ރ ހުޅުދުއްފާރުގައި ހޯމް ކަރަންޓީނު ފުރިހަމަ ކުރުމަށްފަހު ޓެސްޓް ކުރުމުން ކޮވިޑް-19 އަށް ޕޮޒިޓިވްވި މީހާގެ ކޮންޓެކްޓް ޓްރޭސިންގގައި އެއްވެސް މީހަކު ނެތްކަމަށް ހުޅުދުއްފާރު ކައުންސިލްގެ ނައިބު ރައީސް އަލީ ޖާވިދު ވިދާޅުވެއްޖެ އެވެ.

މިކޭސްއާ ގުޅިގެން އިތުރު މައުލޫމާތު "ރާއްޖެ އެމްވީ" އަށް ދެއްވަމުން ޖާވިދު ވިދާޅުވީ އެމީހާއަކީ މެދުއުމުރުގެ މީހެއްކަމަށެވެ. 14 ދުވަހުގެ ހޯމް ކަރަންޓީނު ފުރިހަމަ ކުރުމަށްފަހު އެމީހާގެ ސާމްޕަލް ނަގާފައިވަނީ ހޮނިހިރު ދުވަހުގެ ހެނދުނު ކަމަށާއި ނަތީޖާ ލިބިފައިވަނީ އާދިއްތަ ދުވަހުގެ ފަތިހު ކަމަށެވެ.

ޖާވިދު ވިދާޅުވީ މިމީހާއަކީ އެކަނި ގެއެއްގައި އުޅޭ މީހެއް ކަމަށެވެ.

ހޯމް ކަރަންޓީނު ފުރިހަމަކުރުމަށްފަހު ޓެސްޓް ކުރާތަނުން ބައެއް ރަށްރަށުގައި އަންނަނީ ކޮވިޑް-19 އަށް ޕޮޒިޓިވްވަމުންނެވެ. އެގޮތުން ރ ދުވާފަރުގައި ހޯމް ކަރަންޓީނުގައި ތިބި 3 މީހަކު ޕޮޒިޓިވްވުމާއި ގުޅިގެން އެރަށް ވަނީ މިހާރު މޮނިޓަރިންގ ގެ ހާލަތަށް ގެނެސްފަ އެވެ. މީގެއިތުރުން އއ ތޮއްޑޫ އާއި ހދ. ނޮޅިވަރަމްގައި ހޯމް ކަރަންޓީނުގައި ތިބި ބަޔަކު ވެސް ވަނީ ކޮވިޑް-19 އަށް ޕޮޒިޓިވްވެފަ އެވެ.