ބ. އަތޮޅުގައި ރިސޯޓެއްގެ ގޮތުގައި ތަރައްގީ ކުރަމުން އަންނަ ބޮޑުފިނޮޅުގައި، ބިދޭސީންތަކެއް ހަމަނުޖެހުން ހިންގައި އެ ތަނުގައި ތިބި ދިވެހިިންތަކެއް ރަހީނުކުރި މައްސަލާގައި ހިމެނޭ މީހުންގެ ބަންދަށް 15 ދުވަސް ޖަހައިފިއެވެ.
ފުލުހުން ބުނީ، ބޮޑުފިނޮޅުން ހައްޔަރުކުރި 19 މީހުންގެ ބަންދާމެދު ގޮތެއް ނިންމަން އޭދަފުށީ މެޖިސްޓްރޭޓް ކޯޓަށް ހާޒިރުކުރުމުން ހޯމް މިނިސްޓީން ކަނޑައަޅާ ތަނެއްހައި ބަންދުގައި ބައިތިއްބައިގެން ތަހުގީގު ކުރިޔަށް ގެންދަން 15 ދުވަހުގެ މުއްދަތު ދީފައިވާ ކަމަށެވެ.
ބޮޑުފިނޮޅުގައި ބިދޭސީންތަކެއް ހަޅުތާލުކުރަން ފެށީ، އެ މީހުންނަށް ދޭން ޖެހޭ މުސާރަ ނުލިބޭތީއެވެ. އެ ނުތަނަވަސް ކަމުގައި ބިދޭސީން ވަނީ އެ ރަށުގެ ތަކެއްޗަށް ގެއްލުންދީ، އެ ތަނުގައި މަސައްކަތްކުރަމުން ދިޔަ ދިވެހިންތަކެއް ރަށުން ފައިބަން އުޅެނިކޮށް ހުރަސް އަޅާ އެ މީހުން ރަހީނުކުރިއެވެ.
ފުލުހުން ވަނީ ހުކުރު ދުވަހު ފަތިހުގެ ވަގުތެއްގައި އެ ރަށަށް އަރާ ދިވެހިން ސަލާމަތް ކޮށްފައެވެ. ބޮޑުފިނޮޅުގެ މުވައްޒަފުންނަކީ ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާގެ ރިޒް ކުންފުންޏަށް ނިސްބަތްވާ މީހުންނެވެ.
ބިދޭސީންނަށް ދޭން ޖެހޭ ހަތަރު މަސް ދުވަހުގެ މުސާރަ ނުދެވޭ ކަމަށް ރިޒާ ވަނީ އެއްބަސްވެފައެވެ. ރިޒާ ވިދާޅުވާ ގޮތުން ނަމަ މުސާރަ ނުދެނީ އެ ރަށް ހަވާލުކޮށްފައިވާ ސީލް ކުންފުނިން ރިޒް ކުންފުންޏަށް ދޭން ޖެހޭ ފައިސާ ނުދޭތީއެވެ. ރިޒް ކުންފުނީގެ ވާހަކަތައް ދޮގުކޮށް، ސީލް ކުންފުނީގެ ފަރާތުން ވަކާލާތުކުރާ ލޯ ފާމުން ނެރުނު ބަޔާނެއްގައި ބުނީ، ފައިސާ ދޭންޖެހޭ އަދަަދަށް ވުރެ އިތުރަށް ވެސް ރިޒް ކުންފުންޏަށް ފައިސާ ދީފައިވާނެ ކަމަށެވެ.
