ވައިގެ ޒަރިއްޔާއިން ކޮވިޑް-19 ފެތުރުމުގެ ފުރުސަތު ބޮޑު ކަމަށް ބަޔާންކޮށް އުސޫލު އާންމުކުރެވުނީ އޮޅުމަކުން ކަމަށް އެމެރިކާގެ ސެންޓަރ ފޯރ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) އިން ބުނެފިއެވެ.

ހުކުރު ދުވަހުގެ ވަގުތެއްގައި ސީޑީސީގެ ވެބްސައިޓުގައި ޝާއިއުކުރި އުސޫލުގައި ވަނީ ވައިގެ ޒަރިއްޔާއިން ކޮވިޑް ފެތުރުމުގެ ފުރުސަތު އޮތް ކަމަށް ހޯދުންތަކުން ދައްކާތީ، ބަންދުވެފައި ހުންނަ ތަންތަނުގައި އުޅޭއިރު އެއަރ ޕިއުރިފަޔަރ ބޭނުންކޮށްގެން ވައިގެ ތެރޭގައި ހުންނަ ޖަރާސީމުތައް ނައްތާލަން އަންގާފައެވެ.

ސީޑީސީން ބުނެފައިވަނީ، ވައިގެ ޒަރިއްޔާއިން ކޮވިޑް ފެތުރޭ ގޮތާ މެދު އެ އެޖެންސީގެ ރެކޮމެންޑޭޝަންތައް އަދާހަމަ ކުރުމުގެ މަސައްކަތް ކުރިއަށްދާ ކަމަށާއި، އެ މަސައްކަތް ނިމުމުން އައު ރެކޮމެންޑޭޝަންތައް އާންމުކުރާނެ ކަމަށެވެ. ނަމަވެސް އައު ގައިޑްލައިން އާންމުކުރާނެ ސީދާ ތާރީހެއް ހާމައެއް ނުކުރެއެވެ. އަދި މިހާރުވެސް އަމަލުކުރަމުން ދާނީ ކުރީގެ އުސޫލަށް ކަމަށް ސީޑީސިން ވަނީ ބުނެފައެވެ.

ސީޑީސީގެ އުސޫލަށް ގެނައި ބަދަލާ ގުޅިގެން ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފައިވަނީ، އެ ޖަމިއްޔާގެ އެއްވެސް އުސޫލަކަށް ބަދަލު ގެނެސްފައި ނުވާކަމަށެވެ. ވައިގެ ޒަރިއްޔާއިން ބަލި ފެތުރޭ ގޮތާ ގުޅިގެން ޑަބްލިޔުއެޗްއޯގެ އުސޫލުގައި ވަނީ، ވައި ދައުރުނުވާ ގޮތަށް ހުންނަ ބަންދު ތަންތަނުގެ ތެރޭގައި ގައިދުރުކަން ނުބަހައްޓާނަމަ ބަލި ފެތުރުމުގެ ފުރުސަތު އެބައޮތް ކަމަށެވެ.