ރ. އަލިފުއްޓަށް ބިދޭސީދީންނަށް އެރޭނީ ކައުންސިލްގެ ހުއްދަ ލިޔުމުން ލިބިގެން ކަމަށް އެރަށުގެ ކައުންސިލުން ބުނެފިއެވެ.
އަލިފުށީ ކައުންސިލުން ބުނީ، އެ ރަށުގައި މިހާރު މަސައްކަތްކުރާ ބިދޭސީންނާއި މަސައްކަތްކުރުމަށް އަންނަ ބިދޭސީންނާ ގުޅޭގޮތުން ބައެއް ފިޔަވަޅުތައް އެޅުމަށް ނިންމާ ވަކި އުސޫލަކުން އަމަލު ކުރުމަށް ނިންމާފައިވާ ކަމަށެވެ. އަދި މި ނިންމުންތައް ނިންމާފައިވަނީ މިމަހުގެ 21 ގައި ބޭއްވި ކައުންސިލްގެ 3 ވަނަ ދައުރުގެ 166 ވަނަ ޖަލްސާއިން ކަމަށް ކައުންސިލުން ބުނެއެވެ.
ކައުންސިލުން ބުނީ ގަވާއިދާ ޚިލާފަށް އަލިފުށީގައި އުޅޭ ބިދޭސީން، ގަވާއިދުގެ ތެރެއަށް ވަނުމުގެ ފުރުސަތު، 31 އޮކްޓޯބަރ 2020 ގެ ނިޔަލަށް އެ ފަރާތްތަކަށް ދިނުމަށާއި އަދި މިތާރީޚުގެ ފަހުން، ގަވާއިދާ ހިލާފަށް އުޅޭ ބިދޭސީންނާއި މެދު ފިޔަވަޅު އަޅާނެ ކަމަށެވެ.
ކައުންސިލުން ބުނީ އެއްވެސް ބިދޭސީއަކަށް އަލިފުއްޓަށް އެރޭނީ އަދި އެއްވެސް ފަރާތަކުން ބިދޭސީއަކު އަލިފުއްޓަށް އެރުވޭނީ ވެސް ކައުންސިލަށް އެކަން އަންގާ ކައުންސިލްގެ ހުއްދަ ލިޔުމުން ލިބިގެން ކަމަށެވެ.
މީގެ އިތުރުން ކައުންސިލުން ބުނީ މިހާރު އެރަށުގައި ތިބި، ބިދޭސީން ކައުންސިލުގައި އޮންނަ ބިދޭސީންގެ ދަފްތަރުގައި 31 އޮގަސްޓް 2020 ގެ ނިޔަލަށް ރަޖިސްޓްރީކުރުމަށާއި އަދި ބިދޭންސީން ގެންގުޅޭ ފަރާތްތަކުން ވެސް އެމީހުންގެ ބެލުމުގެ ދަށުގައިވާ ބިދޭސީން މި ދަފްތަރުގައި ރަޖިސްޓްރީ ކުރަން ޖެހޭ ކަމަށެވެ. މި އުސޫލުތަކާ ހިލާފުވާ ފަރާތްތަކާ މެދު ކައުންސިލުން ފިޔަވަޅު އަޅާނެއެވެ.
