ޓޫރިޒަމް މިނިސްޓްރީގެ ސީނިއާ އެގްޒެކެޓިވްގެ މަގާމުގައި ހުންނެވި އަލީ ހާޝިމް (ސްމިތު) ގެ އަހުލާގީ މައްސަލައެއް ސަރުކާރުން ބަލަން ފަށައިފިއެވެ.
އަންހެނަކު ކުރި ޓުވީޓަކަށް ޖަވާބު ދެއްވަމުން އެ އަންހެންމީހާ އާ މުހާތަބުކޮށް ސްމިތް ވިދާޅުވެފައިވަނީ "ރޭޕް ކުރީމަ ކަޑަވަނީދޯ" އެވެ.
ސްމިތްގެ މި ޓުވީޓާއި ގުޅިގެން ނުރުހުން ފާޅުކޮށް، މިއީ ސަރުކަރަށް ލަދެއް ކަމަށް މީހަކު ކުރި ޓުވީޓަކަށް ކޮމެންޓް ކުރައްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވަނީ އެ މީހާގެ ވާހަކައަށް ތާއީދު ކުރައްވާފައެވެ. އަދި ކަމާބެހޭ ފަރާތްތަކުން އެ މައްސަލަ ބަލަމުންދާ ކަމަށް ގަބޫލު ކުރައްވާ ކަމަށް ވިދާޅުވިއެވެ.
ސްމިތްގެ މި ޓްވީޓާއި ގުޅިގެން އައި ފާޑުކިޔުންތަކާއި ގުޅިގެން ސުމިތް ވަނީ އިތުރު ޓްވީޓެއް ކުރައްވާފައެވެ. އެ ޓްވީޓްގައި އެއީ އަވަސް އަރުވާލައިގެން ލިޔެވުނު ޓްވީޓެއް ކަމަށް ވިދާޅުވި ކަމަށާއި އެކަމަށް މަޢާފަށް އެދިވަޑައިގަންނަވާ ކަމަށެވެ.
މި ފަހަކަށް އައިސް އަންހެނުންނަށް ޖިންސީ ގޯނާކުރާ މައްސަލަތައް ދަނީ އިތުރަވުމުންނެވެ. އެކަމަށް އެންމެ އެކަށީގެންވާ ފިޔަވަޅު ކަމާއިބެހޭ އިދާރާތަކުން ނޭޅޭތި އާއްމުން ކަންބޮޑުވުން ވަނީ އިންތިހާއަށް އިތުުރުވެފައެވެ.
