ރާއްޖޭގައި ބިދޭސީންގެ ކަންތައް ބޮއްސުންލައިގެން ގޮސް މިހާރު ފެންނަ މަންޒަރަކީ ބޭރުގެ އިސްތިއުމާރީ ބާރަކުން ގައުމު ހިފާފައި އޮންނައިރު ފެންނަ ފަދަ މަންޒަރު ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެ އެވެ.

އަންގާރަ ދުވަހު ކުރިޔަށް ދިޔަ ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި ޝަމާލް ވިދާޅުވީ، ރާއްޖޭގައި ބިދޭސީންގެ މައްސަލަ އަކީ އެތައް އަހަރުތަކެއް ވެފައި އޮތް މައްސަލަ އެއް ކަމަށެވެ. ޝަމާލް ވިދާޅުވީ ގޮތުގައި ރާއްޖޭގައި މިހާރު ރަޖިސްޓަރ ކޮށްފައި ތިބި 1،79،954 ބިދޭސީންނެވެ. އަދި އެއްވެސް ލިޔެކިޔުމެއްނެތި އުޅެމުންދާ 66،000 ބިދޭސީ އަކު އުޅެމުންދާ ކަމަށެވެ.

ޗީފް އޮފް ޑިފެންސް ވިދާޅުވީ، ބިދޭސީންގެ މައްސަލަ އަކީ ރާއްޖޭގެ ގައުމީ ސަލާމަތަށް އޮތް ނުރައްކަލެއް ކަމަށެވެ. ޝަމާލް ވިދާޅުވީ މި ޒަމާނަކީ އެއް ގައުމުން އަނެއް ގައުމަށް ހަތިރާޔު ހިފައިގެން އަރާ ހިފާ ޒަމާނެއް ނުން ކަމަށާއި، ނަމަވެސް ރާއްޖޭގެ ބޯޑަރަކީ ހުޅުވާލެފައިވާ ބޯޑަރަކަށްވާތިވެ އެކި ގޮތް ގޮތަށް އެތައް ބަޔަކު މި ގައުމަށް އެތެރެވެފައިވާ ކަަމަށެވެ.

އޭނާ ވިދާޅުވީ، ބިދޭސީންގެ ތެރެއިން ގިނަ ބިދޭސީންނަކީ ގަވައިދާ ހިލާފަށް އުޅެމުންދާ ބަޔަކަށްވާތިވެ އެ މި މީހުންގެ މައްޗަށް ގާނޫނެއްވެސް ނުހިންގޭ ކަމަށެވެ. ޝަމާލް ވިދާޅުވީ، ބިދޭސީންގެ މައްސަލަ މީގެ ކުރިންވެސް އެތައް ފަހަރަކު ސަމާލުކަމަށް ގެނައި ކަމަށާއި، އެކަމަކު އަހަރުތަކެއް ފާއިތުވެގެން ދިޔައިރުވެސް އެ މައްސަލަ އަށް އެންމެ ފިޔަވަޅެއްވެސް އަޅާފައިނުވާ ކަމަށެވެ.

ޗީފް އޮފް ޑިފެންސް ވިދާޅުވީ، އެ މައްސަލަ އަކީ ގައުމީ ސަލާމަތަށް ނުރަކައްލަކަށް ނިންމި ހިސާބުން ފެށިގެން އަވަސް މިނެއްގައި ބިދޭސީންނާ މެދު އަމަލުކުރާނެ ގޮތްތަކާއި ގުޅޭ ގޮތުން ގައުމީ ސަލާމަތީ ކައުންސިލްގައި މަޝްވަރާ ކުރެވެމުންދާ ކަަމަށެވެ. މައްސަލަ ހައްލު ކުރެވޭނީ ސަރުކާރުގެ އިތުރުން އަމިއްލަ ޖަމިއްޔާ، ޖަމާއަތްތަކުގެ މަސައްކަތްތަކެއް ކޮށްގެން ކަމަށެވެ.