ހއ. ހޯރަފުށީގައި ތަރައްޤީ ކުރަމުން އަންނަ އެއަރޕޯޓް އިންޑިޔާ ބަޔަކާއި ހަވާލުކޮށްފައިވާ ކަމަށް ދެކެވޭ ވާހަކަތައް ފިނޭންސް މިނިސްޓަރ އިބްރާހީމް އަމީރު ދޮގު ކުރައްވައިފިއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ހޯރަފުށި ދާއިރާގެ މެމްބަރ އަހުމަދު ސަލީމް ވަނީ އިދިކޮޅު މެމްބަރުން ހޯރަފުށި އެއަރޕޯޓް އިންޑިޔާ ކުންފުންޏަކަށް ދިން ކަމަށް ބުނެ ފަތުރަމުންދާ ވާހަކަތަކުގައި ހިމެނޭ ދޮގު ސާފު ކޮށްދިނުމަށް ފިނޭންސް މިނިސްޓަރ އިބްރާހީމް އަމީރުގެ ކިބައިން ވަނީ އެެދިވަޑައިގަންފައެވެ. އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ހޯރަފުށި އެއަރޕޯޓް އިންޑިޔާގެ އެއްވެސް ބަޔަކާއި ހަވާލުކޮށްފައިނުވާ ކަމަށެވެ.

އިދިކޮޅު ފަރާތްތަކުން މިފަހަކުން އަންނަނީ އިންޑިޔާގެ ކުންފުނިތަކަށް ރާއްޖޭގެ ބޮޑެތި މަޝްރޫޢުތައް ހިންގަންދޭ ކަމުގެ ތުހުމަތުތަކެއް ވަރަށް ބޮޑަށް ކުރަމުންނެވެ. އެގޮތުން އެންމެ އުތުރުން އޮންނަ ހަނިމާދޫ އެއަރޕޯޓް ބައިނަލްއަގްވާމީ ފެންވަރަށް ތަރައްްޤީ ކުރުމަށް އިންޑިޔާއިން ފަންޑު ކުރުމާއި ގުޅިގެން އެއަަރޕޯޓް ހިންގުން ވެސް އިންޑިޔާއާ ހަވާލު ކޮށްފައިވާ ކަމަށް އަންނަނީ ބުނަމުންނެވެ. އެހެންނަމަވެސް ސަރުކާރުން އަންނަނީ އެވާހަކަތައް ދޮގު ކުރަމުންނެވެ.

އިންޑިޔާއިން އަންނަނީ ރާއްޖެއަށް ކޮވިޑް-19 ގެ މިދަތި ދަނޑިވަޅުގައި ބޮޑެތި އެހީތަކެއް ދެމުންނެވެ. އެގޮތުން ބަޖެޓް ސަޕޯޓްގެ ގޮތުގައި 250 މިލިއަން ޑޮލަރު ދީފައިވާއިރު 800 މިލިއަން ޑޮލަރުގެ ކްރެޑިޓް ލައިންގެ ތެރެއިން ބޮޑު ހަތް މަޝްރޫއެއް ކުރިޔަށް ގެންދިޔުމަށް ވަނީ ހަމަޖެހިފައެވެ.

އިންޑިޔާގެ އެހީގައި ގިނަ މަޝްރޫޢުތަކެއް ފެށުމަށް ތައްޔާރުވަމުން އަންނައިރު އިދިކޮޅު ފަރާތްތަކުން މިކަމުގައި އިންޑިޔާ އާއި ދެކޮޅަށް ދައްކާ ވާހަކަތަކުގެ އަޑުތައް ބާރުވެ އެކަމުގެ ފާޑުކިޔުންތައް ވަނީ ގިނަ ވެފައެވެ. ޚާއްސަކޮށް މަޖިލީހުގެ ތެރޭގައި ވެސް އިދިކޮޅު މެމްބަރުން މިހާރު ދައްކަވާ ކޮންމެ ވާހަކައެއްގައި އަންނަނީ އިންޑިޔާއަށް ފާޑު ކިޔުއްވަމުންނެވެ.

ހއ. ހޯރަފުށީގައި ތަރައްޤީ ކުރާ އެއާޕޯޓު މަޝްރޫގެ ދަށުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށް ގެންދާ މަސައްކަތްތައް މިއަހަރުގެ އޮކްޓޯބަރު މަހުގެ ނިޔަލަށް ނިންމާލެވޭނެ ކަމަށް ލަފާ ކުރެވޭ ކަމަށް އެ ކުންފުނިން ވަނީ ބުނެފައެވެ. ޖުމްލަ 198 މިލިއަން ރުފިޔާ ހަރަދުކޮށްގެން ހިންގާ މި މަޝްރޫއު އެމްޓީސީސީއާ ހަވާލު ކުރެވި އެއްބަސްވުމުގައި ސޮއިކޮށްފައިވަނީ 2019 ވަނަ އަހަރުގެ މާރޗް މަހުގެ 25 ގައެވެ. އަދި އެ މަސައްކަތް އެ އަހަރުގެ މާރޗް 31ގައި ފައްޓަވައިދެއްވީ ރައީސް އިބްރާހިމް މުހައްމަދު ސޯލިހުއެވެ.