ދައުލަތުގެ އެކި އިދާރާތަކުން ބަލަމުންދާ ޚިޔާނާތައި ގުޅުންހުރި މައްސަލަތައް ކުރިއަށްދާ ސްޕީޑާމެދު ހިތްހަމަނުޖެހޭ ކަމަށާއި އެކަމުގައި ކަންބޮޑުވުންތަކެއް އެބަހުރިކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ އެމްޑީޕީ މެމްބަރ މޫސާ ސިރާޖު ވިދާޅުވެއްޖެ އެވެ.
ރާއްޖެ ޓީވީގެ "ފަލަސުރުޚީ" ޕްރޮގްރާމްގައި ޚިޔާނާތުގެ މައްސަލަތައް ބަލަމުންދާ ކޮމިޝަންތަކާއި އޭސީސީ އާއި ފުލުހުންނާއި އަދި ޕީޖީގެ މަސައްކަތްތަކާމެދު ރައްޔިތުންގެ ކަންބޮޑުވުންތަކެއް އެބަހުރިކަމަށާއި މަދު ބަޔަކަށް ދައުވާ ކުރުމަށް ފޮނުވާފައިވާތީ އެކަމުގެ ކަންބޮޑުވުންތައް ހުރިއިރު މަސައްކަތްތަކުގެ ސްޕީޑް ލަސްވަނީ ކީއްވެތޯ ކުރެވުނު ސުވާލަށް ޖަވާބު ދެއްވަމުން ސިރާޖު ވިދާޅުވީ މައްސަލަތަކަށް އިސްކަންދޭނެ ތަރުތީބެއް އެކުލަވާލާ ބޮޑެތި މައްސަލަތައް އަވަހަށް ނިންމޭނެ ގޮތެއް ބެލުމަކީ މުހިންމު ކަމެއް ކަމަށެވެ. އެމްޑީޕީން ރިޔާސީ އިންތިޚާބުގައި ވެސް އަދި މަޖިލިސް އިންތިޚާބުގައި ވެސް އެންމެ ބޮޑަށް ވަކާލާތު ކުރި އެއްކަމަކީ ހިޔާނާތުގެ މައްސަލަތައް އަވަހަށް ބަލާ ފިޔަވަޅު އެޅުން ކަމަށެވެ.
އެހެން ނަމަވެސް މިކަމުގައި ޝާމިލްވާ މުއައްސަސާތަކުގެ މަސައްކަތްތައް ދަނީ އެންމެ ރަނގަޅު ސްޕީޑުގައި ނޫންކަމަށާއި ވަކިން ޚާއްސަކޮށް އެންޓި ކޮރަޕްޝަން ކޮމިޝަން (އޭސީސީ)ގެ މަސައްކަތުގެ ސްޕީޑް މިހާރަށް ވުރެ ރަނގަޅުކުރަންޖެހޭ ކަމަށް ގަބޫލުކުރައްވާ ކަމަށް ސިރާޖު ވިދާޅުވިއެވެ.
ތަންކޮޅެއް ރަނގަޅަށް މިކަން ދާންޖެހޭ. ވަކި ބައެއްގެ މައްޗަށް އެކަންޏެއް ނޫން މިމައްސަލަތައް ހިނގަންޖެހޭނީ. މީގައި ޝާމިލްވާ އެންމެންގެ މައްޗަށް މައްސަލަތައް ބެލެންޖެހޭނެ. ރައްޔިތުންގެ އެދުމަކީވެސް އެއީ. ހީވަނީ އޭސީސީން ކުރިއަށްވުރެ ބޮޑަށް މަޖިލީހުން ޖަވާބު ދާރީ ކުރުވަން ފެށިފަހުން ތަންކޮޅެއް ރަނގަަޅަށް މަސައްކަތްކުރާތަން ފެނޭ. ރިޔާސީ ކޮމިޝަނުންވެސް މަސއްކަތްކުރާ ތަން ފެނޭ.ފޮނަދޫ ދާއިރާގެ މެމްބަރ މޫސާ ސިރާޖު
މަސައްކަތުގެ ސްޕީޑް ލަސްވާ ސަބަބާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ސިރާޖު ވިދާޅުވީ ގިނަ ދުވަސްތަކެއް ވެފައި ހުރި މައްސަލަތަކެއް ބަލަންޖެހުމުން ހެކި ހޯދުމާއި ކަންކަން ކުރުމުގައި ދަތިތަކެއް އުޅެނީކަމަށް ގަބޫލުކުރެވޭ ކަމަށެވެ. އެކަމަކީ ސިޔާސީ މަސައްކަތަށްވުރެ ބޮޑަށް ކޯޓެއްގައި ސާބިތުކުރެވޭ ވަރަށް ހެކި ހޯދަންޖެހޭ ކަންތައްްތައް ކަމަށާއި އެހެންކަމުން އެކަމުގައި ދަތިތަކެއް ހުރެދާނެ ކަމަށް ގަބޫލުކުރައްވާ ކަމަށް ސިރާޖު ވިދާޅުވިއެވެ.
