މަޝްހޫރު ވީޑިއޯ ގޭމް ޕަބްޖީ ހިމެނޭ ގޮތަށް ޗައިނާގެ 118 މޯބައިލް އެޕްލިކޭޝަނެއް އިންޑިޔާގައި ބޭނުން ކުރުން މަނާކޮށްފިއެވެ.
ޤައުމީ ސަލާމަތަށް ނުރައްކާ ވާކަމަށް ބުނެ އިންޑިޔާ އިން ޗައިނާގެ މޯބައިލް އެޕްލިކޭޝަންތަކެއް އެ ގައުމުގައި ބޭނުން ކުރުން މަނާކޮށްފައިވާއިރު މީގެކުރިން ވެސް އިންޑިޔާއިން ވަނީ ޗައިނާގެ މޯބައިލް އެޕްތަކެއް އެ ގައުމުގައި ބޭނުން ކުރުން މަނާކޮށްފައެވެ. ޖޫން މަހު އިންޑިޔާ އިން ޗައިނާގެ 59 މޯބައިލް އެޕެއް ބޭނުން ކުރުން މަނާކުރިއިރު އޭގެތެރޭގައި އިންޑިޔާގެ ގިނަ ބަޔަކު ބޭނުން ކުރަމުންދިޔަ ޓިކްޓޮކް ވެސް ހިމެނެއެވެ.
އިންޑިޔާއިން ޗައިނާގެ މޯބައިލް އެޕް އެ ގައުމުގައި ބޭނުން ކުރުން މަނާކުރަމުން މިދަނީ ބޯޑަރުގެ މައްސަލާގައި ދެ ގައުމުގެ ގުޅުމަށް ނުތަނަވަސްކަން ވެރިވަމުން އަންނަ ދުވަސްވަރެއްގައެވެ.
ހިމާލިޔަން ބޯޑަރުގެ މައްސަލާގައި ދެ ގައުމުގެ މެދުގައި ބަހުގެ ހޫނު ހަމަލާތަކެއް ބަދަލުކޮށް ދެ ގައުމުގެ ގުޅުމަށް ވަނީ ވަރަށް ބޮޑަށް އަސަރު ކޮށްފައެވެ.
ޖޫން މަހުގެ 20 ވަނަ ދުވަހު އިންޑިޔާ ސިފައިންގެ 20 މީހަކު ވަނީ އެ ސަރަހައްދުގައި މަރުވެފައެވެ. އަދި ދާދިފަހުން ވެސް އިންޑިއަން ސްޕެޝަލް ފޯސެސް މެމްބަރުންގެ ތެރެއިން ބަޔަކު ވަނީ މަރުވެފައެވެ. ޗައިނާގެ އަސްކަރިއްޔާގެ ބަޔަކު މަރުވެފައިވާއިރު އެއީ ކިހާ އަދަދެއްގެ ބައެއްކަން ހާމަކޮށްފައެއް ނުވެއެވެ.
ޕަބްޖީ އަކީ ދެކުނު ކޮރެއާއިން އުފައްދާފައިވާ ވީޑިއޯ ގޭމެއް ނަމަވެސް އޭގެ މޯބައިލް އެޕްލިކޭޝަން އުފައްދާފައިވަނީ ޓެންސެންޓުންނެވެ.
އިންޑިޔާގެ މިނިސްޓްރީ އޮފް އިލެކްޓްރޯނިކްސް އެންޑް އިންފޮރމޭޝަން ޓެކްނޮލޮޖީން ބުނެފައިވަނީ މި ފިޔަވަޅިތަކަކީ އިންޑިޔާގެ ސަލާމަތާއި ރައްކާތެރި ކަމަށް ކޮންމެހެން އަޅަންޖެހޭ ފިޔަވަޅުތަކެއް ކަމަށެވެ. އެގޮތުން މި އެޕްލިކޭޝަންތަކުން އެޕްލިކޭޝަން ބޭނުން ކުރާ މީހުންގެ މައުލޫމާތު ވަގަށް ނަގަމުންދާ ކަމަށް އިންޑިޔާ އިން ބުނެއެވެ.
