ޖަނަވާރުންގެ ވެކްސިން އުފައްދަ ޗައިނާގެ ސަރުކާރު ހިއްސާވާ ބަޔޯ ޕާމަސޫޓިކަލް ޕްލާންޓަކުން މިދިޔަ އަހަރު ލީކްވި ބޭކްޓީރިއާ ބައްޔަކަށް އެ ގައުމުގެ ހުޅަނގު އުތުރުގެ ހާހެއްހާ މީހުން ޕޮޒިޓިވްވެއްޖެ އެވެ.
ލަންޖޯ ސިޓީގެ އޮފިޝަލުން ވިދާޅުވީ، ޖަނަވާރުންނާއި ޖަނަވާރުގެ މަހުގެ ބާވަތްތަަކާއި ކްލޯސް ކޮންޓެކްޓުވުމުން ޖެހޭ ''ބްރީސަލޯސެސް'' ބަލި 3245 މީހަކަށް ޖެހިފައިވާ ކަމަށެވެ. މި ބަލީގެ އަލާމަތްތަކުގެ ތެރޭގައި ހުން އައުމާއި، ހުޅުހުޅުގައި ރިއްސުމުގެ އިތުުރުން ބޮލުގައި ރިއްސުން ހިމެނެއެވެ.
މި ބައްޔަށް އެންމެ ފުރަތަމަ ޕޮޒިޓިވްވެފައިވަނީ 1401 މީހުން ކަމަށް ހެލްތް އޮފިޝަލުންނާއި ހަވާލާދީ ނޫސްތަކުން ރިޕޯޓް ކުރެއެވެ. އެކަމަކު މިހާތަނަށް އެކަކުގެ ގައިން އަނެކަކުގެ ގަޔަށް ބަލި އަރާފައިވާ ކަމުގެ ހެއްކެއް ނެތް ފެންނަން ކަމަށް ސިއްހީ އޮފިޝަލުންނާއި ހަވާލާދީ މީޑިއާތަކުން ވަނީ ރިޕޯޓް ކޮށްފައެވެ.
ޗައިނާގެ އޮފިޝަލުންނަށް ވަނީ ބަޔޯފާމަސޫޓިކަލް ޕްލާންޓް ތެރޭގައި ޖަނަވާރުންނަށް ދޭން ބޭނުން ކުރާ ބްރުސަލާ ވެކްސިންގެ މުއްދަތު ހަމަވެފައި ހުރި ޑިސްއިންފެކްޓެންޓްތަކެއް ފެނިފައެވެ. މި ބޭނުން ކޮށްފައިވަނީ މިދިޔަ އަހަރުގެ ޖުލައި މަހާއި އޮގަސްޓު މަހާ ދެމެދުއެވެ. އެހެން ކަމުން ފެކްޓްރީން ބެކްޓީރިއާ އެއްކޮށް ނައްތާ ނުލެވޭ ކަމަށް އޮފިސަރުންނަށް ގަބޫލު ކުރެވެއެވެ.
