ސިވިލް ސަރވިސް ކޮމިޝަނު(ސީއެސްސީ) ން ހުސްވެފައިވާ 4 މަޤާމަށް ކުރިމަތިލުމަށް ރައްޔިތުންގެ މަޖިލީހުން ހުޅުވާލައިފިއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ސީއެސްސީގެ 4 މެމްބަރަކު ވަކި ކުރުމަށް ނިންމާ މަޖިލީހުގެ ތަޅުމަށް ފޮނުވުމާއި ގުޅިގެން، އެމައްސަލަ ހޯމަ ދުވަހުގެ ޖަލްސާ އަށް އެޖެންޑާ ކޮށްފައިވަނިކޮށް ކޮމިޝަންގެ ރައީސް ޑރ.ޢަލީ ޝަމީމާއި، ނައިބް ރައީސް ޝަހީދު މުޙައްމަދުގެ އިތުރުން މެމްބަރު ޒަކަރިއްޔާ ޙުސައިން ވަނީ މަޤާމުން އިސްތިއުފާ ދެއްވާފައެވެ. އެހެންކަމުން ޖަލްސާގައި މަޤާމުން ވަކިކޮށްފައިވަނީ ކޮމިޝަންގެ މެމްބަރު އިބްރާހީމް ޝަހީޤެވެ. އޭނާ ވަކިކޮށްފައިވަނީ 48 މެމްބަރުންގެ ވޯޓުންނެވެ. މިހާރު ސިވިލް ސަރވިސް ކޮމިޝަންގައި ހުންނެވީ ކޮމިޝަނަށް އެންމެ ފަހުން އައްޔަން ކުރެއްވި ފާޠިމަތު އާމިރާ އެކަންޏެވެ.
އަންގާރަ ދުވަހު ބޭއްވި ޖަލްސާގައި ކޮމިޝަނުން ހުސްވެފައިވާ މަގާމުތަކަށް ކުރިމަތިލުމުގެ ފުރުސަތު 14 ޖުލައިން ފެށިގެން 21 ޖުލައި އަށް ހުޅުވާލާފައިވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވިއެވެ. އަދި މިކަމަށް ޝައުގުވެރިވާ ސިވިލް ސަރވިސް ހިންގަން ބޭނުންފުޅުވާ ފަރާތްތަކުން ކުރިމަތިލެއްވުމަށް އެދިވަޑައިގެންނަވާ ކަމަށް ރައީސް ނަޝީދު ވިދާޅުވިއެވެ.
މަޖިލީހުން އަދި ރާއްޖޭގެ ރައްޔިތުން ދިވެހިރާއްޖޭގެ ސަރުކާރު މުވައްޒަފުންނާ ގުޅޭ ކޮމިޝަން ހިންގުމަށް، ބެލެހެއްޓުމަށް އެދެނީ ހަމަކަށަވަރުންވެސް ސަރުކާރު މުވައްޒަފުންގެ މަސައްކަތްތައް ހަލުވިކަމާއެކީގައި އެއިރެއްގައި ވެރިކަމުގައި ތިބޭ ސިޔާސީ ބޭފުޅުންގެ މެނިފެސްޓޯ ނުވަތަ ވައުދުތައް ފުއްދައިދިނުމަށް އަމާޒު ހިފައިގެން ކެނޑިނޭޅި މަސައްކަތްކުރާ ބައެއް މަސައްކަތްކުރާ ހަމަތަކެއް. އަޅުގަނޑަށް ޔަގީން ކަށަވަރު ކުރިމަތިލައްވާނެ ކަމަށް މިކަމަށް ޝައުގުވެރިވެ ވަޑައިގެންނަވާ އަދި ރާއްޖޭގެ ސިވިލް ސަރވިސް ރަނގަޅު ގޮތުގައި ހިންގަވަން ބާރުއަޅުއްވާ ތަޖުރިބާކާރު ބޭފުޅުން.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ މި މަގާމަކީ ވަކި ޕާޓީއަކަށް ނުވަތަ އެއް ނަޒަރިއްޔާތަކަށް ހުޅުވިފައި އޮންނަ މަގާމެއް ނޫން ކަމަށެވެ. މިއީ ހުރިހާ ރައްޔިތުންނަށް ހުޅުވާލާފައިވާ މަގާމެއް ކަމަށް ރައީސް ނަޝީދު ވިދާޅުވިއެވެ.
