ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ބޭންކް އެކައުންޓުތައް ފްރީޒް ކުރުމަށް ކްރިމިނަލް ކޯޓުން އަމުރު ނެރެފައިވަނީ ގާނޫނާ އެއްގޮތަށް ނޫންކަމަށާއި، ކްރިމިނަލް ކޯޓުގެ އެ އަމުރު ބާތިލް ކުރުމަށް ހައިކޯޓުން ނިންމާފައިވާ ނިންމުމަށް ސުޕްރީމް ކޯޓުން ވެސް ތާއީދު ކޮށްފިއެވެ.

ސުުޕްރީމް ކޯޓުން ބުރާސްފަތި ދުވަހު ކުރި ހުކުމުގައި ބުނެފައިވަނީ، އޭސީސީން ތަހުގީގުކުރި މައްސަލައެއްގައި މޯލްޑިވްސް އިސްލާމިކް ބޭންކުގައި ރައީސް ޔާމީން ހުޅުވާފައިވާ އެކައުންޓަކަށް އެމްއެމްޕީއާރުސީ ހިޔާނާތުގެ 1 މިލިއަން ޑޮލަރު ވަދެ، އެފައިސާ، އެސްކްރޯ އެކައުންޓެއްގައި ބެހެއްޓުމަށް ވެވުނު އެއްބަސްވުމުގެ ދަށުން، އެހެން ގޮތަކަށް ހޯދި އެއް މިލިއަން ޑޮލަރު ބޭންކް އޮފް މޯލްޑިވްސްގައި ހުޅުވާފައިވާ އެސްކްރޯ އެކައުންޓަށް ޖަމާކޮށްފައިވާތީ، މިކަމުގެ ތަހުގީގު ފުލުހުން ކުރަމުންދާތީ، ރައީސް ޔާމީންގެ އިސްލާމިކް ބޭންކުގައި އޮތް 8 އެކައުންޓެއް ފްރީޒް ކުރުމަށް ކްރިމިނަލް ކޯޓުން ނެރެފައިވާ އަމުރު ނެރެފައިވަނީ ގާނޫނާ އެއްގޮތަށް ކަމަށް ނުފެންނަ ކަމަށެވެ. އަދި ހައިކޯޓުން ކްރިމިނަލް ކޯޓުގެ އެއަމުރު ބާތިލް ކަމަށް ނިންމި ނިންމުމަށްވެސް ސުޕްރީމް ކޯޓުގެ ފަނޑިޔާރުންގެ އިއްތިފާގުން ވަނީ ތާއީދު ކުރައްވާފައެވެ.

ރައީސް ޔާމީންގެ ނަމުގައި މޯލްޑިވްސް އިސްލާމިކް ބޭންކުގައި ހުޅުވާފައިވާ 8 އެކައުންޓް ފްރީޒް ކުރިމުގެ އަމުރުކަށް އެދި ކްރިމިނަލް ކޯޓަށް ފުލުހުން ހުށަހަޅާފައިވަނީ 13 ޑިސެމްބަރު 2018ގަ އެވެ. އެ 8 އެކައުންޓް ފްރީޒް ކުރުމަށް ބޭނުންވާ ސަބަބެއް ކަމަށް ފުލުހުން ބުނެފައިވަނީ، އެމްއެމްޕީއާރުސީ މެދުވެރިކޮށް، ކުށްޔަށް ދޫކުރި ރަށްތަކާއި ފަޅުތަކާއި ގުޅިގެން ދައުލަތަށް ލިބެންޖެހޭ ގިނަ އަދަދެއްގެ ފައިސާ ރައީސް ޔާމީންގެ އެކައުންޓަކަށް ޖަމާކޮށްފައިވާ ކަމުގެ ތުހުމަތު ކުރެވޭ މައްސަލައާ ގުޅުންހުރި ފައިސާ ނުހިފަހައްޓައިފިނަމަ، އެފައިސާއިން މާލީ މަންފާ ހޯދުމުގެ ފުރުސަތު ލިބިގެންދާތީ އާއި ދައުލަތަށް ލިބެންޖެހޭ ފައިސާ ގެއްލިގެން ހިގައިދާނެ ކަމުގެ ފުރުސަތު އޮތް ކަމަށް ތަހުގީގަށް ފެންނާތީ ކަމަށް ފުލުހުން ފައިވެއެވެ.

