ކޮވިޑް-19 އަށް އެމެރިކާއިން އުފައްދަމުންގެންދާ ދެ ވެކްސިނެއްގެ މަސައްކަތް ރެކޯޑް ސްޕީޑެއްގައި ކުރިއަށްދާ ކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.

ރިޕޯޓްތައް ބުނާ ގޮތުން ކޮވިޑް-19 އަށް އެމެރިކާއިން އުފައްދަމުން ގެންދާ ވެކްސިން އަންނަ ހޯމަ ދުވަހު އިންސާނުންގެ ގަޔަށް ޖެހުމުގެ ޓްރައިލްތައް ކުރިޔަށް ގެންދިއުމަށް އަންނަނީ ތައްޔާރުވަމުންނެވެ. އެގޮތުން ވެކްސިންގެ ފުރަތަމަ ޓްރައިލްގައި 30،000 ވޮލެންޓިއަރުން ބައިވެރިވާނެ ކަމަށް ރިޕޯޓްތައް ބުނެއެވެ.

އެމެރިކާގެ ނެޝަނަލް އިންސްޓިޓިއުޓްސް އޮފް ހެލްތް އިން ބުނީ އިންސާނުންގެ ގަޔަށް ވެކްސިން ޖެހުމުގެ ފުރަތަމަ މަރުހަލާ ކާމިޔާބުވާނެ ކަމުގެ އުންމީދު ބޮޑު ކަމަށާއި ވެކްސިން އުފެއްދުމަށް އެމެރިކާއިން މިހާތަނަށް ކުރި މަސައްކަތް ވަރަށް ކާމިޔާބު ކަމަށެވެ.

މީގެ ކުރިން އެމެރިކާއިން ވަނީ ޑިޕާޓްމަންޓް އޮފް ހެލްޑް އެންޑް ހިއުމަން ސަރވިސްއާއި ޑިޕާޓްމަންޓް އޮފް ޑިފެންސުން ފިޒަރއާއެކު އެތައް މިލިއަން ޑޯޒެއްގެ ކޮވިޑް-19އިގެ ވެކްސިން އުފެއްދުމަށް އެއްބަސްވުމަކަށް އައިސްފައެވެ.

މި އެއްބަސްވުމުގެ ދަށުން ފުރަތަމަ އުފައްދާ 100 މިލިއަން ޑޯޒްގެ ވެކްސިނަށް 1.95 މިލިއަން ޑޮލަރު، އެމެރިކާގެ ފުޑް އެންޑް ޑްރަގް އޮތޯރިޓީން ވެކްސިން ކާމިޔާބުކަމަށް އިއުލާންކޮށް އާންމުކޮށް ބޭނުންކުރަން ހުއްދަ ދިނުމާއެކު އެ ކުންފުންޏަށް ދެވޭނެއެވެ.

ކާމިޔާބު ވެކްސިނެއް އުފެއްދިއްޖެނަމަ މިހާރު ރާވާފައިވާ ގޮތުން މުޅި ގައުމަށް ވެކްސިން ދިނުމުގެ ޕްރޮގްރާމް މި އަހަރުގެ ހަތަރުވަނަ ކުއާޓާގައި ނުވަތަ ފަހުކޮޅުގައި ލިބޭނެއެވެ. އަދި ވެކްސިން ފޯރުކޮށްދެމުންދާނީ އެމެރިކާގެ ސަރުކާރުގެ އިރުޝާދާއެކު ކަމަށާއި، އެމެރިކާގެ ރައްޔިތުންނަށް އެއްވެސް އަގަކާއި ނުލާ ވެކްސިން ލިބޭނެކަމަށް ބުދަ ދުވަހު ނެރުނު ނޫސްބަޔާނުގައި ބުނެފައިވެއެވެ. ނަމަވެސް ސިއްހީ ހިދުމަތް ފޯރުކޮށްދޭ ފަރާތްތަކުން ވެކްސިންއަށް އިންޝިއުރަންސްގެ ތެރެއިން އަގު ނެގިދާނެ ކަމަށް ވެސް މި ބަޔާނުގައި ބުނެފައިވެއެވެ.

މި އެއްބަސްވުމާއި ގުޅޭގޮތުން ފިޒަރގެ ޗެއަރ އަދި ސީއިއޯ ޑރ. އަލްބަރޓް ބޯރލާ ވިދާޅުވި މަސައްކަތް ކުރަމުންދަނީ ނުވާނެ ކަންކަން ވުމަށް މަގުފަހިކުރުމަށް ކަމަށާއި، ރައްކާތެރި އަދި ކުރު މުއްދަތެއްގައި ވެކްސިންއެއް ކާމިޔާބުކަމާއެކު ހޯދާ ފޯރުކޮށްދިނުމަކީ މިވަގުތު އެންމެ އިސްކަންދޭ ކަންތައް ކަމަށެވެ.

މުޅި ދުނުޔޭގައި 100ށް ވުރެ ގިނަ ކުންފުނިތަކުން ކޮވިޑް-19ށް ވެކްސިނެއް އުފައްދަން މަސައްކަތް ކުރަމުން އަންނަ އިރު މި ރޭހުގެ ކުރީގައި އުޅެނީ އޮކްސްފޯޑް ޔުނިވަރސިޓީއެވެ. ބީބީސީގައި ރިޕޯޓް ކޮށްފައިވާ ގޮތުން ޔުނިވަރސިޓީ އޮފް އޮކްސްފޯރޑުން އުފެއްދި މި ވެކްސިން އިންސާނުންގެ ހަށިގަނޑުގައި މަސައްކަތް ކުރާ މިންވަރު ދެނެގަތުމަށް ހަދާފައިވާ "ހިއުމަން ޓްރަޔަލް" އިން ކާމިޔާބު ނަތީޖާތަކެއް ވަނީ ނުކުމެފައެވެ. އެގޮތުން އެއްވަނަ މަރުޙަލާގައި 1077 މީހުން ބައިވެރިކޮށްފައިވާއިރު، ވެކްސިން ހަށިގަނޑަށް ޖެހުމުން ހަށިގަނޑުގެ އެތެރޭގައި "އެންޓިބޮޑީސް"އާއި، ވައިރަސްއާ ހަނގުރާމަކުރާ "ވައިޓް ބްލަޓް ސެލްސް" އުފައްދާކަމަށް ހޯދިފައިވާ ކަމަށް ސައިންސްވެރިންނާ ޙަވާލާދީ ބީބީސީގައި ރިޕޯޓް ކޮށްފައިވެއެވެ.