ރައްޔިތުންގެ މަޖިލީހުގެ އިދާރާގައި ގާއިމްކުރެވޭ ރެސްޓޯރަންޓް/ކެފޭ އަކާއި، ފިޓްނެސް ސެންޓަރެއް (ޖިމެއް) ސަބަބުން މަޖިލީހުގެ ބަޖެޓަށް ވަރަށް ބޮޑު ލުޔެއް ލިބިގެންދާނެ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ބުދަ ދުވަހުގެ ރޭ އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ މަޖިލީހުގެ ރެސްޓައުރެންޓަކާއި ކަސްރަތު ކޮޓަރިއެއް ހަދަނީ ޕަބްލިކް ޕްރައިވެޓް ޕާޓްނަރޝިޕްގެ ގޮތުގައި ކަމަށެވެ. ކޮންޓްރެކްޓް ފައިނޭންސިންގެ އުސޫލުން ގާއިމް ކުރެވޭ ރެސްޓައުރެންޓާއި، ޖިމްގެ ސަބަބުން މަޖިލީހުގެ ބަޖެޓް ލުއިވެގެންދާނެ ކަމަށެވެ.

މަޖިލީހުގެ އިދާރާގައި ރެސްޓޯރަންޓަކާއި ޖިމެއް ހިންގާނެ ފަރާތެއް ހޯދަން އިއުލާން ކުރީ ޖުލައި 22 ގައެވެ.

މިކަމާ ގުޅިގެން މަޢުލޫމާތު ސާފުކުރުމުގެ ބައްދަލުވުން އޮންނާނީ 5 އޮގަސްޓް 2020 ވާ ބުދަ ދުވަހުގެ 14:00 ގައި ރައްޔިތުންގެ މަޖިލީހުގެ އިދާރާގައެވެ. އަދި އެ ބައްދަލުވުމުގައި ދެވޭ މައުލޫމާތާ އެއްގޮތްވާ ގޮތުގެމަތިން ޕްރޮޕޯސަލް ހުށަހެޅުން އޮންނާނީ 16 އޮގަސްޓް 2020 ވާ އާދީއްތަ ދުވަހުގެ 12:00 ގައެވެ.

ރައްޔިތުންގެ މަޖިލީހުގެ އިދާރާގައި، ރެސްޓޯރަންޓް/ކެފޭ އަކާއި ފިޓްނަސް ސެންޓަރެއް ހިންގުމަށް ނިންމާފައިވާއިރު، މިކަން ކުރަމުންދަނީ މަޖިލީހުގެ ކްލަބުގެ ބެލުމުގެ ދަށުންނެވެ.

މަޖިލީހުގައި ރެސްޓޯރަންޓް/ކެފޭ ހިންގަން ފެށުމުން، މަޖިލީހުގެ އިދާރާއިން ކުރިން ދެމުންދިޔަ ފަރިއްކޮޅާއި ސައިގެ، ހިދްމަތް ނުދޭން މަޖިލީހުގެ އިދާރާއިން ވަނީ ނިންމާފައެވެ. ނަމަވެސް ކޮފީއާއި ސައި، އަދި ބިސްކޯދުފަދަ ތަކެތި ލިބެން ހުރެއެވެ.