ކޮވިޑް-19 އާ ދެކޮޅަށް ރާއްޖެއިން ކުރަމުންދާ މަސައްކަތަށް އެހީތެރިވުމުގެ ގޮތުން ދެކުނު ކޮރެއާ ސަރުކާރުން ރާއްޖެއަށް 150 ޓެސްޓް ކިޓް ހަދިޔާކޮށްފިއެވެ.

މި ދަނޑިވަޅުގައި ދެކުނު ކޮރެއާއިން ފޯރުކޮށްދިން ދީލަތި މި އެހީތެރިކަމަށް ދެކުނު ކޮރެއާގެ ސަރުކާރާއި، ރައީސް މޫން ޖެއިއިންގެ އިތުރުން ކޮރެޔާގެ ހާރިޖީ ވަޒީރަށް ދިވެހި ސަރުކާރުން ވަނީ ޝުކުރު އަދާކޮށްފައެވެ.

150 ޓެސްޓް ކިޓް ބޭނުންކޮށްގެން 15،000 (ފަނަރަ ހާސް) ކޮވިޑް-19 ޓެސްޓް ހެދޭނެއެވެ. ފޮރިން މިނިސްޓްރީން ބުނީ، މި ޓެސްޓު ކިޓްތައް ވެގެންދާނީ ކޮވިޑު އިތުރަށް ފެތުރުނަ ނުދިނުމަށް ދިވެހި ސަރުކާރުން ކުރަމުން ގެންދާ މަސައްކަތަށް ލިބިގެން ދިޔަ އިތުރު ކުރިއެރުމަކަށް ކަމަށެވެ.

ރާއްޖެއާއި ދެކުނު ކޮރެއާ އާއި ދެމެދު ގާތް ގުޅުމެއް އުފެދިފައިވާއިރު، ކުރިއަށް އޮތްތަނުގައި މިގުޅުން އިތުރަށް ހަރުދަނާކުރުމަށް ސަރުކާރުން މަަސައްކަތް ކުރަމުންދާ ކަމަށް ފޮރިން މިނިސްޓްރީން މައުލޫމާތުދެއެވެ.

ކޮރެޔާއިން ޓެސްޓު ކިޓް ރާއްޖެއަށް ހަދިޔާކޮށްފައިވާއިރު ދުނިޔޭގެ ސިއްހަތު ޖަމިއްޔާ، ޑަބްލިއުއެއެޗްއޯއިން ވެސް ވަނީ އެކި ފަހަރުމަތިން ގިނަ އަދަދެއްގެ ޓެސްޓު ކިޓް ރާއްޖެއަށް ހަދިޔާކޮށްފައެވެ. އަދި މި ދީލަތި އެހީތަކާއި ގުޅިގެން ރާއްޖޭގައި އެކި ކަންކޮޅުތަކުގައި ޓެސްޓް ކުރެވޭނެ މަގުފަހިވެ، ރާއްޖޭގެ ޓެސްޓިންގ ކެޕޭސިޓީ ވަނީ އިތުރުވެފައެވެ.