ދުނިޔޭގައި ހަލުވިކަމާއި އެކު ފެތުރެމުންދާ ކޮވިޑް-19 އާއި ގުޅިގެން ސްރީލަންކަން އެއަރލައިންއާއި އިތުރު އެއަރލައިންތަކުން ޗައިނާއަށް ކުރާ ދަތުރުތައް މެދުކެނޑުމަށް އެ ގައުމުގެ ސިވިލް އެސޯސިއޭޝަން އެތޯރިޓީން އަންގައިފިއެވެ.

ޗައިނާގެ ސިވިލް އޭވިއޭޝަން އެތޯރިޓީއާއި ހަވާލާދީ ބައިނަލްއަގްވާމި މީޑިއާތަކުގައި ރިޕޯޓުކޮށްފައިވާ ގޮތުން، އިއްތިހާދު އެއަރވޭސް، ޗައިނާ އީސްޓަރން އެއަރ ލައިންސް އަދި ސްރީލަންކަން އެއާރލައިންސްއިން ޗައިނާގެ އެންމެ ބޮޑު ސިޓީ އަދި އިގްތިސާދީ މައި ހަބު، ޝެންހާއީއަށް ކުރާ ދަތުރުތައް ވަގުތީގޮތުން މެދުކަނޑާލުމަށް ވަނީ އަންގާފައެވެ. މިގޮތަށް ނިންމީ، އެ އެއާރލައިންތަކުން އައި ގިނަ އަދަދެއްގެ ފަސިންޖަރުން ކޮވިޑް-19 އަށް ޕޮޒިޓިވްވުމާއި ގުޅިގެންނެވެ.

މީޑިއާ ރިޕޯޓުތައް ބުނާގޮތުން، އޯގަސްޓް މަހުގެ 3 ވަނަ ދުވަހު އިއްތިހާދު އެއަރވޭސްއިން ޝެންހާއީއަށް ދަތުރުކުރި ފްލައިޓަކުން 6 ފަސިންޖަރުން ޕޮޒިޓިވްވެފައިވެއެވެ. އަދި، އޮގަސްޓް މަހުގެ 5 ވަނަ ދުވަހު ޗައިނާ އީސްޓަރން އެއަރ ލައިންސްއިން ދަތުރުކުރި ފަސިންޖަރުންގެ ތެރެއިންވެސް 6 މީހަކު ވަނީ ޕޮޒިޓިވްވެފައެވެ. އަދި އޯގަސްޓް މަހުގެ 7 ވަނަ ދުވަހު ސްރީލަންކަން އެއާރލައިންސްއިން ޝެންހާއިއަށް ދަތުރުކުރި ފްލައިޓެއްގައި ތިބި 23 ފަސިންޖަރަކު ވަނީ ކޮވިޑަށް ޕޮޒިޓިވްވެފައެވެ.

އިއްތިހާދު އެއަރވޭސް، ޗައިނާ އީސްޓަރން އެއަރ ލައިންސްގެ ސަސްޕެންޑް ކުރީ އެއް ހަފްތާއަށެވެ. އަދި ސްޕެންޝަން އޯގަސްޓް މަހުގެ 17 ވަނަ ދުވަހު ނިމޭއިރު ސްރީލަންކަން އެއަރލައިންސްގެ ދަތުރުތައް ސަސްޕެންޑް ކޮށްފައިވަނީ 4 ހަފްތާއަށެވެ. ޗައިނާގެ ސިވިލް އޭވިއޭޝަން އެތޯރިޓީން އާންމުކޮށްފައިވާ ގަވާއިދު ބުނާގޮތުން، އެ ގައުމަށް ދަތުރުކުރާ އެއާރލައިންތަކުން އެއްވެސް ފަސިންޖަރަކު ވިދިވިދިގެން 3 ހަފްތާއަށް ޕޮޒިޓިވް ނުވާނަމަ، އެ ގައުމަށް ހަފްތާއަކު ކުރާ ޝެޑިއުލް ދަތުރު ތަކުުގެ އަދަދުތައް 2އަކަށް އިތުރުކުރުމަށް ހުއްދަ ދެވޭނެއެވެ.

ނަމަވެސް، އެތެރެވާ ފަސިންޖަރުންގެ ތެރެއިން 5 މީހުން ނުވަތަ އެއަށް ވުރެން މަދުން ޕޮޒިޓިވް ވެއްޖެނަމަ، ހަފްތާއެއްގެ ސަސްޕެންޝަން އެ އެއަރލައިންއަކަށް ކުރާނެއެވެ. އަދި ޕޮޒިޓިވްވާ މީހުންގެ އަދަދު 10ށް އަރައިފިނަމަ 4 ހަފްތާގެ ސަސްޕެންޝަނެއް އަންނާނެއެވެ. ޗައިނާގެ ސިވިލް އޭވިއޭޝަނުން ދަނީ އެ ގައުމަށް އިމްޕޯޓުވާ ކޭސްތައް މަދުކުރުމަށް ހަރުދަނާ ފިޔަވަޅުތަކެއް އަޅަމުންނެވެ.