ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއި ހިލާފަށް ހިންގި 50 ތަނެއް ބުރާސްފަތި ދުވަހު ބަންދުކޮށްފައިވާކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
ބުރާސްފަތި ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި މިހާރު އެޗްޕީއޭއިން ކުރިޔަށް ގެންދާ އިންސްޕެކްޝަންގެ މައުލޫމާތު ދެއްވަމުން އެ ސެންޓަރުގެ ތަރުޖަމާން ޑރ. ނަޒްލާ ރަފީގް ވިދާޅުވީ ބުރާސްފަތި ދުވަހު 99 ތަނެއް އިންސްޕެކްޓް ކުރިކަމަށެވެ. މީގެތެރޭގައި ކާބޯތަކެތި ޚިދުމަތްދޭ 45 ތަނަކާއި 5 ސެލޫން، އަދި 49 ފިހާރަ ހިމެނޭ ކަމަށެވެ. މިތަންތަނުގެ ތެރެއިން ބަންދުކޮށްފައިވަނީ 4 ސެލޫން، 24 ފިހާރަ އަދި ކާބޯތަކެތި ހިދުމަތްދޭ 22 ތަނެއް ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ބުދަ ދުވަހު ބަންދުކުރި ތަންތަނުން ރަނގަޅުކުރުމަށްފަހު އެންގުމުން އިންސްޕެކްޝަން ހެދުމަށްފަހު 26 ތަނެއް ހުޅުވާފައިވާ ކަމަށް ޑރ ނަޒްލާ ވިދާޅުވި އެވެ. ބުދަ ދުވަހު ބަންދުކޮށްފައިވަނީ 27 ތަނެކެވެ.
މިކަންކަން ކުރުމުގެ މަގްސަދު ވަރަށް ސާފުކޮށް މިދެންނެވީ އަޅުގަނޑުމެންވެސް އެއްވެސް ވަރަކަށް ވިޔަފާރިތައް ހުއްޓުވާކަށް ބޭނުމެއް ނޫން. ވިޔަފާރިތައް ހިނގާވަރަކަށް އިގްތިޞާދު ކުރިޔަށްދާނީ. މިކަހަލަ ދުވަސްވަރެއްގައި ހަމަ ބޭނުން ވަރަށް ބޮޑަށް މިކަހަލަ ބިޒްނަސް ކުރިޔަށްދާން. އެހެންނަމަވެސް މިއައު އާންމު ހާލަތުގައި މިހާތަނަށް މިބެލީ މިކަހަލަ ތަންތަން ހިންގަވާ ފަރާތްތަކާއި އެތަންތަނަށް ވަޑައިގަންނަވާ ފަރާތްތަކުންވެސް އަޅުގަނޑުމެން އާންމުކޮށްފައި ހުރި ގަވާއިދުތަކަށް އަހުލުވެރިވެ އެގަވާއިދުތައް އަމަލުކުރުމަށް ނަސޭހަތްވެސް ދީފައި މިފިޔަވަޅު މިއަޅަނީ.ޑރ ނަޒްލާ ރަފީގް
ޑރ ނަޒްލާ ވިދާޅުވީ މާލެ ސަރަހައްދުގައި މިއިންސްޕެކްޝަންތައް ކުރިޔަށް ގެންދާނެކަމަށެވެ.
ވައިރަސް ފެތުރޭ މިންވަރު ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ލުއިތައްދޭން ފެށުމާއެކު ކޭސްތައް ފެންނަ މިންވަރު ވަނީ އިތުރުވާން ފަށާފަ އެވެ. އެއާއެކު އެޗްޕީއޭއިން އަންނަނީ ފިޔަވަޅުތައް ހަރުކަށިކުރަމުންނެވެ.
