ނ. މާފަރު އިންޓަރނޭޝަނަލް އެއަރޕޯޓުގައި ކަސްޓަމްސް އިމިގްރޭޝަން ކަރަންޓީން (ސީއައިކިޔު) ސަރވިސް މިމަހު ތައާރަފްކުރަން ނިންމައިފިއެވެ.
މޯލްޑިވިއަންއިން ބުނީ ސީއައިކިޔުގެ ޚިދުމަތް 15 އޮކްޓޫބަރުން ފެށިގެން ލިބޭނެ ކަމަށެވެ.
މި ޚިދުމަތް ތައާރަފް ކުރުމުން ސީއައިކިޔު އޮފިޝަލުން އުފުލުމަށް ޗަޓަރ ފްލައިޓްތައް ހަމަޖައްސަން ނުޖެހޭނެ ކަމަށް މޯލްޑިވިއަންއިން ބުނެއެވެ.
މާފަރު އެއަރޕޯޓަކީ އިންޓަނޭޝަނަލް އެއަރޕޯޓެއް ނަމަވެސް އެކަށީގެންވާ ޚިދުމަތެއް ނުލިބެއެވެ. ނަމަވެސް ސީއައިކިޔުގެ ޚިދުމަތް ތައާރަފް ކުރުމުން އިންޓަނޭޝަނަލް އެއަރޕޯޓުން ލިބެންޖެހޭ ހުރިހާ ޚިދުމަތެއް އެއަރޕޯޓުން ލިބިގެންދާނެއެވެ.
މާފަރު އެއަރޕޯޓު އިތުރަށް ތަރައްގީކޮށް ޚިދުމަތްތަކުގެ ފެންވަރު ރަނގަޅު ކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން މާފަރު އަރޕޯޓުގައި ބޯޑަރ ކޮންޓްރޯލް ނިޒާމް ގާއިމްކޮށް ނިންމާފައިވާ ވަނީ މިދިޔަ މަހުގެ ތެރޭގައެވެ. އަދި ބޯޑަރ ކޮންޓްރޯލް ނިޒާމް މާފަރުގައި ގާއިމުކުރެވުމާއިއެކު ބައިނަލްއަގުވާމީ ފެންވަރުގައި ހުރިހާ ވައިގެ ބަނދަރުތަކުގައި އަދި ކަނޑުގެ ބަނދަރުތަކުގައި މިޚިދުމަތް ފުރިހަމައަށް ލިބެން ހުންނާނެއެވެ.
ބޯޑަރ ކޮންޓްރޯލް ނިޒާމަކީ އެންމެ ފަހުގެ ތަރައްގީ އާއި އެކުގައި މަސައްކަތްކުރާ ނިޒާމެކެވެ. މި ނިޒާމް ގާއިމުކުރުމުން ރާއްޖެއަށް އަންނަ ފަތުރުވެރިންނަށް ފަސޭހައިން މާފަރަށް ދަތުރުކުރެވޭނެ ގޮތް ވުމަކީ ގައުމުގެ މިވަގުތު ހާލަތަށް ބަލާއިރު ލިބޭނެ އެންމެ ބޮޑު އެއް ފަސޭހައެވެ.
