަމުންދަނީ އެއުސޫލުން ނޫންކަމަށެވެ. އެއީ ސުވާލު އުފެދޭ ކަމެއްކަމަށާއި ވަކިން ޚާއްސަކޮށް ދިވެހި ދައުލަތުގެ ރައީސްކަން ކޮށްފައިވާ މީހެއްގެ އެކައުންޓްގައި ނުބައްދަލު މިންވަރަށް ފައިސާ ހުރުމަކީ އެކަމާއި ގުޅިގެން ފިޔަވަޅުތަކެއް އެޅެންޖެހޭނެ ކަމެއްކަމަށް ސިރާޖު ވިދާޅުވިއެވެ. އަދި މިހާރު ޤާނޫނުލް އުގޫބާތަށް ނުހައްގު މުއްސަނދިކަން ހޯދުމާއި ގުޅޭގޮތުން މިގެނެވޭ އިސްލާހާއެކު ކޮރަޕްޝަނަށް މަގުފަހިވެގެންދާ ކަންކަން ވަރަށް ބޮޑަށް ބަންދުވެގެންދާނެކަމަށް ސިރާޖު ވިދާޅުވިއެވެ.
މީގެކުރިން ފެނިގެންދިޔައީ ރޮލެކްސް ގަޑިތަކާއި ދަރިންގެ އުފަންންދުވަހަށް ބޮޑެތި ކާރުތަކާއި އެއްޗެހި ގަނެދިންތައް. ފްލެޓްތައް ވެސް ވަގުތުން ފައިސާ ދީގެން ގަންނަނީ. ލިބޭ މުސާރައާއި ނުބައްދަލު. އެފައިސާ ހޯދާ ގޮތެއް ނޭންގޭ. ކިޔައިދޭން ޖެހޭ ގޮތެއް ނޯވޭ. އެހެންނަމަވެސް ޤާނޫނުލް އުގޫބާތަށް ގެންނަ އިސްލާހާއެކީގައި އެއީ އަޅުގަނޑު ކަމުގައިވިޔަސް ތިބޭފުޅާ ކަމަށްވިޔަސް ނުބައްދަލަށް ފައިސާ ހުރިއްޔާ އަދި މިހާރު ބިލްގައި އޮތީ ހަމައެކަނި ދައުލަތުގެ ފަރާތްތަކުގެ ބަލަންޖެހޭނެކަމަށް، އެހެންމަަމަވެސް ބަހުސް މަރުހަލާގައި މެމްބަރުން ފާހަގަކުރެއްވީ ނުހައްގު މުއްސަނދިކަން ބަލަންޖެހޭނެކަމަށް ހުރިހާ އެންމެންގެވެސް. ހަމައެކަނި ދައުލަތުގެ މުވައްޒަފުން ނޫންކަމަށް ބަލަންޖެހޭނީ. އެގޮތަށް ބަދަލު ކޮށްފިކަމަށްވަނީނަމަ މުސާރަ އާއި ނުބައްދަލު ފައިސާ ގެންގުޅޭ ކަމަށްވާނަމަ ނުވަތަ އެސެޓް އެއްޗެއް ގެންގުޅޭނަމަ ޖަވާބު ދާރީ ވާންޖެހޭނެ. އެއީ ތަހުޒީބު މުޖުތަމަ އުތަކުގައި އެކަން ހިނގާގޮތް.ފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ ރައީސް ޔާމީނަކީ ވެރިކަމުގައި ހުންނެވިއިރުވެސް މުސާރައިގެ ދެ ބައި ކުޅަ އެއް ބައި ނަންގަވައިގެން އުޅުއްވިކަމަށް ވިދާޅުވި ބޭފުޅެއްކަމަށެވެ. އެހެންކަމުން މިކަންކަން ބެލެންޖެހޭނެކަމަށް ސިރާޖު ވިދާޅުވިއެވެ.
މަގާމުން ވަކިކުރެވޭ ފަނޑިޔާރުންވެސް މިސަރުކާރުން ފަނޑިޔާރުގެއަށް ނުފޫޒު ފޯރުވާކަމަށް ވިދާޅުވެ ވާހަކަތައް ދައްކާކަމަށާއި އެކަމާއި ގުޅޭގޮތުން ވިދާޅުވާނީ ކީކީތޯ ދެންނެވުނު ސުވާލަށް ޖަވާބު ދެއްވަމުން ސިރާޖު ވިދާޅުވީ އެކަން މިނެކިރާނީ ރައްޔިތުން ކަމަށެވެ. ފަނޑިޔާރުންގެ ތެރެއިން ރިޝްވަތު ނަގައިގެން މަސައްކަތްކުރަނީ ކޮންކޮން ބައެއް ކަން އެއީ އެންމެންނަށްވެސް އެނގޭ ކަންކަންކަމަށާއި ފަނޑިޔާރުން ކޮށްފައި ހުންނަ ޓްވީޓްތަކަށް ބަލާލުމުންވެސް ކަންކަން ސާފުވެގެންދާނެ ކަމަށެވެ.
ރައްޔިތުން މިހާރު ކުރިޔަށްވުރެ ބޮޑަށް ފަނޑިޔާރުގެއަށް އިތުބާރު ކުރާ ކަމަށާއި ޚާއްސަކޮށް ހުޅުވާލައިގެން ޝަރީޢަތްތައް ކުރިޔަށް ގެންދާތީ ރަައްޔިތުންނަށް ކަންކަން ވަމުންދާ ގޮތް ސާފުކަަމަށް ސިރާޖު ވިދާޅުވިއެވެ. އަދި މައްސަލަތައް ހުރެގެން މަގާމުން ވަކިކުރެވުނު ފަނޑިޔާރުން މިހާރުގެ ފަނޑިޔާރުގެ މިނިވަން ނޫންކަމަށް ވިދާޅުވުމުން ދެން އެކަމާމެދު އަންނާނީ ހިނިކަމަށް ސިރާޖު ވިދާޅުވިއެވެ.
