ސްވިޑެންގައި ކޮވިޑް-19ށް ޕޮޒިޓިވްވާ މީހުން އަމިއްލައަށް ކޮންޓެކްޓް ޓްރޭސިން ހަދަން ޖެހިއްޖެއެވެ.

ސްވިޑެންގެ ހެލްތް އެޖެންސީން ހޯމަ ދުވަހު ބުނީ، ކޮންޓެކްޓް ޓްރޭސް ކުރުމުގެ ގައިޑްލައިންތަކަށް ބަދަލުތަކެއް ގެންނަން ނިންމާފައިވާ ކަމަށެވެ. އެގޮތުން ޕޮޒިޓިވްވާ މީހުންނާ ބައްދަލުވެފައިވާ މީހުން ދެނެގަންނަން ޖެހޭނީ އެ މީހަކު އަމިއްލައަށް ކަމަށެވެ. މި ބަދަލު ގެންނަން ނިންމި މައިގަނޑު ސަބަބަކީ ވިހާވެސް ބޮޑަކަށް ބަލި ޖެހިފައިވާ މީހުން ދެނެގަތުން ކަމަށް ސްވިޑެންގެ ހެލްތް އެޖެންސީން ބުނެއެވެ.

އާއްމު ގޮތެއްގައި އެހެން ގައުމުތަކުން ބަލި ޖެހިފައިވާ މީހުންގެ ކޮންޓެކްޓް ޓްރޭސިންގެ ހަދަމުން ގެންދަނީ އެކަމަކަށް ހާއްސަކޮށްފައިވާ ޓީމަކުންނެވެ.

ސްވިޑެންގެ ހެލްތް އެޖެންސީގެ ތަރުޖަމާނު ވިދާޅުވީ، ޕޮޒިޓިވް މީހުންނާ ބައްދަލުވެފައިވާ މީހުން، އޮފިޝަލުންތަކެއް ވެގެން ކޮންޓެކްޓް ޓްރޭސިން ހެދުމުގެ ބަދަލުގައި ބަލި ޖެހިފައިވާ މީހަކު އަމިއްލަ އަށް ކޮންޓެކްޓް ޓްރޭސިން ހެދުން މާ ރަނގަޅު ކަމަށެވެ.

އޭނާ ވިދާޅުވީ، ބަލި ޖެހޭ ނިސްބަތް މަދުއިރު މިހާރު އަމަލުކުރަމުންދާ ނިޒާމުވެސް ރަނގަޅު ކަމަށެވެ. އެކަމަކު ޕޮޒިޓިވް ކޭސްތަކުގެ އަދަދު އިތުރުވަމުން އަންނަ ވަރަކަށް ކޮންޓެކްޓް ޓްރޭސިން ވަކި ބަޔަކު ހަދާނަމަ އެކަން އެންމެ އެކަށޭނެ ގޮތަކަށް ކުރެވިގެން ނުދާނެ ކަމަށެވެ.

ބަލިޖެހޭ މީހުން އަމިއްލައަށް ކޮންޓެކްޓް ޓްރޭސިން ހެދުމުން ލިބޭނެ ނަތީޖާއެއް އަދި ނޭގޭ ކަމަށާއި، އެކަމަކު ދުވަހެއް ދުވަހަކަށް ބަލިޖެހޭ މީހުންގެ އަދަދު އިތުރުވާނަމަ ވަކި ބަޔަކު ހާއްސަވެގެން ކޮންޓެކްޓް ޓްރޭސިން ހެދުމުގެ ބަދަލުގައި ޕޮޒިޓިވްވާ މީހުން އަމިއްލައަށް ކޮންޓެކްޓް ޓްރޭސިން ހެދުމުން ވާނެ ފައިދާ މާ ބޮޑުވާނެ ކަމަށް އެޖެންސީން ބުންޏެވެ.

ސްވިޑެންގައި ކޮވިޑު ޖެހުނު މީހުން އަދަދު އުޅެނީ 7800 ށް ވުރެ މަތީގައެވެ. ބަލި ޖެހިގެން 5639 މީހަކު ވަނީ މަރުވެފައެވެ.