ރައީސް ޔާމީންގެ ނަމުގައި މޯލްޑިވްސް އިސްލާމިކް ބޭންކުގައި ހުޅުވާފައިވާ 8 އެކައުންޓް ފްރީޒް ކުރުމުގެ އަމުރެއް ހޯދުމަށް އެދި ހުށަހެޅިއިރު ފުލުހުން ރައީސް ޔާމީންގެ މައްޗަށް 5 ކުށަކަށް ތުހުމަތު ކޮށްފައިވެއެވެ. އެއީ ގާނޫނުލްއުގޫބާތުގެ 510 ވަނަ މާއްދާގައި ބަޔާން ދެ ކުށާއި 512 ވަނަ މާއްދާގައި ބަޔާން ކުރާ ދެކުށާއި މަނީ ލޯންޑަރިންގ އަދި ޓެރެރިޒަމަށް ފައިނޭންސް ކުރުން ހުއްޓުމުގެ ގާނޫނުގެ 53 ވަނަ މާއްދާއިގައި ބަޔާން ކުރާ ކުށެކެވެ. އެކުށްތަކާއި ގުޅިގެން ފުލުހުންގެ ތަހުގީގަށް އެކީގެ ގޮތުގައި ކޯޓު އަމުރަށް އެދޭ ފޯމާއެކު ހުށަހަޅާފައިވަނީ ރައީސް ޔާމީންގެ ބޭންކް އެކައުންޓްތަކުގެ ސްޓޭޓްމަންޓްތަކުގެ ކޮޕީއާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހިންގަމުން އަންނަ ފައިނޭންޝަލް އިންޓަލިޖެންސް ޔުނިޓް (އެފްއައިޔޫ)އިން ފުލުހުންނަށް 5 ނޮވެމްބަރު 2018 ގައި ސިޓީއެއްގެ ކޮޕީއެވެ.

ސުޕްރީމް ކޯޓުގެ ހުކުމުގައި ބުނެފައިވަނީ، އެކައުންޓް ފްރީޒް ކުރުމުގެ އަމުރަކަށް އެދި ފުލުހުން ކްރިމިނަލް ކޯޓަށް ހުށަހެޅި ފޯމުގައި އެއަމުރު ހޯދަން އެދި ހުށަހަޅާފައިވާ ސަބަބުތަކާއި އެފޯމާއެކު އެކިތަކަށް ބަލާއިރު، ރައީސް ޔާމީންގެ މައްޗަށް ތުހުމަތު ކުރެވިގެން ތަހުގީގު ކުރެވޭ މައިގަނޑު ކުށަކީ މަނީ ލޯންޑަރިންގ ކުށްކަން ސާފުކޮށް އެނގޭ ކަމަށެވެ. މޯލްޑިވްސް އިސްލާމިކް ބޭންކުގައިވާ ރައީސް ޔާމީންގެ 8 އެކައުންޓެއް ފްރީޒް ކުރުމުގެ އަމުރެއް ހޯދުމަށް އެދި ފުލުހުން ކްރިމިނަލް ކޯޓަށް ހުށަހެޅި ފޯމުގައިވާ މައުލޫމާތުތަކަށް ބިނާކޮށް، ކްރިމިނަލް ކޯޓުން އެކައުންޓްތައް ފްރީޒް ކުރުމަށް 13 ޑިސެމްބަރު 2018 ގައި ނެރެފައި ވެއެވެ. އެކޯޓު އެމަރުން މޯލްޑިވްސް އިސްލާމިކް ބޭންކްގައިވާ ރައީސް ޔާމީންގެ 8 އެކައުންޓް ފްރީޒް ކުރުމަށް އަމުރުކޮށްފައިވަނީ 13 ޑިސެމްބަރު 2018 އިން 12 މާރޗު 2019 ގެ ނިޔަލަށެވެ. ރައީސް ޔާމީންގެ އެކައުންޓްތައް ފްރީޒް ކުރުމަށް ކްރިމިނަލް ކޯޓުން