އިޖުތިމާއީ ގައިދުރުކަން ބަހައްޓަން ޖެހޭނީ ހަމައެކަނި މަގުމަތީގައި ހިނގާބިނގާވެ އުޅޭ ވަގުތުތަކުގައި ނޫން ކަމަށާއި، ސައިކަލާއި ބައިސްކަލުގައި އުޅޭ އިރުވެސް ގައިދުރުކަން ބަހައްޓަން ޖެހޭ ކަމަށް ޑރ. މުހައްމަދު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އެތެރެހަށީގެ ޑޮކްޓަރު، ޑރ. މުހައްމަދު އަލީ ވަނީ ރާއްޖެއިން ފެންނަ ކޮވިޑް ކޭސްތައް އިތުރުވާން މެދުވެރިވާ ސަބަބުތަކާ ގުޅޭގޮތުން ވާހަކަދައްކަވާފައެވެ. އެގޮތުން ރައްޔިތުންނަށް ދެވިފައިވާ އިރުޝާދާ އެއްގޮތަށް އަމަލުނުކުރުމަކީ، އެއް ސަބަބު ކަމަށް ވިދާޅުވިއެވެ. އެގޮތުން، ތޮއްޖެހިފައިވާ މާލޭގެ މަގުތަކުގައި އުޅޭ ވަގުތު ގައިދުރުކަން ނުބަހައްޓާ މަންޒަރު ފެންނަކަން ފާހަގަކުރައްވާ އެކަން އެހެން ނުކުރުމަށް ޑރ. މުހައްމަދު އަލީ ރައްޔިތުންނަށް ނަސޭހަތްތެރިވިއެވެ.
ސައިކަލު މަތީގައޭ މި އިނދެވެނީ ހިތަށް އަރާފަ، އެ އިންނަ ދުރުކަމެއް ނުބެހެއްޓޭހެން އަަޅުގަނޑަށް ހީވަނީ. ވަރަށް ގިނައިން ފެންނަމުންދޭ. ހަމައެކަނި ހިނގާއިރެއް ނޫން ގައިދުރުކަން ބަހައްޓަން ޖެހެނީ. އޯޕަން ވެހިކަލްތަކުގައި، ބައިސްކަލް ނޫނީ ސައިކަލުގައި އުޅޭ އިރުވެސް ގައިދުރުކަމެއް ބަހައްޓަން ޖެހޭ އެއް ބަޔަކު އަނެއް ބަޔަކާ ދޭތެރޭ.އައިޖީއެމްއެޗްގެ އެތެރެހަށީގެ ޑޮކްޓަރު، ޑރ. މުހައްމަދު އަލީ
މާލެ ސަރަހައްދުގެ ފުރަބަންދު ހާލަތަށް ލުއިތައް ދިނުމުގެ ތިންވަނަ މަރުހަލާ އިއުލާނުކުރި ފަހުން، ކޮވިޑަށް ޕޮޒިޓިވްވެގެން ރިޕޯޓްކުރެވޭ އަދަދުތައް ވަނީ އިތުރުވެފައެވެ. އެގޮތުން ނިމިދިޔަ ދެ ހަފުތާގެ ތެރޭގައި ރެކޯޑް އަދަދަކަށް ޕޮޒިޓިވް ކޭސްތައް ރިޕޯޓްކުރެވުނެވެ.
ޑރ. މުހައްމަދު އަލީ ވަނީ ބަލީގެ ނުރައްކާ އަދިވެސް ފިލައިގެން ނުދާކަމަށް ވިދާޅުވެ ކުރިން ދެވުނު އިރުޝާދުތައް ތަކުރާރުކޮށްފައެވެ. އެގޮތުން ޒަރޫރީ ބޭނުމެއްގައި މެނުވީ ބޭރަށް ނުދިއުމަށާއި، ގެއަށް ވަނުމަށް ފަހު އަތް ދޮވުމަށާއި، ހުރިހާ ވަގުތަކެއްގައި ގައިދުރުކަން ބެހެއްޓުމަށް ވަކިން ހާއްސަ ސަމާލުކަމެއް ބެހެއްޓުމަށް އިލްތިމާސްކުރެއްވިއެވެ.
