ކޮވިޑް-19ށް ޝައްކު ކުރެވޭ ދެ މީހެއް ސާމްޕަލް ނެގުމަށް ދެކޮޅު ހެދުމުން، ސާމަޕަލް ނެގުމަށް ކޯޓު އަމުރެއް ނެރެފިއެވެ.

ސިވިލް ކޯޓުން ބުނީ، ކޮވިޑް-19ށް ޓެސްޓް ކުރުމަށްޓަކައި ސާމްޕަލް ދިނުމަށް ދެކޮޅު ހަދާފައިވާ 2 މީހެއްގެ މައްޗަށް ސާމަޕަލް ދިނުމަށް އެންގުމާއެކު، ސާމްޕަލް ނެގުމަށް ޑިރެކްޓަރ ޖެނެރަލް ކުރައްވާފައިވާ އަމުރު ތަންފީޒު ކުރުމަށް، އެކަމުގައި ޝަމިލްވާ ފަރާތްތަކަށާއި ފުލުހުންގެ މައްޗަށް 2 އަމުރު ބުދަ ދުވަހުގެ ރޭ އެ ކޯޓުން ނެރެފައިވާ ކަމަށެވެ.

ކަރަންޓީނަށް ދިއުމާއި ސާމްޕަލްތައް ނަގަން ދެކޮޅު ހެދުމަކީ ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ކުށެކެވެ. ޓެސްޓް ކުރުމަށްޓަކައި ސާމްޕަލް ނެގުމާއި ކަރަންޓީނަށް އެމީހަކު ގެންދިއުމުގެ ޢަމުރުތައް ނެރުމުގެ ބާރު ވެސް ކޯޓުތަކަށް ލިބިގެންވެއެވެ. އަދި މިފަދަ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ތެދު މަޢުލޫމާތު ހާމަ ކުރުމަކީ ހުރިހާ ފަރާތްތަކަށް ވެސް އެ ޤާނޫނުން ލާޒިމު ކުރާ ކަމެކެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެން ފެށުމާއި ގުޅިގެން، މާލެ ޞަރަޙައްދު ވަނީ ފުރަބަންދު ކޮށްފައެވެ. ނަމަވެސް ކޮވިޑް-19 ހާލަތު މިހާރު ކޮންމެވެސް ވަރަކަށް ރަނގަޅުވުމުންދާތީ ނޭޝަނަލް އެމަޖެންސީ އޮޕަރޭޝަން ސެންޓަރުން ވަނީ ފުރަބަންދަށް ލުއި ދިނުމަށް ފޭސްތަކަކަށް ބަހާލައިގެން ކުރިއަށް ގެންދަން ނިންމާފައެވެ. އެގޮތުން މިހާރު ކުރިއަށް ދަނީ ފުރަބަންދަށް ލުއި ދިނުމުގެ ދެ ވަނަ ފޭސް އެވެ.

ރާއްޖޭގައި ކޮވިޑް-19ށް 2260 މީހަކު ޕޮޒިޓިވްވެފައިވެއެވެ. މި ބަލި ޖެހުމަށްފަހު، 1839 މީހަކު ވަނީ ރަނގަޅުވެފައެވެ. މިވަގުތު ފަރުވާ ދެމުންދަނީ 409 މީހަކަށެވެ.