އިންޑިޔާގައި އަނެއްކާވެސް ރިކޯޑް މިންވަރަކަށް އެއް ދުވަހާ މީހުންނަށް ކޮވިޑް-19 ޖެހިގެން ރިޕޯޓްކޮށްފިއެވެ.

އިންޑިޔާގެ ހެލްތު މިނިސްޓްރީން ބުރާސްފަތި ދުވަހު ހާމަކޮށްފައިވާ އަދަދުތަކަށް ބަލާލާއިރު ފާއިތުވި 24 ގަޑިއިރު ތެރޭގައި އެގައުމުގެ 95،735 މީހުންނަށް ވަނީ ވައިރަސްޖެހިފައެވެ. މީގެ އިތުރުން އެގައުމުގައި ފާއިތުވި 24 ގަޑިއިރު ވަނީ ރިކޯޑް މިންވަރަކަށް މީހުން މަރުވެފައެވެ. އެއީ 1172 މީހުންނެވެ.

ޖުލައި މަހުގެ ފަހުން އެއް ދުވަހާ އެންމެ ގިނަ މީހުން މި ބަލީގައި މަރުވެގެން މީގެކުރިން ރިޕޯޓް ކޮށްފައިވަނީ މިސެޕްޓެމްބަރ މަހުގެ 8 ވީ އަންގާރަ ދުވަހުއެވެ. އެއީ 1133 މީހުންނެވެ. އޭގެ އެއް ދުވަސް ފަހުން އަނެއްކާވެސް މިވަނީ ރިކޯޑް މިންވަރަކަށް އެގައުމުގައި އެއް ދުވަހާ މީހުން މަރުވެގެން ރިޕޯޓްކޮށްފައެވެ.

އިންޑިޔާ އަކީ މިވަގުތު މުޅި ދުނިޔޭގައިވެސް އެންމެ ހަލުވި މިނުގައި ވައިރަސް ފެތުރެމުންދާ ގައުމެވެ. ދުނިޔޭގައި ދެވަނައަށް އެންމެ ގިނަ މީހުންނަށް ވައިރަސް ޖެހިގެން ރިޕޯޓް ކުރަމުން އަންނަ ގައުމަށް އިންޑިއާ ވެގެން ގޮސްފައިވަނީ ސެޕްޓެމްބަރ މަހުގެ 7 ވީ ހޯމަ ދުވަހުއެވެ. ބްރެޒިލް ވައްޓާލުމަށްފަހު އިންޑިއާ ދެވަނައަށް އެންމެ ގިނަ މީހުންނަށް ވައިރަސް ޖެހޭ ގައުމަށް ވީނަމަވެސް އެ ގައުމުގައި މި ހަފްތާ ފެށުނުއިރު ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު ވަނީ ދަށަށް ދާން ފަށާފައެވެ.

އެގޮތުން މީގެ ހަފްތާއެއް ކުރިން އެ ގައުމުގައި ދުވާލެއްގެ މައްޗަށް އަށްޑިހަހާހަށްވުރެ ގިނަ މީހުންނަށް ވައިރަސް ޖެހިގެން ރިޕޯޓްކުރަމުން އައި ނަމަވެސް މިހަފްތާ ކުރީކޮޅު ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު ވަނީ ހަތްދިހަހާހަށް އަރާފައެެވެ. އެހެންނަމަވެސް ބުރާސްފަތި ދުވަހު މިވަނީ އަނެއްކާވެސް ރިކޯޑް މިންވަރަކަށް މީހުންނަށް ކޮވިޑް-19 ޖެހިގެން ރިޕޯޓްކޮށްފައެވެ.

އިންޑިޔާގައި މިހާރު ވައިރަސް ޖެހިފައިވާ 4.6 މިލިއަން މީހުން ތިބިއިރު އެގައުމުގައި މިބަލީގައި 75،000ށް ވުރެ ގިނަ މީހުން ވަނީ މަރުވެފައެވެ.