ކޮވިޑް-19 އާއި ގުޅިގެން މެދުކަނޑާލި އިންޑިގޯގެ ޝެޑިއުލް ފްލައިޓްތައް އަލުން ފަށައިފިއެވެ.

އިންޑިގޯއިން އިންޑިއާ އާއި ރާއްޖެއާ ދެމެދު ޝެޑިއުލް ދަތުރުތައް އަލުން ފަށާފައިވާއިރު، ފުރަތަމަ ފްލައިޓް ވެލާނާ އިންޓަނޭޝަނަލް އެއާޕޯޓުގައި ޖައްސާފައިވަނީ ބުރާސްފަތި ދުވަހުއެވެ. އެއާއެކު ވެލާނާ އިންޓަނޭޝަނަލް އެއާޕޯޓުން ވަނީ ޝެޑިއުލް ދަތުރުތައް އަލުން ފެށުމުން އެ އެއާލައިންއަށް މަރުހަބާ ކިޔާފައެވެ.

އިންޑިގޯ އިން ރާއްޖެ އަށް ޝެޑިއުލް ދަތުރުތައް ފުރަތަމަ ފަށާފައިވަނީ 2018 ވަނަ އަހަރުގެ ނޮވެމްބަރު 15، ގައެވެ. އޭގެފަހުން ހަފްތާއެއްގެ މައްޗަށް ބާއްވާ ފްލައިޓްތައް އިތުރުކޮށް، އިންޑިއާގެ އިތުރު ބައެއް މަންޒިލްތަކަށް ވެސް ޑައިރެކްޓް ފްލައިޓްތައް އައި ބާއްވަމުންނެވެ. ނަމަވެސް ކޮވިޑް-19 އާއި ގުޅިގެން ރާއްޖޭގެ ބޯޑަރު ބަންދުކުރުމާއެކު ދަތުރުތައް އޮތީ ހުއްޓާލާފަ އެވެ.

އެ އެއާލައިންގެ ދަތުރުތައް އަލުން ފެށިއިރު، ދިވެހި ސަރުކަރާ އިންޑިއާ ސަރުކާރާ ދެމެދު ވެވުނު އެއްބަސްވުމުގެ ދަށުން ވަނީ އެ ޤައުމުގެ އެއާލައިންތަކަށް ރާއްޖެއަށް ދަތުރު ކުރުމުގެ ހުއްދަދީފައެވެ. ދެ ޤައުމުގެ އެއާލައިންތަކުން ދަތުރުތައް ފެށި ނަމަވެސް، ކޮވިޑް-19 އިން ރައްކާތެރިވުމަށް މިހާރު އަޅާފައިވާ ރައްކާތެރިކަމުގެ ފިޔަވަޅުތައް ދެ ގައުމުން ވެސް ދަމަހައްޓަމުން ގެންދާނެ އެވެ.

އެއަރ އިންޑިއާގެ ޝެޑިއުލް ދަތުރުތައް ރާއްޖެއަށް ފަށާފައިވާއިރު، އިންޑިއާ އަކީ ދެވަނަ އަށް އެންމެ ގިނަ ފަތުރުވެރިން ރާއްޖެ އަންނަ މަންޒިލެވެ.