އެމެރިކާއިން ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އަށް މިއަހަރު ދައްކަންޖެހޭ 80 މިލިއަން ޑޮލަރު ނުދައްކާނެ ކަމަށާއި އޭގެ ބަދަލުގައި އެފައިސާ ޚަރަދުކުރާނީ އދ. އަށް ނިއުޔޯކަށް ދައްކަންޖެހޭ ބިލްތައް ދެއްކުމަށް ކަމަށް އެގައުމުން ބުނެފި އެވެ.

އެމެރިކާއިން ޑަބްލިޔުއެޗްއޯއިން ވަކިވުމަށް ހަމަޖެހިފައިވަނީ އަންނަ 2021 ވަނަ އަހަރުގެ ޖުލައި މަހުގެ 6 ވަނަ ދުވަހު އެވެ. ކޮވިޑް-19 އާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ ޑަބްލިޔުއެޗްއޯއިން ޗައިނާއިން ބޭނުންވާ ގޮތަށް ކަންތައްތައް ކުރަމުންދާކަމަށް ބުނެ ޑަބްލިޔުއެޗްއޯއަށް ވަރަށް ބޮޑަށް ފާޑުވިދާޅުވަމުންނެވެ. ޑަބްލިޔުއެޗްއޯއިން އަންނަނީ ޓްރަމްޕްގެ އެތުހުމަތުތައް ދޮގުކުރަމުންނެވެ.

1948 ވަނަ އަހަރު އެމެރިކާގެ ކޮންގްރެސްއިން އެކުލަވާލާފައިވާ ރެޒޮލިޔުޝަންގެ ދަށުން ޑަބްލިޔުއެޗްއޯއިން ވަކިވުމަށް އެއް އަހަރުގެ ނޯޓިސް އެއް ދޭން ޖެހޭނެއެވެ. އަދި އެއަހަރަކު ޑަބްލިޔުއެޗްއޯއަށް ދައްކަންޖެހޭ ފައިސާ އެއަހަރަކު ދައްކަންވެސް ޖެހޭނެއެވެ.

އެމެރިކާގެ ސްޓޭޓް ޑިޕާޓްމަންޓް ބިޔުރޯ އޮފް އިންޓަރނޭޝަނަލް އޯގަނައިޒޭޝަން އެފެއަރޒް ގެ ޑެޕިޔުޓީ އެސިސްޓެންޓް ސެކެޓްރީ އޮފް ސްޓޭޓް ނެރިސާ ކުވް ވިދާޅުވީ އެމެރިކާއިން ޑަބްލިޔުއެޗްއޯއަށް 2019 ވަނަ އަހަރު ދައްކަންޖެހޭ ފައިސާގެ ތެރެއިން 18 މިލިއަން ޑޮލަރާއި މިއަހަރު ދައްކަން ޖެހޭ ފައިސާއިން 62 މިލިއަން ޑޮލަރު އަދި އެބައޮތްކަމަށެވެ.

އެހުރިހާ ފައިސާ އެއް ދެން ބޭނުންކުރާނީ އދ ގެ ކަންތައްތަކަށް ކަމަށް ނެރިސާ ވިދާޅުވިއެވެ.

ޔޫއެސް އެޖެންސީ ފޮރ އިންޓަރނޭޝަނަލް ޑިވެލޮޕްމަންޓް އެސިސްޓެންޑް އެޑްމިނިސްޓްރޭޓަރ ފޮރ ގްލޯބަލް ހެލްތު ޑރ އަލްމާ ގޯލްޑެން ވިދާޅުވީ ދުނިޔޭގެ ސިއްހަތު ޖަމިއްޔާ ،ޑަބްލިޔުއެޗްއޯއާއަށް އެގައުމުން ދެމުންގެންދިޔަ އެހީތެރިކަން ދޭނެ އެހެން ޕާޓްނަރުން ހޯދާފައިވާ ކަމަށެވެ.

އެހެންނަމަވެސް ޑަބްލިޔުއެޗްއޯއިން ލީބިޔާ އަދި ސީރިއާއިން ޕޯލިއޯ ނައްތާލުމަށް ކުރަމުންދާ މަސައްކަތަށް އެމެރިކާއިން 68 މިލިއަން ޑޮލަރު ދޭނެކަމަށް ޑރ އަލްމާ ވިދާޅުވި އެވެ.

އެމެރިކާގެ ރިޔާސީ އިންތިޚާބު ކުރިޔަށް އޮތްއިރު ޓްރަމްޕާ ވާދަކުރައްވާ ބައިޑެން ވިދާޅުވީ އިންތިޚާބުން ކާމިޔާބު ލިބިވަޑައިގެންފިނަމަ ޑަބްލިޔުއެޗްއޯއާ އަލުން ގުޅޭނެކަމަށެވެ.