ރާއްޖޭގެ ބޯޑަރު ޖުލައި 15ގައި ހުޅުވާލާއިރު، މިހާރު މި އަހަރުގެ ޓާގެޓަކީ ޖުމްލަ 850،000 ފަތުވެރިން ރާއްޖެއަށް ޒިޔާރަތް ކުރުން ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

ބުދަ ދުވަހު، ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމެޓީގެ ބައްދަލުވުމަށް މައުލޫމާތު ދެއްވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ، ކޮވިޑް-19 ރޯގާގެ ސަބަބުން ރާއްޖޭގެ ބޮޑަރު ބަންދުކުރިއިރު، އެ ވަގުތާ ހަމައަށް މިހަރުގެ ތެރޭގައި ރާއްޖެއަށް ޒިޔާރާތް ކޮށްފައިވަނީ، 392،675 ފަތުރުވެރިން ކަމަށެވެ. އަދި ޖުލައި 15 ގައި ރާއްޖޭގެ ބޯޑަރު ހުޅުވާލާއި، މިއަހަރުގެ ޓާގެޓެއްގެ ގޮތުގައި މިހާރު ކަނޑައަޅުއްވާފައިވަނީ ޖުމްލަ 850،000 ފަރުވެރިން ރާއްޖެ ގެނައުން ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވިއެވެ.

މިނިސްޓަރ އަލީ ވަހީދު ވިދާޅުވީ، 850،000 ފަތުރުވެރިންނަށް ޓާގެޓްކުރި ނަމަވެސް، އަދި ރާއްޖޭގެ ބޯޑަރު ހުޅުވުމަކުން ރާއްޖެއަށް ފަތުރުވެރިން ޒިޔާރަތްކުރުމުގައި ދަތިތަކެއް ހުންނާނެ ކަމަށެވެ. އެގޮތުން، ރާއްޖެއަށް ފަތުރުވެރިން އަންނަ ގައުމުތަކުގެ ކޮވިޑް-19ގެ ހާލަތު ރަނގަޅުވާން ޖެހޭ ކަމަށެވެ.

އެ ގައުމުތަކުގެ ބޯޑަރު ބަންދުކޮށްފައިވަނަމަ ފަތުރުވެރިންނަށް ރާއްޖެ ނާދެވޭނެ ކަމަށާއި، އަދި ބޯޑަރުތައް ހުޅުވާލި ނަމަވެސް، ގައުމަށް ގޮސް އަލުން އަނބުރާ ކަރަންޓީން ވާންޖެހޭނަމަ، ފަތުރުވެރިން އައުމުގައި ދަތިތަކެއް ކުރިމަތިވާނެ ކަމަށެވެ. ހަމަ އެގޮތުން، ރާއްޖޭގެ ބޯޑަރު އަލުން ހުޅުވާލާއިރު، ހަދާ އުސޫލްތަކަކީ ވެސް ފަތުރުވެރިންނަށް އަސަރުކުރާނެ ކަމެއް ކަމަށްވާނަމަ އެއީ ވެސް ގޮންޖެހުމެއް ކަމަށް އަލީ ވަހީދު ވިދާޅުވިއެވެ.

އަލީ ވަހީދު ވިދާޅުވީ، ބޯޑަރު ހުޅުވާލާއިރު، ޒިޔާރަތްކުރާ ފަތުރުވެރިން ޓެސްޓުކުރުމާއި، އަދި ކޮވިޑް-19 ފަތުރުވެރިޔަކު ޕޮޒިޓިވް ވިނަމަވެސް އޭނާގެ ޗުއްޓީ ހަރާބުނުވާނެ ގޮތަށް ކަންކަން ރޭވިފައިވާނެ ކަމަށެވެ.

އެގޮތުން ރިސޯޓްތަކުންނާއި ގެސްޓް ހައުސަކުން އަދި ކޮންމެ ހޮޓަލަކަށް އަންނަ ފަތުުރުވެރިންގެ ރައްކާތެރިކަމަށް، ހެލްތް ޕްރޮޓެކްޝަން އެޖެންސީ (އެޗްޕީއޭ) ގައިޑްލައިނާއި ޓޫރިޒަމް މިނިސްޓްރީން ކަނޑައަޅާފައިވާ ސޭފް ޓޫރިޒަމް ގައިޑް ލައިނާ އެއްގޮތަށް، އަދި އެޗްޕީއޭއިން ފާސްކޮށްފައިވާ، އެސްއޯޕީތައް އޮންނާނެ ކަމަށެވެ.

އެހެން ކަމުން ފަތުވެރިންނާއި ހިދްމަތްދޭ މުވައްޒަފުންގެ ރައްކާތެރިކަން ގާއިމު ވެފައި އޮންނާނެ ކަމަށާއި، އެކަން ކަށަވަރުކުރުމަށް މިނިސްޓްރީން ކުރަންޖެހޭ ކަންކަން ކުރައްވާނެ ކަމަށްވެސް އަލީ ވަހީދު ވިދާޅުވިއެވެ.