ކޮވިޑް-19 އާގުޅިގެން އަޅާފައިވާ ފިޔަވަޅެއްގެ ގޮތުން ޖުޑީޝަލް ސަރވިސް ކޮމިޝަން (ޖޭއެސްސީ) އިން ހިދްމަތް ދިނުމުގައި އަމަލު ކުރާނެ އުސޫލްތަކެއް ކަނޑައަޅައިފިއެވެ.

އެގޮތުން، ޖޭއެސްސީން ހިދްމަތް ހޯދަން އަންނަ ފަރާތްތަކުން، ހެލްތް ޕްރޮޓެކްޝަން އެޖެންސީ (އެޗްޕީއޭ )ގެ ގައިޑްލައިނާ އެއްގޮތަށް އަނގައާއި ނޭފަތް ނިވާވާގޮތަށް މާސްކު އަޅާފައި ނުވާ ފަރާތްތަކަށް ހިދްމަތް ނުދިނުމަށް ވަނީ ނިންމާފައެވެ. އަދި ކޮމިޝަނަށް ހިދްމަތް ހޯދަން އަންނަ އެންމެހައި ފަރާތްތަކުން ކޮމިޝަނަށް ވަދެ، ނުކުތުމަށް މެދުޒިޔާރަތްމަގުގައި ކޮމިޝަނުގެ ނަންބޯޑު ހަރުކޮށްފައިވާ، ހ. ސަކީނާމަންޒިލްއަށް ވަދެވޭގޮތަށް ހުންނަ ދޮރު ބޭނުންކުރުން ހިމެނެއެވެ.

މީގެއިތުރުން، ކޮމިޝަނުގެ ކައުންޓަރުން ހިދްމަތް ދެވޭނީ ފަހަރަކު މީހަކަށް ކަމަށާއި އަދި ކައުންޓަރުގެ އިތުރުން ވެއިޓިންގ އޭރިއާގައި އެއްވަގުތެއްގައި މަޑު ކުރެވޭނީވެސް ފަހަރަކު މީހަކަށް ކަމަށް ވެސް ޖޭއެސްސީން ބުނެއެވެ.

ކޮމިޝަނުގެ އެތެރެއަށް ވަނުމާއެކު ސެނެޓައިޒަރއިން ރަނގަޅަށް އަތް ސާފުކުރުމަށް ސަމާލުކަން ދިނުމާއި ކައުންޓަރު ކައިރީގައާއި ވެއިޓިންގ އޭރިއާގައި މަޑުކުރަން ފާހަގަކޮށްފައިވާ ތަންތަނުގައި މަޑުކުރުމަށް ސަމާލުކަން ދިނުމުގެ އިތުރުން ކޮމިޝަނުން ހިދްމަތް ހޯދަށް އަންނަ ފަރާތްތަކުގެ ޓެމްޕަރޭޗަރ ޗެކްކޮށް، ރެކޯޑް ކުރުމާއެކު އަންނަ ފަރާތްތަކުގެ މައުލޫމާތު (ނަން، އައިޑީ ނަމްބަރު އަދި ފޯނު ނަމްބަރު) ރެކޯޑު ކުރެވޭނެ ކަމަށް ވެސް ޖޭއެސްސީން ބުނެއެވެ.

ޖޭއެސްސީއަކީ ގާނޫނުއަސާސީގެ ދަށުން އުފައްދާފައިވާ، އަދުލްއިންސާފުގެ ދާއިރާ، ހަރުދަނާކޮށް، ފަނޑިޔާރުންގެ ސްލޫކީ މައްސަލަތައް ބެލުމަށް އުފައްދާފައިވާ ކޮމިޝަނެކެވެ. ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން ހިނގަމުންދަނީ ޖޭއެސްސީގެ ދަށުންނެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ މައިގަނޑު މަސައްކަތްތަކުގެ ތެރޭގައި ހިމެނެނީ ޝަރުޢީދާއިރާއަށް ބޭނުންވާ ޢިމާރާތްތަށް ކުރުމާއި، މަރާމާތުތައް ކުރުމާއި، ޓެކޮނޮލޮޖީ ފޯރުކޮށްދިނުމާއި، މީހުން ބިނާކުރުމާއި، ތަފާސްހިސާބު އެއްކޮށް ޝާއިޢުކުރުމާއި، ވަޒީފާ ދިނުމާއި ވަކިކުރުން އަދި އިދާރީއެންމެހާ މަސައްކަތްތައް އިންތިޒާމުކޮށް ހިންގުމެވެ.

ޖޭއެސްސީން ބުނީ، އެޗްޕީއޭގެ އިރުޝާދުތަކާ އެއްގޮތްވާ ގޮތުގެ މަތިން، ޖޭއެސްސީން ހިދްމަތް ދިނުމުގައި އަމަލު ކުރަމުންދާ ގޮތްތަކަށް ބަދަލު ގެނެވި، އައު އާއްމު ހާލަތުގައި، އާންމުންނަށް ހިދްމަތް ދިނުން އާދިއްތަ ދުވަހުން ފެށިގެން ބަންދު ނޫން ކޮންމެ ދުވަހަކު ހެނދުނު 08:00 އިން ފެށިގެން މެންދުރުފަހު 15:00އަށް ކުރިއަށްދާނެ ކަމަށެވެ.