ފްރާންސްގައި ކޮވިޑް-19 ޖެހޭ މީހުންގެ އަދަދުތައް ދަށަށް ދާން ފަށައިފިއެވެ.

އެހެންނަމަވެސް ވައިރަސް ޖެހިގެން ހޮސްޕިޓަލްގައި އެޑްމިޓް ކޮށްގެން ފަރުވާ ދޭންޖެހޭ މީހުންގެ އަދަދު އިތުރުވަމުން އަންނަ ކަމަށް އެ ގައުމުގެ ހެލްތު މިނިސްޓްރީން ބުނެއެވެ. އެގޮތުން ހޯމަ ދުވަހު އެގައުމުގައި ވައިރަސް ޖެހިގެން ހޮސްޕިޓަލްގައި އެޑްމިޓް ކޮށްގެން ފަރުވާދޭން ޖެހޭ މީހުންގެ އަދަދު އެއްދުވަހާ 300ށް ވުރެ މައްޗަށް އަރާފައިވާ ކަމަށް ހެލްތު މިނިސްޓްރީން ބުނެއެވެ. މިއީ އޭޕްރީލް މަހުގެ 12 ވަނަ ދުވަހުގެ ފަހުން މިހާ ގިނަ އަދަދެެއްގެ ބަޔަކު ހޮސްޕިޓަލްގައި އެޑްމިޓް ކުރި ފުރަތަމަ ފަހަރު ވެސް މެއެވެ.

ހޯމަ ދުވަހު ފްރާންސްގައި ހޮސްޕިޓަލްގައި ފަރުވާ ދެމުން އަންނަނީ 7294 މީހުންނަށެވެ. މީގެތެރެއިން 1400ށް ވުރެ ގިނަ މީހުންނަށް އައިސީޔޫގައި އަންނަނީ ފަރުވާދެމުންނެވެ. މިއީ މެއި 28 ގެ ފަހުން އެންމެ ގިނަ މީހުންނަށް އައިސީޔޫގައި ފަރުވާ ދެމުން އަންނަ ދުވަސް ވެސް މެއެވެ.

މިއާއެކު ޕެރިސްގައި ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ވަނީ ކުރިޔަށްވުރެ އިތުރު ކޮށްފައެވެ.

ފްރާންސްގައި މިހާތަނަށް އައިއިރު މިބަލީގައި 32،299 މީހުން ވަނީ މަރުވެފައެވެ. އަދި 624،274 މީހުންނަށް ވަނީ ވައިރަސް ޖެހިފައެވެ.