މި ފަހަކަށް އައިސް ބިދޭސީން ކުރަމުންދާ މުޒާހަރާތަކަކީ ހައްގު ހޯދަންކުރާ މުޒާހަރާތަކެއް ނޫން ކަމަށާއި، އެކަމުގެ ފަހަތުގައި ފޮރުވިފައިވާ ފަރާތްތަކެއް އުޅޭ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
ބިދޭސީން މުޒާހަރާ ކުރަނީ ހައްގުތައް ހޯދަން ނޫން ކަމަށް ޑިފެންސް މިނިސްޓަރު ވިދާޅުވީ، އަންގާރަ ދުވަހު ކުރިޔަށް ދިޔަ ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި ވާހަކަ ދައްކަވަމުންނެވެ. އެ ކޮމިޓީގައި މާރިޔާ ވިދާޅުވީ، ބިދޭސީން ހިންގަމުންދާ ހަމަނުޖެހުންތަކަކީ ގައުމީ ސަލާމަތަަށް އޮތް ނުރައްކަލެެއް ކަމަށާއި، އެ މައްސަލަތައް ތަހުގީގު ކުރަމުންދާ ކަމަށެވެ.
މާރިޔާ ވިދާޅުވި ގޮތުގައި ބިދޭސީންގެ މުޒާހަރާގެ ފަހަތުގައި އެހެނިހެން ސަބަބުތަކެއްވެއެވެ.
ބޮޑުފިނޮޅު މައްސަލަ އަށް ބަލާކަމުގައިވާނަމަ އެ މީހުން ނިކުމެ ދިވެހިން ރަހީނުކުރީ. ކޫއްޑޫގެ މައްސަލަ އަށް ބަލަންޏާ އެ މީހުން ބުނަނީ ރަށަށްދާން ބޭނުމޭ. އެެހެންވީމާ މިއުޅެނީކީ ކޮންމެހެން މުސާރަ ނުލިބިގެން މުސާރައިގެ ހައްގު ކަންތަކެއް ނޫންކަން އެބަ ވަރަށް ރީއްޗަށް ސާފުކޮށް އެބައެނގޭ.މާރިޔާ އަހުމަދު ދީދީ - ޑިފެންސް މިނިސްޓަރު
ހުޅުމާލޭގައި ފުލުހުންނާއި، ސިފައިން ފްލެޓްތައް އަޅަމުން ދިޔަ ބިދޭސީން މުޒާހަރާކުރީ އެ މީހުންނަށް ދޭން ޖެހޭ މުސާރަ ދިނުމާއި ގުޅޭ ގޮތުން ވާހަކަތަކަށް ދެކެވެމުން ދަނިކޮށް ކަމަށް އޭނާ ވިދާޅުވިއެވެ.
ބޮޑުފިނޮޅުގައި ހިންގި ހަމަނުޖެހުމާއި ހުޅުމާލޭގައި ހިންގި ހަމަނުޖެހުމުގައި ވެސް ފުލުހުންނަށް ހަމަލާދީފައިވާއިރު، އެ ހާދިސާތަކުން އެނގިގެންދަނީ މުޒާހަރާ ކުރަނިީ ކޮންމެވެސް ބަޔަކު އެކަމުގެ އަޑީގައި ތިބެކުރާ ކަމެއް ކަމަށް ބުރެވެވޭ ކަމަށް މާރިޔާ ވިދާޅުވިއެވެ.
ކޮންމެހެން މުސާރަ ނުލިބި ހައްގެއް ހޯދަން ނިކުންނަނީ އެއް ނޫން. މީގައި ފޮރުވިފައިވާ ފަރާތްތަކެއް ވެސް ވާނެކަން އަޅުގަނޑުމެންނަށް ގަބޫލުކުރެވޭ.މާރިޔާ އަހުމަދު ދީދީ - ޑިފެންސް މިނިސްޓަރު
ބިދޭސީންގެ މައްސަލަ އަކީ ވަގުފާރި ކަމަށް ބުނެ ޝޯޝަލް މިޑިއާގައި ލޭބަލް ކުރާ ކުރުމާއި މެދު މާރިޔާގެ ހިޔާލު ތަފާތެވެ. ރާއްޖޭގެ ގާނޫނުތަކާއި ބައިނަލްއަގްވާމީ ގާނޫނުތަކަށް ބަލާއިރު އެއީ ވަގުފާރި ކަމަށް ނުބެލެވޭ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ، އެފަދަ ގޮތަށް މީހުން ވާހަކަ ދައްކަނީ ރާއްޖޭގެ މަސްލަހަތު ގެއްލުވާލަން ވެގެން ކަމަށެވެ.
