ދެކުނު އެފްރިކާގެ ލޮކްޑައުންއަށް ގިނަ ލުއިތަކެއް ދޭން ނިންމައިފިއެވެ.

ދެކުނު އެފްރިކާ އަކީ ކޮވިޑް-19 ފެތުރުން ހުއްޓުވުމަށް ވަރުގަދަ ފިޔަވަޅުތަކެއް އެޅި ގައުމެކެވެ. އެ ގައުމުން ވަނީ ލޮޮކްޑައުންއަކަށް ދިއުމުގެ އިތުރުން ހަރުކަށި ފިޔަވަޅުތަކެއް އަޅާފައެވެ. ނަމަވެސް ސެޕްޓެމްބަރު 20 ފެށިގެންް އެ ގައުމުގެ ލޮކްޑައުންއަށް ލުއިތަކެއް ދިނުމަށް ނިންމާފައިވާއިރު އެ މާހައުލެއްގެ 50 އިންސައްތައަށް ވުރެ މީހުން މަދުނަމަ، އެއްވެ އުޅެވޭނެކަމަށް ވަނީ ނިންމާފައެވެ.

އެ ގައުމުގެ ރައީސް ސިރިލް ވިދާޅުވެފައިވަނީ ކޮވިޑްގެ މި ތޫފާނުގައި ބެހިގެން ނުގޮސް ސަލާމަތުގެ އައްސޭރީގައި ތިބެވުނުކަމަށެވެ. އަދި މިއީ ގައުމު ކުރީގެ ހާލަތަށް ގެންނަން ވީ ވަގުތު ކަމަށާ ކޮވިޑްގެ މި "ޕެންޑެމިކް" އޮތް ހާ ހިނދަކު ނިއު ނޯމަލް އާއެކު ކުރިއަށް ދާންވީ ވަގުތު ކަމުގައެވެ. އަދި ލެވެލް 2 ކުން ލެވެލް 1ށް ސެޕްޓެމްބަރު 20 ފެށިގެން ގައުމުގެ ހާލަތު ބަދަލު ކުރާނެ ކަމަށްވެސް އެޕްރިކާގެ ރައީސް ސިރިލް ވިދާޅުވިއެވެ.

އެ ގައުމު ލޮކްޑައުން އަކަށް ގޮސްފައިވަނީ 27 މާރިޗު ގައެވެ. އަދި ދޭން ނިންމާފައިވާ ލުއިތަކަށް ބަލާއިރު ޖަނާޒާތަކުގައި ބައިވެރި ވެވޭ މީހުންގެ އަދަދު ވަނީ 50ން 100ށް އިތުރުކޮށްފައެވެ. އަދި ކާފިއު ހިންގުމަށް ހަމަ ޖެހިފައިވަނީ މިހާރު ކާފިއު ހިންގާ ގަޑީގެ ދެ ގަޑިއިރު ފަހުންނެވެ. މީގެ އިތުރުންވެސް ކުދި ކުދި އިތުރު ލުއިތަކެއް ދިނުމަށްވަނީ ނިންމާފައެވެ.

ދެކުނު އެފްރިކާއިން ޖުމްލަ 650,000 ކޭސް ރިޕޯޓު ކޮށްފައިވާއިރު 15,000 ވުރެ ގިނަ މީހުންވަނީ ކޮވިޑްގެ ސަބަބުން މަރުވެފައެވެ. ނަމަވެސް އެ ގައުމުގައި ކޭސްތައް ރިޕޯޓުކުރާ މިންވަރު ދަނީ ދުވަހެއް ދުވަހަކަށް މަދުވަމުންނެވެ.