ކަރިޝްމާ ކަޕޫރުގެ ކުރީގެ ފިރިމީހާ ސަންޖޭ ކަޕޫރު އިތުރު ކައިވެއްޏެއް ކޮށްފިއެވެ. އިންޑިއާގެ ނޫސްތަކުގައި ބުނެފައިވަނީ ސަންޖޭ ކައިވެނި ކޮށްފައިވަނީ އޭނާ ފަސް އަހަރު ވަންދެން ރައްޓެހިވެގެން އުޅުނު މޮޑެލް ޕްރިޔާ އާއެވެ.
އެ ކައިވެނީގެ ހަފްލާ ބާއްވާފައިވަނީ ވަރަށް އާދައިގެ ގޮތަކަށް ކަމަށްވެއެވެ. އަދި ދައުވަތު ދީފައިވަނީ ހަމައެކަނި ދެ ފަރާތުގެ އާއިލާގެ މީހުންނަށާއި ވަރަށް ގާތް ރައްޓެހިންތަކަށެވެ.
ސަންޖޭއާއި ކަރިޝްމާ ވަރިވެފައިވަނީ، ސަންޖޭ ބޭވަފާތެރިވިކަމަށް ބުނެ އިންޑިއާގެ ކޯޓުގައި ކަރިޝްމާ ހުށައަޅާފައިވާ މައްސަލައަށް އެތަކެއް ދުވަހެއް ވެފައިވަނިކޮށެވެ.
އޭރު ސަންޖޭ ރައްޓެހިވެގެން އުޅުނުކަމަށް އަޑުތައް ފެތުރިފައިވަނީ ސަންޖޭ ކައިވެނިކުރި ޕްރިޔާއާއެވެ. ކަރިޝްމާ އާއި ސަންޖޭ ކައިވެނިކޮށްފައިވަނީ 29 ސެޕްޓެމްބަރު 2003ގަ އެވެ. ކައިވެނީގެ ކުރީކޮޅުން ފެށިގެން ހިލޭ އަންހެނުންނާއި ސަންޖޭ އާއި ގުޅުން އޮންނަ ކަމަށް ބުނެ މިދެމީހުން ދެމެދުގައި މައްސަލަތައް ޖެހިފައިވެއެވެ.
މިއީ ސަންޖޭގެ ތިން ވަނަ ކައިވެންޏެވެ. އަދި ޕްރިޔާގެ ދެވަނަ ކައިވެންޏެވެ. ސަންޖޭ އާއި ކަރިޝްމާ ކައިވެނި ކުރީ އަލަށެވެ. ކަރިޝްމާއާއި ސަންޖޭއަށް ވަނީ ދެ ކުދިން ލިބިފައެވެ. ކަރިޝްމާ އާއި ސަންޖޭ ވަރިވުމާއި ބެހޭގޮތުން އެއްބަސްވުމަކަށް އައިސްފައިވަނީ މިދެމީހުންގެ ދެދަރިން ކަރިޝްމާ ކައިރީގައި ތިބުމަށާއި ސަންޖޭ އަށް ދަރިންނާއި ބައްދަލުކުރެވޭ ގޮތަށެވެ.
އަދި ޕްރިޔާއަށް ވަނީ އޭނާ ކުރިން ހޮޓެލް ހިންގާ ވިކްރަމް ޗަތުވަލް އާއިއެކު ކުރި ކައިވެންޏަށް ކުއްޖަކު ލިބިފައެވެ. ސަންޖޭ ފުރަތަމަ ކުރި ކައިވެންޏަކީ ފެޝަން ޑިޒައިނަރ ނަންދިތާ މަހްތާނީ އާ ކުރި ކައިވެންޏެވެ.އެ ކައިވެނި ރޫޅުނީ 2003 ވަނަ އަހަރު އެވެ.
