މާލެއިން ރަށްރަށަށް ދާން ބޭނުންވެގެން 9000 އެއްހާ މީހުން އެދިފައިވާ ކަމަށާއި، މިއީ ރަށްރަށަށް ދަތުރުކުރަން އެންމެ ރަނގަޅު ދަނޑިވަޅު ނޫން ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި ހެލްތް މިނިސްޓަރު ވިދާޅުވީ، އެ ނުވަހާސް މީހުންނަކީ ކޮންމެހެން ދާން ޖެހިގެން ދާ މީހުން ކަމަށް ގަބޫލުފުޅު ނުކުރައްވާ ކަމަށެވެ. ރަށްރަށަށްދާއިރު ޒިންމާދާރުވާން މިނިސްޓަރު ވަނީ ހުރިހާ ފަރާތްތަކަށް ގޮވާލާފައެވެ.
ރަށަށް ދިޔުމަށް ފަހު ރަށުގައި ތިބޭ އުމުރުން ދުވަސްވި މީހުންނާއި ރަށު ތެރެއަށް ބަލި ފެތުރުމުގެ ޖާގަ އެބައޮތް. މި ވަގުތަކީ ޗުއްޓީ ދުވަސްވަރު ކަމަށް ވިޔަސް ޗުއްޓީ ގޮތުގައި އިހު އުޅޭ ފަދައިން ކުޅިވަރު ކުޅުމާއި މީހުން ރަށްރަށަށް ގޮސް ހަރަކާތް ހިންގުމަށް ދާން ކަމަށް ވެއްޖެނަމަ ބަލިން ރައްކާތެރިވުމަށް ކުރާ ބޮޑު ހޭދައާ ކުރާ ބުރަ މަސައްކަތަށް، އެންމެން މި ކަމުގެ ތެރޭގައި މަހެއް ވަންދެން ތިބި ތިބުމަށް އެއްވެސް ފައިދާއެއް ނުފެނި ހިނގައިދާނެ.އަބްދުﷲ އަމީން - ހެލްތް މިނިސްޓަރު
ރަށްރަށަށް ދާން ބޭނުންވާ މީހުންނަށް ދެވެނީ އެކަމަށް ހާއްސަކޮށްފައިވާ ހުއްދަ އެޗްޕީއޭއިން ނަގައިގެންނެވެ. ރަށްރަށަށްދާ ހުރިހާ އެންމެންވެސް 14 ދުވަހުގެ ކަރަންޓީނުގެ މުއްދަތު ފުރިހަމަ ކުރަން ޖެހެއެވެ.
