ހދ. ކުޅުދުއްފުށިން ފުރައިގެން އެ އަތޮޅު ކުރިނބީއަށް މުދާ ބަރުކޮށްގެން ދިޔަ ދޯންޏެއް ބަންޑުން ޖަހާލައިފިއެވެ.
ކުޅުދުއްފުށި އޮންލައިންއިން ހާމަކޮށްފައިވާ ގޮތުގައި، އެދޯނި ބަންޑުން ޖަހާލާފައިވަނީ ކުނބުރުދޫއާއި، ކުރިނބީއާ ދެމެދު ކަނޑަށެވެ. ބަނޑުންޖަހާލި ކުރިނބީ ދޯނީގައި ދަތުރުކޮށްފައިވަނީ އަންހެނަކާއި ދެ ފިރިހެނުންނެވެ. މައުލޫމާތު ލިބިފައިވާގޮތުގައި ދޯނިން ދަތުރުކުރި އެންމެންގެ ހާލުވެސް ރަނގަޅެވެ.
ރާއްޖެއެމްވީއިން އެމްއެންޑީއެފްގެ ތަރުޖަމާނަށް ގުޅާލުމުން ވިދާޅުވީ، ކުރިނބީ ކައުންސިލުން އެ ހާދިސާގެ މައުލޫމާތު އެމްއެންޑީއެފް ކޯސްޓްގާޑަށް ދީފައިވާ ކަމަށާއި، ނަމަވެސް އެމްއެންޑީއެފުން އެ ސަރަހައްދުގައި ހަރަކާތްތެރި ނުވާކަމަށެވެ. ކުރިނބީ ކައުންސިލުން ވެސް ވަނީ އެމްއެންޑީއެފަށް އެ ހާދިސާ ހިނގިކަމުގެ މައުލޫމާތު ދިނުމުގެ ގޮތުން އެމްއެންޑީއެފަށް އެކަން ހިއްސާކޮށްފައިވާ ކަމަށް ބުނެފައެވެ.
ބަންޑުން ޖަހާލާފައިވާ ދޯންޏަށް އެހީތެރިކަން ދިނުމަށް އެ ސަރަހައްދަށްވަނީ އިތުރު ދޯންޏެއް ގޮސްފައެވެ. އަދި އެ މަސައްކަތް ކުރަމުންދަނީ އޮޑިވެރިޔާގެ ބެލުމުގެ ދަށުން ކަމަށް ވެއެވެ. ކައުންސިލުން ބުނެފައިވާގޮތުގައި ދޯނި ބަންޑުން ޖަހާލީ ދިޔަވެގެން ކަމަށާއި، މޫސުން ގޯސް ވެގެން ނޫންކަމަށެވެ.
ދޯނިން ދަތުރުކުރި އެއްވެސް މީހަކަށް ގެއްލުންނުވި ނަމަވެސް ދޯނީގައި ހުރި ހުރިހާ މުދާތައްވަނީ ކަނޑުއަޑިއަށް ގޮސްފައި ކަމަށް ވެއެވެ.
