ރައްޔިތުންގެ މަޖިލީހުގެ ބައެއް މެމްބަރުންނަށް ފުލުހުންގެ ތެރެއިން ބަޔަކު ފާރަލާ ކަމުގެ ތުހުމަތުތަކެއް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުރައްވައިފިއެވެ.
މިކަމާއި ގުޅިގެން ވާހަކަ ދައްކަވަމުން ރައީސް ނަޝީދު ވިދާޅުވީ، ފުލުހުންގެ ތެރެއިން ބައެއް އޮފިސަރުން، މަޖިލީހުގެ ބައެއް މެމްބަރުން ކުރައްވަމުން ގެންދަވާ ބައެއް ކަންކަން ރެއިޑް ކުރުމަށް މަސައްކަތް ކުރައްވަމުން ގެންދަވާ ކަމަށް މައުލޫމާތު ލިބިވަޑައިގެންފައިވާ ކަމަށެވެ.
އެ މަނިކުފާނު ވިދާޅުވީ ފުލުސް އޮފީހުގެ އާއްމު އުސޫލުތަކާއި ހަމަތަކާއި ޚިލާފަށް ރައްޔިތުންގެ މަޖިލީހުގެ މެމްބަރެއް ޗެކުކޮށް، މެމްބަރުންގެ ގެކޮޅު ފާސްކުރުމުގެ ވިސްނުން ނުގެންގުޅުމަށް ފުލުހުންނަށް އިލްތިމާސްކުރައްވާ ކަމަށެވެ.
އަޅުގަނޑު މި ދެންނެވި ގޮތަށް ރައްޔިތުންގެ މަޖިލީހުގެ އިއްޒަތްތެރި މެމްބަރުންގެ ގެކޮޅަށްވިޔަސް އަދި ސައިކަލަކަށް ވިޔަސް އެހެން ކަމަކަށް ވިޔަސް، އެހެން ރައްޔިތަކަށް ޝައުގުވެރިކަން ނުދޭ މިންވަރަށް އަދި ފުލުސް އޮފީހުގެ އާއްމު އުސޫލުތަކާއި ހަމަތަކާއި ޚިލާފަށް ވަކިން ޚާއްސަކޮށް ގޮސް، ރައްޔިތުންގެ މަޖިލީހުގެ މެމްބަރެއް ޗެކްކޮށް، ރައްޔިތުންގެ މަޖިލީހުގެ މެމްބަރެއްގެ ގެއެއް ބަލާ ފާސްކޮށް، ރައްޔިތުންގެ މަޖިލީހުގެ މެމްބަރަކަށް އެވެނި ކަމެއް، މިވެނި ކަމެއް ކުރަން، އެ ވިސްނުމުގައި އެއްވެސް ފުލުހެއް ނުހުރުމަށް އަޅުގަނޑު ވަރަށް ބޮޑަށް ދަންނަވަން. އަޅުގަނޑު އެދެން.ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ރައީސް ނަޝީދު މިހެން ވިދާޅުވިއިރު، މަޖިލީހުން މިހާރު ދަނީ ދިވެހި ފުލުހުންގެ ޚިދުމަތުގެ ބިލުގެ މަސައްކަތް ކުރަމުންނެވެ. އެގޮތުން، މި ބިލު ގާނޫނަކަށް ވެގެން ދިއުމުން ފުލުހުންގެ މަސައްކަތަށް ވަރަށް ބޮޑެތި ބަދަލުތަކެއް އަންނާނެ ކަމަށް އެމަނިކުފާނު ވިދާޅުވިއެވެ.
އޭގެ އިތުރުން، ބިލު ޤާނޫނަކަށް ވެގެންދާ ހިސާބުން ފުލުހުންގެ ޚިދުމަތުގެ އޮނިގަނޑަށް ވެސް ބޮޑެތި ބަދަލުތަކެއް އަންނާނެ ކަމަށް މި ބިލު ދިރާސާ ކުރަމުންދާ 241 ކޮމިޓީން ވަނީ ބުނެފައެވެ. މި ބިލު ޤާނޫނަކަށް ވުމުން ލާމަރުކަޒީ އުސޫލުން ފުލުހުންގެ ޚިދުމަތްތައް ބައްޓަންވެގެން ދާނެ ކަމަށާއި އަދި ފުލުހުންގެ މުއައްސަސާއަކީ މިހާރަށްވުރެ ފުޅާ ދާއިރާއެއްގައި މަދަނީ ޚިދުމަތެއް ދޭ ތަނެއްގެ ގޮތުގައި ކަނޑައެޅިގެންދާނެ ކަމަށް ވެސް ބުންޏެވެ.
