މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) މެދުވެރިކޮށް ހިންގި ޚިޔާނާތުގެ ފައިސާ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ލިބިވަޑައިގެންފައިވާކަން މިހާތަނަށް އެނގިފައިނުވާކަމަށް އެސެޓް ރިކަވަރީ ކޮމިޝަނުން ބުނެފިއެވެ.
ބުރާސްފަތު ދުވަހު ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް އަހުމަދު އައްސަދު ވިދާޅުވީ ރައީސްއަށް އެމްއެމްޕީއާރުސީގެ ފައިސާ ލިބިވަޑައިގެންނެވިކަން މިހާތަނަށް ފާހަގަވެފައިނުވާ ކަމަށާއި އެހެންނަމަވެސް، ކުރިއަށް އޮތް ތަނުގައި ފާހަގަކުރެއްވިއްޖެނަމަ އެއްވެސް ފަސް ޖެހުމެއް ނެތި އެ މައްސަލަވެސް ބައްލަވާނެ ކަމަށެވެ.
ރައީސް އިބްރާހިމް މުހައްމަދު ސޯލިހާއި ބެހޭގޮތުން އެމްއެމްޕީއާރުސީގެ ތެރެއިން ފައިސާ އެއް ގޮސްފައިވާކަމަށް އަޅުގަނޑަށް ހަމަ ޔަގީނުންވެސް މިހާތަނަށް ފާހަގަކުރެވިފައެއް ނެތް. ފެނިއްޖެ ކަމަށް ވެއްޖިއްޔާ އަޅުގަނޑުމެން ބެލުމަކަށް އެއްވެސް ފަސްޖެހުމެއް ނެތް.އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދު
އައްސަދު ވިދާޅުވީ އެފަދަ މައްސަލައެއް މިހާތަނަށް ބަލާފައި ނުވާކަމަށެވެ.
ރައީސް ސޯލިހަށް އެމްއެމްޕީއާރުސީގެ ފައިސާ ލިބިވަޑައިގެންނެވި ކަމުގެ ތުހުމަތު ސޯޝަލް މީޑިއާގައި ކުރެވެމުންދާއިރު، އައްސަދު ވިދާޅުވީ ސޯޝަލް މީޑިއާގައި ދައުރުވާ މައުލޫމާތުތައް ވެސް ބަލަމުންދާނެ ކަމަށެވެ. އެހެންނަމަވެސް މިހާތަނަށް ލިބިފައިވާ މައުލޫމާތުތަކުން ސޯޝަލް މީޑިއާގައި ދައުރުވާ މައުލޫމާތެއް ބަލަން ޖެހޭކަމަށް ކޮމިޝަނަށް ނުފެންނަ ކަމަށެވެ.
