މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުގައި މަގާމުން ވަކިކުރި ކުރީގެ ޓޫރިޒަމް މިނިސްޓަރު އަލީ ވަހީދުގެ މޮބައިލް ފޯން ފުލުހުންގެ ބެލުމުގެ ދަށަށް ގެންގޮސްފިއެވެ.
އާދިއްތަ ދުވަހު ފުލުހުންގެ މީޑިއާއިން ބުނީ، އަލީ ވަހީދުގެ މައްޗަށް ކުރެވޭ ތުހުމަތުތަކާއި ގުޅިގެން ތަހުގީގަށް، އަލީ ވަހީދު ގެންގުޅުވި އިލެކްޓްރޯނިކް ބައެއް ތަކެތި ފުލުހުންގެ ބެލުމުގެ ދަށަށް ގެންގޮސް، ހެކި ހޯދުމުގެ ކަންކަން ކުރިއަށް ގެންދާ ކަމަށެވެ. ފުލުހުން ގެންދިޔައީ ސީދާ ކޮން ތަކެެއްޗެއް ކަމެއް ވިދާޅެއް ނުވެއެވެ.
ނަމަވެސް "ރާއްޖެއެމްވީ"އަށް އެނގިފައިވާ ގޮތުގައި، ކޯޓު އަމުރެއްގެ ދަށުން ގެންގޮސްފައިވަނީ، އަލީ ވަހީދުގެ ފޯނާއި ލެޕްޓޮޕް އެވެ.
ކޯޓު އަމުރެއްގެ ދަށުން ކުރީގެ ޓޫރިޒަމް މިނިސްޓަރު އަލީ ވަހީދު ދިރިއުޅުއްވާ އެޕާޓްމެންޓް ބަލައި ފާސްކުރަމުންދާ ކަމަށް ހޮނިހިރު ދުވަހު ފުލުހުން ވަނީ ބުނެފައެވެ.
ހޮނިހިރު ދުވަހު، މީޑިއާތަކަށް ފޮނުވި މެސެޖެއްގައި ފުލުހުން ބުނެފައިވަނީ، ތަހުގީގު ކުރަމުންދާ މައްސަލައަކާއި ގުޅިގެން އަލީ ވަހީދު ދިރިއުޅުއްވާ އެޕާޓްމަންޓް ބަލާ ފާސްކުރަމުންދާ ކަމަށެވެ. އިތުރު ތަފްސީލެއް ފުލުހުން ހާމައެއް ނުކުރެއެވެ.
އަލީ ވަހީދު ޓޫރިޒަމް މިނިސްޓްރަުކަމުން ވަކި ކޮށްފައިވަނީ އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުތަކާއި ގުޅިގެންނެވެ. އަލީ ވަހީދު އަށް ތުހުމަތުތައް ކުރި މުވައްޒަފުން ބުނާ ގޮތުން، އެ މުވައްޒަފުންނަށް ޖިންސީ ގޯނާ ކުރާތާ ގިނަ ދުވަސްތަކެއް ވަނީ ވެފައެވެ.
ޖިންސީ ގޯނާ ކޮށްފައިވަނީ މިނިސްޓްރީގެ ދަތުރުތަކުގައި ރިސޯޓުތަކަށް ގެންގޮސްގެން ކަމަށް ވެސް މިނިސްޓްރީގެ މުވައްޒަފުން ބުނެއެވެ. އެކަންތައްތައް ތަހައްމަލު ނުކުރެެވިގެން އެވާހަކަ ރައީސް ސޯލިހުއާ ހިއްސާ ކުރެއްވުމުން އެމަނިކުފާނު ކީރިތި ކުރެއްވި ކަމަށް ޓޫރިޒަމް މިނިސްޓްރީގެ އޮފިޝަލަކު ވަނީ ވިދާޅުވެފައެވެ.
އެކަމާއި ގުޅިގެން އަލީ ވަހީދު ވިދާޅުވެފައިވަނީ ހަގީގަތް ފަހުން ހާމަވާނެ ކަމަށެވެ.
