ކޮވިޑާ ހެދި ރާއްޖެ ވެއްޓިފައި މިއޮތް އަނދަވަޅުން އަރައި، ރައްޔިތުން ސަލާމަތުގެ އައްސޭރިއަށް އެމްޑީޕީން ގެންގޮސްދޭނެ ކަމަށް އެ ޕާޓީގެ އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ، އެމްޑީޕީގެ ގައުމީ މަޖިލީހުގައި ޕާޓީގެ މެމްބަރުންނާ ބައްދަލުކުރައްވާ ދެއްކި ވާހަކަފުޅުގައެވެ.
އަންގާރ ދުވަހުގެރޭ ޖަމާލުއްދީން ސްކޫލުގެ ހޯލުގައި ބޭއްވި ބައްދަލުވުމުގައި ރައީސް ނަޝީދު ވިދާޅުވީ، ކޮވިޑް-19 ގެ ސަބަބުން މުޅި ދުނިޔެއަށް އައި ތާށިކަމާއި އެކު ރާއްޖެވެސް ވަރަށް ބޮޑަށް ބަންދުވެފައިވާ ކަމަށެވެ.
މިއަދު މިތީބީ ތާށީގައި މުޅި ދުނިޔެ ހުއްޓި އަޅުގަނޑުމެންގެ ދިވެހިރާއްޖެ ވަރަށް ބޮޑަށް ބަންދުވެއްޖެ. ރާއްޖެއަށް ޓޫރިސްޓަކު ނައަންނަތާ ތިން މަސްވެގެން މި ދަނީ.މުހައްމަދު ނަޝީދު - އެމްޑީޕީގެ ރައީސް
ފަތުރުވެރިން ނައުމާއި ގުޅިގެން އާމްދަނީ ދަށްވެފައިވާ މި ދަނޑިވަޅުގައިވެސް، މަސްވެރިން ކިރާ މަސް ވިއްކާލުމަކީ ކިރިޔާވެސް ލިބޭ ހިތްހަމަޖެހުމެއް ކަމަށް ވިދާޅުވިއެވެ.
ރައީސް ނަޝީދު ވިދާޅުވި ގޮތުގައި، ކޮވިޑުގެ ބަލިމަޑުކަން އިތުރަށް ފެތުރުނާ ނުދީ ކޮންޓްރޯލް ކުރެވިފައިވަނީ ސަރުކާރުން އަޅަމުން ގެންދިޔަ ހަރުދަނާ ފިޔަވަޅުތަކުގެ ސަބަބުންނެވެ. އެމަނިކުފާނު ވަނީ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރްގެ މަސައްކަތަށް ވަރަށް ބޮޑަށް ތައުރީފްކުރައްވާފައެވެ.
ފޯރިއާ ޖޯޝުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ކޮވިޑުގެ ބަލިމަޑުކަން ފެތުރެމުންދާއިރު ރައްޔިތުންގެ މައްޗަށް ވެރިކަން ކުރަން އެމްޑީޕީ ދެއްވިކަން، އެއީ އެންމެ ބޮޑު އެއް ނަސީބު ކަމަށެވެ.
އަޅުގަނޑުމެން މި ތިބީ ތާށީގައި، އެމްޑީޕީއަކީ ތާ އަބަދަށް ތާށީގައި ތިބޭނެ ބައެއް ނޫން. އަޅުގަނޑުމެންގެ އުއްމީދުތަކާއި ވައުދުތަކާއި އެކުގައި މި ޕާޓީ ގަދައަޅާ ނުކުންނާނެ އިރާދަކުރެއްވިއްޔާ ދިވެހި ރާއްޖޭގެ ރައްޔިތުން ސަލާމަތުގެ އައްސޭރިޔަށް އަޅުގަނޑުމެން ގެނެސްދޭނެ.މުހައްމަދު ނަޝީދު - އެމްޑީޕީގެ ރައީސް
އެމްޑީޕީން ދެވަނަ ފަހަރަށް ވެރިކަމަށް އައީ ރައީސް ނަޝީދު ސިފަކުރެއްވި ގޮތުގައި ތަންދޮރު އެނގޭ ބައެއްގެ ގޮތުގައެވެ. އެމްޑީޕީގެ ރައީސް ވިދާޅުވި ގޮތުގައި ވާދަވެރިން ''ރޫޅި'' ނިމިއްޖެއެވެ. އަދި އެހެން ޕާޓީތަކުންވެސް މިހާރު ހިނގަމުންދަނީ އެމްޑީޕީގެ ފިޔަވަޅު ފަހަތުންނެވެ.
.
މުޅި ރާއްޖޭގައި ބޭނުންކުރަނީ އެމްޑީޕީގެ ބަހުރުވަ. އަޅުގަނޑުމެންގެ ވިސްނުން އަޅުގަނޑުމެންގެ ފަލްސަފާ، ރާއްޖޭގެ ސިޔާސީ މަޝްރަހަކީ އެމްޑީޕީ. ވައުދުވެ ވައުދު ފުއްދާ ޕާޓީއެއް. މަޖިލީސް އިންތިހާބައި ރިޔާސީ އިންތިހާބަށް ވައުދުވަނީ އެމްޑީޕީން އެހެން ބަޔަކުކުރާ ކަމެއް ނޫން.މުހައްމަދު ނަޝީދު - އެމްޑީޕީގެ ރައީސް
ރައީސް ނަޝީދު ވިދާޅުވީ، އެމްޑީޕީން ރައްޔިތުންނަށް ވީ ވައުދު އެ ޕާޓީން ހަނދާނެއް ނުނެތޭއެވެ. ހާލަތުން އަރައިގަންނައިރު އެ ޕާޓީން ރައްޔިތުންނަށް ވެފައިވާ ވައުދު ފުއްދުމާއިގެން ކުރިޔަށް ދާނެކަން ފާހަގަކުރެއްވިއެވެ.