ސިޔާސީ ގޮތުން އެކަންކޮށްފައި އޮތްކަމަށް ދަންނަވަން ކެރުނަސް ކޯޓެއްގައި އެމައްސަލަ ސާބިތު ކުރެވޭވަރަށް ހެކި ހޯދުމަކީ އެއީ އަދި އެހެންކަމެއް. އެދަތިކަން ކަންނޭންގެ މިއުޅެނީ. އަޅުގަނޑުވެސް އެކަންބޮޑުވުމުގައި ބައިވެރިވަން. މާބޮޑަށްވެސް ލަސްވެއްޖެ ޚިޔާނާތްތައް ބަލާ ފިޔަވަޅު އެޅުމަށް. ހީވަނީ ދުވަސްވީމާ ހެކި ހޯދަން އުނދަގޫ ވަނީހެން. ޔަގީނެއް ނޫން. ދެން އެމައްސަލަތައް ބަލާ ފަރާތްތަކަށް ސާފުވާނީ.ފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ އަނެއްކަމެއްގެ ގޮތުގައި ފާހަގަވަނީ މައްސަލަތައް ބެލުމަށް ކުރިންވެސް އުޅުނު ފަރާތްތައް އުޅުން ކަމަށެވެ. މައްސަލަތައް ބަލަންތިބި ފަރާތްތަކަށް ބަދަލު ތަކެއް އަންނަންޖެހޭ ކަމަށާއި ޚިޔާނާތުގެ މައްސަލަތައް ބަލަންތިބީ ރައީސް ޔާމީން ސަރުކާރުގައި ވެސް އެމައްސަލަތައް ބަލަންތިބި ފަރާތްތައް ކަމަށް ސިރާޖު ވިދާޅުވިއެވެ.
ތަހުގީގު ޓީމަށް ބަދަލުތަކެއް ގެނެސް ވަރުގަދަކޮށް ބޭރުގެ އެހީތައް ހޯދަންޖެހޭ ކަންކަމުގައި އެހީ ހޯދައިގެން ތަހުގީގު ޓީމު ރަނގަޅު ކުރުން އެންމެ މުހިންމު ކަމެއްގެ ގޮތުގައި ވާންޖެހޭނީ. ލަސްވާ ސަބަބަކީ އޭރުގައިވެސް މައްސަލަތައް ބަލަންތިބި މީހުން މިހާރުވެސް މައްސަލަތައް ބަލަންތިބީ. އޭރުގައިވެސް އިޚުލާސްތެރިކަމާއެކު އެކަންކުރިތަނެއް ނުފެނުނު. އެއީ ތަހުގީގުގައި ބައިވެރިވާ ފަތާތްތައް ބަދަލު ގެނެސްގެން އެކަން ކުރެވޭނީފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ ރައްޔިތުންގެ އިތުބާރު ފުލުހުންގެ އިދާރާއަށް ގެއްލިފައިވާ ކަމަށެވެ. އެހެންކަމުން މިފަދަ މައްސަލަތައް ބަލާއިރު ފުލުސް އޮފީހަކީ ރައްޔިތުން އިތުބާރު ކުރާތަނަކަށް ބަދަލުކުރަންޖެހޭ ކަމަށް ސިރާޖު ވިދާޅުވިއެވެ.
