ޖަރުމަނަށް 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިނުމުގައި މުހިންމު ދައުރެއް އަދާކުރި އަންޑްރޭ ޝޫލާ އުމުރުން 29 އަހަރުގައި ފުޓްބޯޅަ ކުޅުން ހުއްޓާލައިފިއެވެ.
ފުޓްބޯޅަ ކުޅުން ހުއްޓާލިކަން ޝޫލާ ވަނީ އިންސްޓާގްރާމްގައި ކުރި ޕޯސްޓެއްގައި އިއުލާން ކޮށްފައެވެ.
އުމުރުން 29 އަހަރުގައި ފުޓްބޯޅަ ކުޅުން ޝޫލާ ހުއްޓާލިއިރު، މިދިޔަ ހަފުތާގެ ތެރޭގައި ޖަރުމަންގެ ބޮރޫޝިއާ ޑޯޓްމުންޑާއެކު އޭނާ ހަދާފައިވާ އެއްބަސްވުން، ބާކީ އަހަރެއް އޮއްވައި ވަނީ އުވާލާފައެވެ.
2016 ވަނަ އަހަރު ޑޯޓްމުންޑާ ގުޅުނު ޝޫލާ މިދިޔަ ދެ އަހަރު ކުޅެފައިވަނީ ލޯނު އެއްބަސްވުމެއްގެ ދަށުން އެހެން ކްލަބުތަކަށެވެ. އެގޮތުން 2018-2019 ވަނަ އަހަރުގެ ސީޒަނުގައި އިނގިރޭސި ކްލަބު ފުލަމްއަށް ޝޫލާ ކުޅެދިންއިރު، މިދިޔަ ސީޒަނުގައި އޭނާ ކުޅެފައިވަނީ ރަޝިއާގެ ސްޕާޓަކް މޮސްކޯއަށެވެ.
މީގެ ކުރިން ޝޫލާ ވަނީ މައިންޒް އާއި، ބަޔާ ލެވަކޫސެން އާއި، ވުލްފްސްބާގުގެ އިތުރުން ޗެލްސީއަށްވެސް ކުޅެފައެވެ.
ޗެލްސީއާއެކު ޝޫލާ އިނގިރޭސި ޕްރިމިއާ ލީގު ކާމިޔާބުކުރިއިރު، އޭނާ ވަނީ ޖަރުމަން ކަޕް ދެ ފަހަރު އަދި ޖަރުމަން ސުޕަ ކަޕް ދެ ފަހަރު ކާމިޔާބުކޮށްފައެވެ.
ޝާލޭ އެންމެ މަޝްހޫރު ވެފައިވަނީ 2014 ވަނަ އަހަރުގެ ފީފާ ވޯލްޑް ކަޕްގެ ފައިނަލުގައި އާޖެންޓީނާ ކޮޅަށް މެޗުގެ އިތުރު ވަގުތުގައި މާރިއޯ ގޮޓްޒޭ ކާމިޔާބުކުރި ލަނޑު ޖެހުމަށް ފުރުސަތު ތަނަވަސް ކޮށްދިނުމުންނެވެ. ޝުލާ ވަނީ ޖަރުމަން ގައުމީ ޓީމަށް ކުޅެދިން 57 މެޗުގައި 22 ލަނޑު ކާމިޔާބުކޮށްފައެވެ.
