ރާއްޖެ ތަރައްގީ ކުރުމުގައި ސިފައިން ދިފާއީ މައި ތަނބެއްގެ ގޮތުގައި ބައްލަވާނެ ކަމަށް ސިފައިންގެ އެންމެ މަތީވެރިޔާ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ، ކަޅުތުއްކަލާކޮށީގައި ސިފައިންނާ ބައްދަލުކޮށް ވާހަކަފުޅު ދައްކަވަމުންނެވެ. އާދިއްތަ ދުވަހުގެރޭ ބޭއްވި ރަސްމިއްޔާތުގައި ރައީސް ވިދާޅުވީ، ކޮވިޑް-19އާ ދެކޮޅަށް ކުރާ މަސައްކަތުގައި، ދިމާވާ ހުރަސްތައް ގިރާކޮށް މިހާރުގެ ހާލަތަށް އާދެވުމުގައި ސިފައިންގެ ދައުރު ވަރަށް ބޮޑުކަމަށް ރައީސް ވިދާޅުވިއެވެ.
ސިފައިންގެ ހިދުމަތް ޤައުމު ބަލައިގަންނަކަން ފާހަގަކުރައްވާ އެމަނިކުފާނު ވިދާޅުވީ ސިފައިންގެ ވެލްފެއަރގެ ކަންތައްތައް ވެސް މިހާރަށްވުރެ ހަރުދަނާކޮށް ކުރިއަށް ގެންދިއުމަށް ސަރުކާރުން މަސައްކަތްތައް ކުރަމުންދާ ކަމަށެވެ.
އަޅުގަނޑުމެން މި ރާއްޖެ ތަރައްގީ ކުރުމާއިގެން ކުރިއަށް މިދަނީ، މި ގައުމުގެ ދިފާއީ މައި ތަނބަކީ ދިވެހި އަސްކަރިއްޔާ ކަމުގައި ބަލައިގެން. އެހެންކަމުން ދިވެހި ސިފައިންނަކީ، އިލްމީ ގޮތުންނާއި ފަންނީ ގޮތުން އަދި ޖިސްމާނީ ދުޅަހެޔޮކަމާއި ނަފްސާނީ ގޮތުންވެސް ސިފަވަންތަ ބަޔަކަށް ހެދުމަށް އަޅުގަނޑުމެން ވަރަށް ހާއްސަ ސަމާލުކަމެއް ދެން.އިބްރާހިމް މުހައްމަދު ސޯލިހު - ރައީސުލްޖުމްހޫރިއްޔާ
ރައީސް ސޯލިހު ވަނީ ސިފައިންނާއެކު ބޭއްވި ބައްދަލުވުމުގައި ޑިފެންސް މިނިސްޓަރު މާރިޔާ އަހްމަދު ދީދީ އަށް ވަރަށް ބޮޑަށް ތައުރީފު ކުރައްވާފައެވެ. އެމަނިކުފާނު ވިދާޅުވި ގޮތުގައި މާރިޔާ އާދަޔާ ހިލާފު ލީޑަރޝިޕެއް ގެންގުޅުއްވައެވެ.
ވަރަށް ގިނަ އަދަދެއްގެ އިދާރާ ހިމެނޭ ގޮތުން، އަޅުގަނޑު އެކުލަވައިލި ނޭޝަނަލް އިމަޖެންސީ އޮޕަރޭޝަން ސެންޓަރުގެ ޗެއަރޕާސަންގެ ހައިސިއްޔަތުން ކޮވިޑް-19 ގެ އެންމެހައި ކަންކަން ވިލަރެސް ކުރެއްވުމުގައި، އެކަމަނާގެ ލީޑަރޝިޕްގެ ހަރުދަނާކަން ވަރަށް ރަނގަޅަށް ސާބިތު ކޮށްދެއްވައިފި.~ އިބްރާހިމް މުހައްމަދު ސޯލިހު - ރައީސުލްޖުމްހޫރިއްޔާ
ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް އާއި، އޭނާގެ ދަށުން މަސައްކަތް ކުރެއްވި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަހީމްގެ އިތުރުން، އެމްއެންޑީއެފްގެ އޮފިސަރުން އަދާކުރެއްވި މުހިންމު ދައުރަށްޓަކައި، ރައީސް ސޯލިހު ވަނީ ހާއްސަ ޝުކުރެއް އަދާކުރައްވާފައެވެ.
