ވެކްސިންއާ ގުޅުވައި ގައުމިއްޔަތު އިސްނުކުރުމަށް ގައުމުތަކަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ގޮވާލައިފިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ޖަމިއްޔާގެ ޑިރެކްޓަރ ޖެނެރަލް ޓެޑްރޯސް އަދެނޯމް ވިދާޅުވީ އުއްމީދަކީ ކުރިއަށް އޮތް ދުވަސްތަކުގައި ކޮވިޑް-19 ށް ވެކްސިންއެއް ހޯދިގެން ދިއުން ކަމަށެވެ.
ޓެޑްރޯސް ވަނީ ވެކްސިންއެއް އުފެއްދިއްޖެނަމަ، އެ ރަނގަޅު ގޮތުގައި ބޭނުން ކުރުމާއި ގުޅޭ ގޮތުން އޭނާގެ ވާހަކައިގައި އަލި އަޅުއްވާލައްވާފައެވެ. އެގޮތުން، ވެކްސިންގެ ޕްރޮޑަކްޝަން ދަށް ހާލަތްތަކުގައި ވެކްސިން ދިނުމުގައި އިސްކަން ދޭން ޖެހޭނީ ސިއްހީ ހިދުމަތްތެރިންނާއި، ހައި ރިސްކު ބަލި މީހުންނަށް ކަމަށް އޭނާ ވިދާޅުވިއެވެ. އަދި ވަކި ގައުމަކަށް ވެކްސިން ފޯރުކޮށްދިނުމުގެ ބަދަލުގައި ހުރިހާ ގައުމަކަށް ވެސް ވެކްސިން ފޯރުކޮށް ދިނުމަށް ޓެޑްރޯސް ވަނީ ގޮވާލައްވާފައެވެ.
އެހެންނަމަވެސް، ވެކްސިންގެ ޕްރޮޑަކްޝަން އިތުރުވާ ހާލަތުގައި ހުރިހާ ގައުމުތަކަށް ވެސް ހަމަހަމަކަމާއި އެކު ވެކްސިން ލިބުމަކީ މުހިއްމު ކަމެއް ކަމަށް ޓެޑްރޯސް ވިދާޅުވިއެވެ.
އޭނާ ވިދާޅުވީ ބޮޑު އަގުގައި ވެކްސިން ނުގަނެވޭ ވަރުގެ ގައުމުތަކަށް ވެސް ވެކްސިން ފޯރުކޮށްދޭން ޖެހޭނެ ކަމަށެވެ. އަދި އެގައުމުތައް ބާކީ ކޮށްލައިފިނަމަ، ބަލީގެ ޝިކާރައަކަށް އެތައް ހާސް ބަޔަކު ވެގެންދާނެ ކަން ފާހަގަކުރައްވާ އޭނާ ވަނީ ވެކްސިންއާ ގުޅުވައި ގައުމިއްޔަތު އިސްނުކުރުމަށް ގޮވާލައްވާފައެވެ.
