ދުބާއީން ފުރައިގެން ކަލިކަޓަށް ދަތުރުކުރަމުންދިޔަ އެއަރ އިންޑިޔާގެ ބޯޓެއް ރަންވޭއަށް ޖައްސަން އުޅުމުގެ ތެރޭގައި ވެއްޓި އޭގައި ތިބި މީހުންގެ ތެރެއިން 3 މީހުން މަރުވެއްޖެއެވެ.
މަރުވި މީހުންގެ ތެރޭގައި ބޯޓު ދުއްވަން އިން ޕައިލެޓް ވެސް ހިމެނޭކަމަށް މީޑިޔާ ރިޕޯޓްތައް ބުނެއެވެ. މިބޯޓުން 170 މީހުން ދަތުރުކުރިކަމަށް ދަ އިންޑިޔަން އެކްސްޕްރެސް އިން ބުނެއެވެ. ގިނަ ބަޔަކު ޒަޚަމްވެފައިވާއިރު ޒަޚަމްވެފައިވާ ސީދާ އަދަދެއް އަދި ހާމަވެފައެއް ނުވެއެވެ. މިބޯޓު ޖައްސަން އުޅުނީ ދެކުނު އިންޑިޔާގެ ކެރެލާ ސްޓޭޓްގެ ކަލިކަޓަށް ކަމަށް މައުލޫމާތު ލިބެއެވެ.
މިބޯޓު ވެއްޓުމާއެކު ދެ ބައިވެގެން ދިޔަކަމަށް މަންޒަރުދުށް މީހުންނާ ހަވާލާދީ ދަ އިންޑިޔަން އެކްސްޕްރެސް އިން ބުނެއެވެ. ބޯޓު ޖައްސަން މަސައްކަތްކޮށްފައިވަނީ ގަދައަށް ވާރޭވެހެނިކޮށެވެ. އެހެންކަމުން ބޯޓު ވެއްޓުމާއެކު ކައްސާލައިގެން ކައިރިމަގާ ހިސާބަށް ދިޔަކަމަށް އިންޑިޔަން އެކްސްޕްރެސް އިން ރިޕޯޓްކޮށްފައިވެއެވެ.
