ސްރިލަންކާގެ ވެރިރަށް ކޮލަމްބޯއާ މާލެ ސިޓީއާ ދެމެދު ދަތުރުތައް ޖުލައި މަހުގެ 15 ދުވަހު ފަށަން ހަމަޖެހިފައިވާ ކަމަށް ރާއްޖޭގައި ހުންނަ ސްރީލަންކަންގެ ޓިކެޓިން އެޖެންޓް އިނަރ މޯލްޑިވްސް އިން ބުނެފިއެވެ.

ސްރީލަންކަން އެއާލައިންގެ ދަތުރުތަކާއި ގުޅޭ ގޮތުން ރާއްޖެ.އެމްވީ އަށް މައުލޫމާތު ދެއްވަމުން އިނަރ މޯލްޑިވްސްގެ މެނޭޖިންގ ޑިރެކްޓަރު މުހައްމަދު ފިރާގު ވިދާޅުވީ، ރާއްޖޭގެ ބޯޑަރުތައް ހުޅުވާލުމާއިއެކު ކޮލަމްބޯއާ މާލެއާ ދެމެދު ދަތުރު ފަށާނެ ކަމަށެވެ. ދަތުރުތައް އޮންނަނީ ކޮންމެ ހަފްތާއެއްގެ ބުދަ، ބުރާސްފަތި އަދި އާދިއްތަ ދުވަހުއެވެ.

ފަސެންޖަރުންގެ އަދަދުތަކަށް ބަލައި ހަފްތާއެއްގެ މައްޗަށް ދަތުރުކުރާ ފްލައިޓްތަކުގެ އަދަދު އިތުރު ކުރެވިގެން ދާނެ ކަމަށް އިނަރ މޯލްޑިވްސް އިން މައުލޫމާތުދެއެވެ.

ފަތުރުވެރިންނަށް ލަންކާާ ހުޅުވާލާނީ އޮގަސްޓު މަހުގައެެވެ. އެހެންކަމުން ރާއްޖެއިން ލަންކާ އަށް ދާން ބޭނުންވާ ފަރާތްތަކަށް ފުރުސަތު ހުޅުވާލާނީ އެ ތާރިހުން ފެށިގެންނެވެ.

އެެކެއް އޮގަސްޓުން ފެށިގެން މާލެއިން ކޮލަމްބޯ އަށް ދާން ބޭނުންވާ ދިވެހިންނަށް ރާއްޖޭގައި ހުންނަ ސްރީލަންކަންގެ އެޖެންޓުން އަތުން ޓިކެޓް ގަނެވޭނެއެވެ.

ޖުލައި މަހުގެ އެއްވަނަ ދުވަހުން އިނަރ މޯލްޑިވްސް ހުޅުވާލުމުން އެ އޮފީހުންވެސް ޓިކެޓް ގަނެވޭނެ ކަމަށް ފިރާގް ވިދާޅުވިއެވެ. އޭނާ ވިދާޅުވީ، އިތުރު ގައުމުތަކުގެ ބޯޑަރު ހުޅުވަމުންދާވަރަކުން ދަތުރުތައް އިތުރުކުރާނެ ކަމަށެެވެ. ލަންކާގެ ބައިނަލްއަގްވާމީ ވައިގެ ބަނދަރު ހުޅުވާލާއިރު އެ ގައުމަށް އެތެރެވެވޭނީ ޕީސީއާރް ޓެސްޓު ހަދައި އޭގެ ނަތީއްޖާ ލިބުމަށް ފަހުއެވެ.