އެ އަމުރު ނެރުމުން ރައީސް ޔާމީންގެ ފަރާތުން ވަނީ ހައިކޯޓުގައި އެއަމުރު އިސްތިއުނާފް ކޮށްފަ އެވެ. އަދި ހައިކޯޓުން ވަނީ ކްރިމިނަލް ކޯޓުން ނެރެފައިވާ އެއަމުރު ބާތިލް ކޮށްފަ އެވެ. ހައިކޯޓުން ކްރިމިނަލް ކޯޓުން ނެރުނު އެއަމުރު ބާތިލް ކުރި ސަބަބުތަކުގެ ތެރެއިން ފުރަތަމަ ސަބަބެއްކަމަށް ހައިކޯޓުން ބުނެފައިވަނީ، ކްރިމިނަލް ކޯޓުން އެއަމުރު ނެރެފައިވަނީ ޖިނާއީ އިޖުރާއަތުގެ ގާނޫނު 72 ވަނަ މާއްދާއާއި 73 ވަނަ މާއްދާއާ ހިލާފަށް ކަމަށެވެ. މީގެ ތަފްސީލްގައި ހައިކޯޓުން ބުނެފައިވަނީ، ޖިނާއީ އިޖުރާއަތުގެ 73 ވަނަ މާއްދާގެ ދަށުން އެކައުންޓުގެ ފައިސާ ހިފެހެއްޓުމާއި އެފައިސާއިން މުއާމަލާތް ހިފެހެއްޓުމުގެ އަމުރަކަށް އެދެވޭނީ ޖިނާއީ އިޖުރާއަތުގެ ގާނޫނުގެ 72 ވަނަ މާއްދާގެ (ހ)ގެ ދަށުން، ބޭންކް އެކައުންޓެއް މޮނީޓަރ ކުރުމުގެ އަމުރެއްގެ ދަށުން ބަލަމުންދާ ބެލުންތަކުންނާއި ބޮޑު ކުށެއްވާކަމަށް ވާނަމަކަމުގައިކަން އެގާނޫނުގެ 73 ވަނަ މާއްދާއަށް ބެލުމުން އެނގޭ ކަމަށެވެ. މިމައްސަލާގައި ރައީސް ޔާމީންގެ ނަމުގައި މޯލްޑިވްސް އިސްލާމިކް ބޭންކުގައި ހުޅުވާފައިވާ 8 އެކައުންޓް ފްރީޒް ކުރުމުގެ އަމުރަކަށް އެދި ކްރިމިނަލް ކޯޓަށް ހުށަހަޅާފައިވަނީ 5 ނޮވެމްބަރު 2018ގައި އެމްއެމްއޭގެ އެފްއައިޔޫ އިން ފުލުހުންނަށް ފޮނުވި ސިޓީއަކާ ގުޅިގެން ކަމަށް ދައުލަތުން ބުނެފައިވާއިރު، އަދި އެސިޓީގައި ވަނީ އެންޓި ކޮރަޕްޝަން ކޮމިޝަން (އޭސީސީ)އިން ބޭންކް އޮފް މޯލްޑިވްސްގައި ހުޅުވާފައިވާ އެސްކްރޯ އެކައުންޓަކަށް 10 ޖޫން 2018 ވަނަ ދުވަހު ރައީސް ޔާމީންގެ އަމިއްލަ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ އެކައުންޓުން ޖަމާކޮށްފައިވާ 1 މިލިއަން ޑޮލަރު ޖަމާކޮށް، އާދަޔާ ހިލާފު މުއާމަލާތެއް ފާހަގަކުރެވިފައިވުމުން، އެމުއާމަލާތް ހިންގުމުގެ ހައިސިއްޔަތާއި ބޭނުމާމެދު ސުވާލު އުފެދޭތީ އެކަންތައްތައް އިތުރަށް ބަލާ ތަހުގީގު ކުރުމަށް މުހިއްމު ކަމުގެ ވާހަކަތަކެކެވެ.

