އޮންލައިންކޮށް ރީރަޖީސްޓްރީކުރެވޭނެ އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށް އިލެކްޝަންސް ކޮމިޝަން (އީސީ) ހާމަކޮށްފިއެވެ.
އެކަން ހާމަކުރެއްވި ރާއްޖެޓީވީގެ ފަލަސުރުހީ ޕްރޮގްރާމްގައި އެ ކޮމިޝަންގެ ނައިބު ރައީސް އަހުމަދު އަކްރަމެވެ.
އޭނާ ވިދާޅުވީ ރައްކާތެރި ކަމުގެ ފިޔަވަޅުތަކާއި އެކު އެކަން ކުރެވޭނެ ގޮތެއް ބަލައިދޭން، އީސީގެ އައިޓީ ސެކްޝަނުގައި އެދިވަޑައިގެންފައިވާ ކަމަށެވެ. އަކްރަމް ވިދާޅުވި ގޮތުގައި މި މަހުގެ ތެރޭގައި އޮންލައިންކޮށް ރީ ރަޖިސްޓްރީ ކުރުމާއި ގުޅޭ ގޮތުން އީސީން ނިންމާ ނިންމުންތައް ގައުމީ ލަފާދޭ ކޮމިޓީއަށް ހުށައަޅާނެއެވެ.
އަކްރަމް ސިފަކުރެއްވި ގޮތުގައި އޮންލައިންކޮށް ރީ ރަޖިސްޓްރޭ ކުރެވޭ ގޮތް ހަމަޖެހުމުން ވެގެންދާނީ އިންތިހާބުތަކަށް އަންނާނެ އިންގިލާބީ ބަދަލެއްގެ ގޮތަށެވެ. އިންތިހާބުގައި ވޯޓުލާ ފަރާތްތަކުން އެެންމެ ގިނައިން ކުރާ އެއް ކަމަކީ ރީ ރަޖިސްޓްރޭޝަން މަރުހަލާގައި އޮޅުވާލުން ކަމަށާއި، އޮންލައިންކޮށް ރީ ރަޖިސްޓްރީ ކުރެވޭ ގޮތް ހަމަޖެހުނަސް ރީ ރަޖިސްޓްރީކުރާ މީހާ ވެރިފައި ކުރެވޭ ގޮތްތަކެއް ހޯދާނެ ކަމަށް އީސީގެ ނައިބު ރައީސް ވިދާޅުވިއެވެ.
މި ފަހަރުގެ ލޯކަލް ކައުންސިލް އިންތިހާބާ އަންހެނުންގެ ތަރައްގީ އަށް މަސައްކުރާ ކޮމިޓީގެ އިންތިހާބު ބާއްވަން ފުރަތަމަ ތާވަލުކުރީ އޭޕްރިލް މަހުގެ ހަތަރު ވަނަ ދުވަހުއެވެ. އެކަމަކު ކޮވިޑުގެ ބިރުވެރިކަން ބޮޑުވެ އެ ތާރިހު އޭޕްރީލް 18ށް ބަދަލުކުރިއެވެ. އެއަށް ފަހު އިންތިހާބު ބާއްވާނެ ވަކި ތާރިހެއް އަދި މިހާތަނަށް ނިންމާފައިނުވިޔަސް، އަންނަ އަހަރުގެ މާޗް މަހުގެ މެދުތެރޭގައި އިންތިހާބު ބޭއްވުމަށް އީސީން ދަނީ މަޝްވަރާ ކުރަމުންނެވެ. ކައުންސިލްތަކުގެ އިންތިހާބެއް ބާއްވަންދެން މިހާރު އޮތް ކައުންސިލްތަކުގެ ދައުރު ދެމިގެންދާ ގޮތަށް ރައްޔިތުންގެ މަޖިލީހުން ވަނީ ގާނޫނުއަސާސީ އަށް އިސްލާހު ގެނެސްފައެވެ.
