'ހަރިކޭން ސެލީ' ގެ ސަބަބުން ބޮޑެތި ގެއްލުން ތަކެއް އެމެރިކާގެ ސްޓޭޓް ތަކަކަށް ވެއްޖެއެވެ.
އެމެރިކާއަށް މިހާރު ކުރަމުންދާ ވިއްސާރައިގަ މި ތޫފާން ވަނީ ކެޓަގަރީ 1ން ކެޓަގަރީ 2ގެ ތޫފާނަކަށް ބަދަލުވެފައެވެ. މި ތޫފާނުގެ ސަބަބުން އަލަބާމާ އަދި ފްލޮރިޑާ އަށް ދަނީ ގިނަ ގެއްލުން ތަކެއް އަންނަނީ ލިބެމުންނެވެ.
ފްލޮރިޑާއިން 377 މީހުން ވަނީ ސަލާމަތްތެރި ހިސާބުތަކަށް ގެންގޮސްފައެވެ. ފެންބޮޑުވުމާ މަގުތަށް ހަލާކު ވުމުގެ ސަބަބުން އަލަބާމާގައި ހިނގާ ބިނގާވެ އުޅުމަށާއި ދަތުރު ފަތުރު ކުރުމަށް ދަނީ ގިނަ ގޮންޖެހުންތަކާ ކުރިމަތި ވަމުންނެވެ. މި ތޫފާނުގައި އެކަކު މަރުވެފައިވާއިރު ގިނަބައެއްގެ ގެދޮރަށް ގެއްލުންވެ، ވަނީ ހާލުގައި ޖެހިފައެވެ.
މީގެ އިތުރު ފްލޮރިޑާގެ ބޭ ބްރިޖަށްވަނީ ބޮޑެތި ގެއްލުންތަކެއް ލިބިފައިވާއިރު އެ ސްޓޭޓްގެ ފަޔަރ ޗީފް ގިނީ ކްރޭނޯ ސީއެންއެން އަށް މައުލޫމާތު ދެއްވަމުން ވިދާޅުވީ ހަތަރު މަސް ދުވަހު ވެހޭހާ ވާރޭ ހަތަރު ދުވަހުގެ ތެރޭގައި ވެހިފައިވާ ކަމަށެވެ. ވާރޭ ވެހުމުގެ ސަބަބުން އެ ސްޓޭޓްގެ ބޮޑު ބައެއްގައި ވަނީ ފެންބޮޑުވެފައެވެ.
މިހާރު މި ތޫފާން މަޑުމަޑުން މިސްރާބު ޖަހާފައިވަނީ ޖޯޖިއާގެ އިތުރުން ކެރޮލިނާގެ ދެކުނާ ދިމާލަށެވެ. އެ ޤައުމުގެ މޫސުމާ ބެހޭ އިދާރާތަކުން ބުނީ މި ތޫފާނުގެ ސަބަބުން އިތުރު ގެއްލުންތައް ލިބޭނެ ކަމަށް ބެލެވޭ ކަމަށެވެ. އެ ސަރަހައްދަށް ލިބިފައިވާ ގެއްލުންތައް ބަލަން އާންމުން ނުދިއުމަށް ވެސް އެ ޤައުމުގެ ފުލުހުން ދަނީ އިލްތިމާސް ކުރަމުންނެވެ.