އެގޮތުން މޯލްޑިވްސް އިސްލާމިކް ބޭންކުގައި ރައީސް ޔާމީންގެ ނަމުގައި ހުޅުވާފައިވާ 8 އެކައުންޓް ފްރީޒް ކުރުމުގެ އަމުރަކަށް ފުލުހުން އެދިފައިވަނީ، ޖިނާއީ އިޖުރާއަތުގެ ގާނޫނު ބުނާ މޮނީޓަރިންގ އަމުރުކަށް އެދުމަށް އެކަށީގެންވާ މުއްދަތު ދައުލަތަށް ލިބިއޮވެމެ، ދައުލަތުގެ ފަރާތުން އެފަދަ އަމުރަކަށް އެދިފައި ނުވާކަމަށް ހައިކޯޓުގެ ނިންމުމުގައި ބުނެފައި ވެއެވެ. ސުޕްރީމް ކޯޓުގެ ނިންމުމުގައި ވަނީ ބޭންކިން ގާނޫނުގެ ދަށުން ގާނޫނު ތަންފީޒުކުރާ އިދާރާތަކާއި ޕްރޮސެކިއުޓަރ ޖެނެރަލް ބޭންކްތަކުން ހޯދާ މައުލޫމާތުތަކުގެ މައްޗަށް ބިނާކޮށް އެކައުންޓް ފްރީޒް ކުރަން އެދޭ ނަމަ އެކައުންޓް މޮނީޓަރ ކުރުމުގެ އަމުރެއް އޮތުން ލާޒިމްނުވާނެ ކަމަށެވެ. އަދި އެ ނޫން ހާލަތްތަކުގައި އެކައުންޓް މޮނީޓަރ ކުރުމުގެ ހޯދަންޖެހޭ ގޮތަށް ޖިނާއީ އިޖްރާއާތުގެ ގާނޫނުގައި އޮންނަނީ އެކަށީގެންވާ ހެކި ހުރެގެން ނޫނީ އެކައުންޓްތައް ފްރީޒް ކުރުމުގެ އަމުރެއް ނުދިނުން ކަމަށެވެ. ރައީސް ޔާމީންގެ އެކައުންޓްތައް ދޫކޮށްލަން ހައި ކޯޓުން ނިންމި ނިންމުން ބިނާކުރި ސަބަބު ގޯސް ކަމަށެވެ. އެކަމަކު އެކައުންޓް ފްރީޒްކުރި ސަބަބާއި އެކައުންޓްތަކާ ހުރި ގުޅުން ފުލުހުން ބުނެދެވިފައި ނުވާތީ އެ އަމުރުތައް ދޫކޮށްލަން ހައި ކޯޓުން ކުރި ހުކުމް ރަނގަޅު ކަމަށް ސުޕްރީމް ކޯޓުގެ ނިންމުމުގައި ވެއެވެ. މިމައްސަލަ ބެއްލި ފަނޑިޔާރުންގެ ބެންޗުގެ އިސްފަނޑިޔާރަކީ ހުސްނުއް ސުއޫދު އެވެ.

ފަނޑިޔާރު ސުއޫދުގެ ރައުޔުއަށް އެ މައްސަލަ ބެއްލެވި ބެންޗުގައި ދެން ތިއްބެވި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އައިޝާ ޝުޖޫން މުހައްމަދު ވަނީ ތާއީދު ކުރައްވާފަ އެވެ. ރައީސް ޔާމީންގެ އެކައުންޓުތައް ފްރީޒް ކުރަން ކޯޓުން އަމުރު ކުރީ ރައީސުލްޖުމްހޫރިއްޔާ ކަމުގައި ހުންނަވައިގެން ގާނޫނާ ހިލާފަށް މާލީ މުއާމަލާތްތަކެއް ހިންގާފައިވާ ކަމަށް ތުހުމަތު ކުރެވޭ މައްސަލައިގައެވެ. އެގޮތުން ޔާމީންގެ އެކައުންޓުތައް ފްރީޒް ކޮށްފައިވާކަން ފުލުހުން ހާމަކޮށްފައި ވަނީ 2018 ވަނަ އަހަރުގެ ޑިސެމްބަރު 14 ވަނަ ދުވަހުއެވެ. އޭރު އެމަނިކުފާނުގެ އެކައުންޓްތަކުގައި 100 މިލިއަނަށް ވުރެ ގިނަ ރުފިޔާ ހުރި ކަމަށް ފުލުހުން ވަނީ ބުނެފައެވެ.