ޓޫރިޒަމް މިނިސްޓްރީގެ މުވައްޒަފަކު ކޮވިޑް-19ށް ޕޮޒިޓިވްވެ، 12 މުވައްޒަފަކު އެކަހެރިކޮށްފިއެވެ.

ޓޫރިޒަމް މިނިސްޓްރީގެ މުވައްޒަފަކު ކޮވިޑަށް ޕޮޒިޓިވްވިކަން، އެ މިނިސްޓްރީގެ އޮފިޝަލަކު ވަނީ ރާއްޖެއެމްވީ އަށް ކަށަވަރުކޮށްދެއްވާފައެވެ. އޮފިޝަލް ވިދާޅުވީ، ޕޮޒިޓިވްވި މުވައްޒަފަކީ ޑިވޮލޮޕްމެންޓް ސެކްޝަން ގައި މަސައްކަތް ކުރާ މުވައްޒަފެއް ކަމަށާއި، އޭނާގެ ފަރާތުން ކޮވިޑުގެ އަލާމާތްތައް ފެނިގެން ނެގި ސާމްޕަލްގެ ނަތީޖާ ޕޮޒިޓިވްވެފައިވާ ކަމަށެވެ. އެ މުވައްޒަފު ޕޮޒިޓިވްވީ ބުރާސްފަތި ދުވަހުއެވެ.

އޭނާއާ ބައްދަލުވި 12 މުވައްޒަފަކު ވަނީ ގޭގައި އެކަހެރި ކޮށްފައެވެ. އޮފިޝަލް ވިދާޅުވީ، އާދިއްތަ ދުވަހު އޮފީސް ހުޅުވީ ޑިސްއިންފެކްޓް ކުރުމަށް ފަހު ކަމަށެވެ. މިހާރު އެ މުވައްޒަފު ހުރީ ބަނޑޮހުގެ ކަރަންޓީނު ފެސިލިޓީގައެވެ.

ގްރޭޓަރ މާލޭ ސަރަހައްދުގައި އިއުލާންކޮށްފައިވާ ލޮކްޑައުން އަށް ދިން ލުއިތަކާއި އެކު ޕޮޒިޓިވްވާ ކޭސްތަކުގެ އަދަދު ވަނީ މައްޗަށް ޖެހިލާފައެވެ. ކޮވިޑާއި ގުޅިގެން އޮފީސްތަކުން އަމަލުކުރަން ޖެހޭ ގޮތުގެ އުސޫލެއް، ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ އާއްމުކޮށްފައެވެ. އެޗްޕީއޭ އިން ބާރު އަޅަނީ ވީހާ ވެސް މަދު މުވައްޒަފަކު އޮފީހަށް ނެރެގެން މަސައްކަތް ކުރިޔަށް ގެންދިޔުމަށެވެ.