ރައްޔިތުންގެ މަޖިލީހަށް މިހާރު ހުށަހަޅާފައިވާ ފުލުހުންގެ ޚިދުމަތުގެ ބިލަށް ރައްޔިތުންގެ ޚިޔާލު ހޯދުމަށް ބާއްވާ ބައްދަލުވުން ބުދަ ދުވަހުގެ ރޭ 20:30 ގައި ރައްޔިތުންގެ މަޖިލީހުގެ އިދާރާގައި އޮންނާނެކަމަށް މަޖިލީހުން ބުނެފިއެވެ.

މިއީ ރައްޔިތުންގެ މަޖިލިހަށް ހުށަހެޅޭ ބިލުތަކާއި އެހެނިހެން މައްސަލަތަކާއި ގުޅޭގޮތުން ރައްޔިތުންގެ ޚިޔާލު ހޯދުމަށް ބާއްވާ މިފަދަ ދެ ވަނަ ބައްދަލުވުމެވެ. މީގެ ކުރިން މިނިމަމް ވޭޖް ކަނޑައެޅުމާއި ގުޅޭގޮތުން ވެސް މަޖިލީހުގެ އިދާރާގައި ވަނީ މިފަދަ ބައްދަލުވުމެއް ބާއްވާފައެވެ.

ރައްޔިތުންގެ މަޖިލީހުގެ އިދާރާއިން ބުނީ މި ބައްދަލުވުމުގައި ބައިވެރިވެ ވަޑައިގަންނަވަން ބޭނުންފުޅުވާ ފަރާތްތަކުން ބުދަ ދުވަހުގެ ރޭ 20:15 ގެ ކުރިން ރައްޔިތުންގެ މަޖިލީހުގެ އިދާރާއަށް ވަޑައިގެންނެވުމަށް އެދޭ ކަމަށެވެ.

ބިލަށް އާންމުންގެ ހިޔާލު ހޯދަން ހުޅުވާލީ މިދިޔަ ޖޫން މަހުގެ 21 ވަނަ ދުވަހުއެވެ. މިހާރު އެ ބިލް އޮތީ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމެޓީގައެވެ.

ފުލުހުންގެ ހިދުމަތުގެ ބިލަކީ އާންމުންގެ މެދުގައި ވެސް ހިޔާލުތަފާތުވުންތަކެއް އުފެދިފައިވާ ބިލެކެވެ. އަދި މި ބިލާއި ގުޅޭގޮތުން ސަލާމަތީ ޚިދުމަތްތަކާއި ބެހޭ ކޮމިޓީން ވެސް ވަނީ ނޫސްވެރިންގެ ބައްދަލުވުމެއް ބާއްވާ ބިލް ދިރާސާކުރުމުގެ ކަންކަމާއި ގުޅޭގޮތުން މައުލޫމާތު ހިއްސާކުރައްވާފައެވެ.

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެފައި ވަނީ، ފުލުހުންގެ ހިދުމަތުގެ ބިލު ހިމެނޭގޮތުން ފަސް ބިލަކާ ގުޅޭ މަޝްވަރާ ބައްދަލުވުންތައް މުޅި ރާއްޖޭގައި ބާއްވާނެ ކަމަށެވެ.