މިނިސްޓްރީ އޮފް ޓޫރިޒަމްގެ ފަރާތުން ލޯކަލް ކައުންސިލްތަކަށް ތަމްރީން ޕްރޮގްރާމްތަކެއް ހިންގުމަށް ނިންމައިފިއެވެ.
ޓޫރިޒަމް މިނިސްޓްރީއިން ނެރުނު އިއުލާނެއްގައި ވަނީ މީހުން ދިރިއުޅޭ ރަށްރަށުގައި ފަތުރުވެރިކަން ކުރިއަރުވާ ކައުންސިލްތަކާ ވީހާވެސް ގާތުން ގުޅިގެން މަސައްކަތް ހިންގުމުގެ ގޮތުންނާ ކައުންސިލަތައް ބާރުވެރި ކުރުވުމާއެކު ލާމަރުކަޒުކުރުވުމަށް ބާރުއެޅުވުމުގެގޮތުން އެ މިނިސްޓްރީއިން އިސްނަގައިގެން ފާއިތުވި އަހަރު ފަތުރުވެރިންނަށް ހިދުމަތްދޭ ގެސްޓްހައުސް އަދި ޓްރެވެލް އޭޖެންސީ އަލަށް ރަޖިސްޓްރީ ކުރުމާއެކު ރަޖިސްޓްރީ އައު ކުރުމަށް ކުރެވޭ އިންސްޕެކްޝަންގެ ތަމްރީން ޕްރޮގްރާމެއް ހިންގާފައި ވާކަމަށެވެ. އަދި މި ޕްރޮގްރާމްގައި ޖުމްލަ 199 ކައުންސިލުން ބައިވެރިވެފައިވާ ކަމަށާ އަދި މި ޕްރޮގްރާމަަށް ބޮޑު ތަރުހިބެއް ލިބިފައި ވުމާއެކު އޭގެ ވަރޗުއަލް ރިފްރެޝަރ ޕްރޮގްރާމެއް މިއަހަރުގެ އޮކްޓޯބަރ މަހުގެ 10 ވަނަ ދުވަހު އެ މިނިސްޓްރީއިން ބޭއްވުމަށް ހަމަޖެހިފައިވާކަމަށެވެ.
މީގެ އިތުރުންވެސް ހަމަ މި ދުވަހު ޑައިވް ސެންޓަރުތަކުގެ އަލަށް ރަޖިސްޓްރީ ކުރުމަށާއި ރަޖިސްޓްރީ އާކުރުމަށް ކުރެވޭ އިންސްޕެކްޝަން ގެ ތަމްރީން ޕްރޮގްރާމެއް ވެސް ކުރުއަށް ގެންދިއުމަށް ހަމަޖެހިފައިވާ ކަމަށް ވެސް އެ މިނިސްޓްރީގެ އިއުލާނުގައި ވެއެވެ.
މި ތަމްރީން މެދުވެރިކޮށް ލާމަރުކަޒީ އުސޫލުން ކައުންސިލްތަކަށް މިފަދަ އިންސްޕެކްޝަންތައް ކުރުމުގެ ފުރުސަތު ލިބޭ ކަމަށާ ރާއްޖޭގެ އެކި ކަންކޮޅުތަކުން ގެސްޓްހައުސް އަދި ޓްރެވަލް އޭޖެންސީގެ އިތުރުން ޑައިވް ސެންޓަރުތަކުގައި ރަޖިސްޓްރީ ކުރުމަށް އެދޭ ފަރާތްތަކަށް މި މަރުހަލާ ލުއިފަސޭހަ ވެގެން ދާނެ ކަމަށްވެސް މި އިއުލާނުގައި ވެއެވެ. ޓުއަރިޒަމް މިނިސްޓްރީއިން ވަނީ ކައުންސިލްތަކުން އެ މިނިސްޓްރީއިން ކުރާ މިފަދަ މަސައްކަްތަކަށް ދެމުންދާ އެއްބާރުލުމަށް ޝުކުރު އަދާކޮށްފައެވެ.
