ރާއްޖޭގައި ގާނޫނީ ގޮތުން އުފެދިފައިވާ ސަރުކާރު ވައްޓާލުމަށް މާ ވަރުގަދަ ސައްލާތަކެއް ކުރީގެ ޕޮލިސް ކޮމިޝަނަރަކާއި މަޝްހޫރު ވިޔަފާރިވެރިއަކު ހިންގަމުން ގެންދާ ކަމުގެ މައުލޫމާތު ރާއްޖެއެމްވީއަށް ވަރަށް އިތުބާރު ހުރި ގޮތެއްގައި ލިބިއްޖެއެވެ.
ޔާމީން އަބްދުލް ގައްޔޫމުގެ ކަރަޕްޓް ޚުދުމުޚުތާރު ވެރިކަން ނިމުމަކަށް ރައްޔިތުން ގެނެސް، ރައްޔިތުންގެ ބޮޑު އަޣުލަބިއްޔަތާއެކު ވެރިކަމަށް އިސްކުރެވުނު ރައީސް އިބްރާހިމް މުހައްމަދު ސޯލިހްގެ ވެރިކަމަށް އަދި ދެ އަހަރު ނުފުނެރީސް ވެރިކަން ހޯދޭނެ ގޮތެއް ނެތިގެން ކެތް މަދުވެފައި ތިބި ބަޔަކު މި ސައްލާތައް ކުރަނީ ވަރަށް ސިއްރިއްޔާތުގައި ކަމަށް ރާއްޖެއެމެވީއަށް އެނގިފައިވެއެވެ.
ރައީސް ސޯލިހުގެ ވެރިކަން ވައްޓާލުމަށް މަޝްވަރާ ކުރުމުގައި އިސްކޮށް އުޅޭ ޕޮލިސް ކޮމިޝަނަރކަން ކޮށްފައިވާ މީހާ އާއި، ވިޔަފާރީގައި ޒަމާނުއްސުރެ އުޅެމުންދާ މީހަކީ މީގެ ކުރިންވެސް މިފަދަ ރެކޯޑްތައް އޮތް ދެމީހުންކަން ލިބިފައިވާ މައުލޫމާތައް ބަލާއިރު ފާހަގަ ކުރެވެއެވެ.
މި ދެމީހުންގެ ބައްދަލުވުންތަކާ ބެހޭ މައުލޫމާތު، މިކަން ވަރަށް ގާތުން އެނގޭ މީހާ ރާއްޖެއެމްވީއަށް ހިއްސާ ކުރީ މީގެ ދެތިން ދުވަސް ކުރިންނެވެ.
ގާނޫނުގެ އިމުގެ ބޭރުން ވެރިކަން ވައްޓާލުމަށް ކުރާ މަޝްވަރާތަކުގައި ބައިވެރިވާ ކުރީގެ ޕޮލިސް ކޮމިޝަނަރު ގެންދަނީ އޭނާ އަޑީގައި ހުރުގެން ރައްޔިތުންގެ މެދުގައި ސަރުކާރާ މެދު ރުޅިވެރިކަން އުފެއްދުމުގެ ގޮތުން ދޮގު ވާހަކަތއް ފެތުރުމުގައި އިސްދައުރެއް އަދާކުރަމުން ކަމަށްވެސް ރާއްޖެއެމްވީއަށް ވަނީ އެނގިފައެވެ.
ރާއްޖޭގައި އުފެދުނު އެމްޑީޕީގެ ފުރަތަމަ ސަރުކާރުގެ ރައީސް، މުހައްމަދު ނަޝީދު މަގާމުން އިސްތިއުފާ ދެއްވީ، ފުލުހުންނާއި ސިފައިންގެ ބަޔަކު ސަރުކާރާ ދެކޮޅަށް ހިންގި ބަޣާވާތެއްގެ ސަބަބުންނެވެ. އެފަހަރުގެ އެ ހާދިސާގެ ފަހަތުގައިވެސް އޭރު ފުލުހުންގެ ޚިދުމަތުން ދުރުކޮށްފައިވާ ބައެއް ފަރާތްތަކުން އެކަން ރޭވުމުގައި ބައިވެރިވި ކަމަށް ވެއެވެ. އަދި މަޝްހޫރު ފެބްރުއަރީ 7 ގެ ހާދިސާގައި އަމަލީ ގޮތުން ބައިވެރިވި ބައެއް ފުލުހުން ތިބީ މިހާރު ފުލުހުންގެ ޚިދުމަތުގެ ވަރަށް އިސް ސަފުގައިކަންވެސް ފާހަގަ ކުރެވެއެވެ. ފެބްރުއަރީ 7 ގެ ހާދިސާގެ އަޑީގައިވެސް ތަނަވަސްކަން ހުރި ބައެއް ވިޔަފާރިވެރިން ތިބި ކަމަށް މައުލޫމާތު ލިބިފައިވެއެވެ.
